11 قازان كۇنى الماتىدا وتاندىق پەداگوگيكا عىلىمىنىڭ دامۋىنا سۇبەلى ۇلەس قوسقان كورنەكتى عالىم، ۇلاعاتتى ۇستاز كۇلاش قۇانتاي قىزىنىڭ قۇرمەتىنە وقۋ عيماراتى بەرىلىپ، ءدارىسحانانىڭ اشىلۋ سالتاناتى ءوتتى.
بۇل تۋرالى سحابارلادى.
كۇلاش قۇنانتايەۆا – قازاقستان ايەلدەرىنىڭ ىشىنەن شىققان تۇڭعىش پەداگوگيكا عىلىمدارىنىڭ دوكتورى، اكادەميك. ءىس-شارادا پروفەسسوردىڭ قۇرمەتىنە وقۋ عيماراتى بەرىلىپ، «قازاقستانداعى ءبىلىم سالاسىندا ايەلدەردىڭ ءرولى» تاقىرىبىندا كونفەرەنسيا وتكىزىلدى. كونفەرەنسيا اياسىندا عالىمنىڭ ءومىرى مەن عىلىمي قىزمەتى جونىندە بايانداما جاسالدى.
«كۇلاش قۇنانتاي قىزى – مەنىڭ عىلىمي جەتەكشىم. ۇزاق ۋاقىت بويى جانىندا ءجۇرىپ، بىلىممەن سۋسىندادىم. ەلگە بەلگىلى تۇلعانىڭ قاسىندا ءجۇرىپ، عىلىمنىڭ قىر-سىرىن مەڭگەرۋ – مەن ءۇشىن ۇلكەن دارەجە. ۇستازىمنىڭ ادامي بولمىسىنا ءتانتىمىن. ءبىزدى تەك مامان رەتىندە عانا ەمەس، تۇلعا رەتىندە قالىپتاسۋىمىزعا دا ءوزىنىڭ ۇلكەن ۇلەسىن تيگىزدى. كۇلاش قۇنانتاي قىزى سالعان ىزبەن مەن دە بۇگىن شاكىرت تاربيەلەۋدەمىن. كۇلاش قۇنانتايەۆا – مەنىڭ عىلىمداعى انام. جەتكەن جەتىستىكتەرىم ۇستازىمنىڭ ەڭبەگىنىڭ جەمىسى دەپ بىلەمىن. ەڭبەگىن ەلەپ، ەسىمىن ۇلىقتاپ جاتقان ۋنيۆەرسيتەت باسشىلىعىنا ايتار العىسىم شەكسىز»، – دەدى پەداگوگيكا عىلىمدارىنىڭ دوكتورى، ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى پروفەسسورى سەيىتقازى پەريزات بايتەش قىزى.
سونداي-اق ءىس-شارا بارىسىندا قازاقستان رەسپۋبليكاسىنىڭ ۇلتتىق عىلىم اكادەمياسىنىڭ جانە ق ر پەداگوگيكا عىلىم اكادەمياسىنىڭ قۇرمەتتى اكادەميگىنىڭ جەتىستىكتەرى، فوتوسۋرەتتەرى، قۇجاتتارى مەن عىلىمي جۇمىستارى ۇسىنىلاتىن كورمە ۇيىمداستىرىلدى. ۋنيۆەرسيتەت رەكتورى گۇلميرا قاناي كۇلاش قۇنانتاي قىزىنىڭ قازاق ايەلدەرىنىڭ جوعارى ءبىلىم الۋى جولىندا سىڭىرگەن ەڭبەگى زور ەكەنىن اتاپ ءوتتى.
«كۇلاش قۇنانتاي قىزىنىڭ قازاق ايەلدەرىنىڭ جوعارى ءبىلىم الۋى جولىندا سىڭىرگەن ەڭبەگى زور. ول كىسىنىڭ تىكەلەي ىقپالىمەن ايەلدەر ءبىلىمىنىڭ دامۋى جانە قازاقستاندا ءبىلىم بەرۋدى دامىتۋ تۋرالى 400-دەن اسا عىلىمي ەڭبەگى جارىق كوردى. ونىڭ ىشىندەگى وقۋ قۇرالدارى مەن وقۋلىقتار جانە مونوگرافيالار بار. كۇلاش قۇنانتايەۆانىڭ جەتەكشىلىگىمەن عىلىم كانديداتتارى مەن دوكتورلار دايىندالدى. قازىرگى كۇندە دە «قۇنانتايەۆانىڭ عىلىمي مەكتەبى» ساباقتاستىعى ساقتالعان»، – دەدى رەكتور.
شارا سوڭىندا جەكەمەنشىك مەديسينالىق ورتالىق اتىنان 4 ستۋدەنتكە 3 ميلليون تەڭگە كولەمىندە كۇلاش قۇنانتاي قىزى اتىنداعى گرانت بەرىلدى.