بيىل الماتى قالاسى بويىنشا كوۆيدكە شالدىققان تۇرعىنداردى مەديسينالىق وڭالتۋدان وتكىزۋگە 178،3 ملن تەڭگە قاراستىرىلعان. بۇل تۋرالى مەديسينالىق ساقتاندىرۋ قورىنىڭ الماتى قالالىق فيليالىنىڭ وكىلدەرى حابارلادى.
فيليال ديرەكتورى تىلەۋحان ابىلدايەۆتىڭ ايتۋىنشا، بۇگىنگى كۇنگە دەيىن مەديسينا ۇيىمدارىمەن 85،5 ملن تەڭگەنىڭ كەلىسىمشارتى بەكىتىلگەن. بۇل سوماعا 2584 پوستكوۆيدتىك ساۋىقتىرۋ قىزمەتى كورسەتىلۋگە ءتيىس.
«كوروناۆيرۋسپەن جانە پنيەۆمونيانىڭ ورتاشا نەمەسە اۋىر تۇرلەرىمەن اۋىرعان الماتىلىقتاردىڭ رەابيليتاسيادان وتۋگە مۇمكىندىگى بار. ولار پوستكوۆيدتىك وڭالتۋدان كۇندىزگى جانە تاۋلىك بويعى ستاسيونارلاردا وتە الادى»، – دەدى تىلەۋحان ابىلدايەۆ.
مەديسينالىق كومەكتى پايدالانۋ ءۇشىن تىركەلگەن ەمحاناداعى ۋچاسكەلىك دارىگەردەن رەابيليتولوگ-مامانعا جولداما الۋ قاجەت. دارىگەرلەر سىرقاتتىڭ جاعدايىنا قاراي دەنساۋلىقتى قالپىنا كەلتىرۋ جوسپارىن جاساپ، ەمدەۋ كۋرسىنىڭ مەرزىمىن بەكىتەدى.
ءبىراق مەديسينالىق رەابيليتاسيادان ءوتۋ ءۇشىن پاسيەنت مىندەتتى تۇردە ساقتاندىرىلعان بولۋى شارت. سونىمەن قاتار، مەديسينالىق ساقتاندىرۋ قورى پوستكوۆيدتىك وڭالتۋ قىزمەتىن كورسەتەتىن كلينيكالار سانىن ارتتىرۋعا كۇش سالىپ كەلەدى.
«مسق رەابيليتاسيا قىزمەتىن كورسەتەتىن كلينيكالار سانىن ارتتىرۋعا، بۇل سالاعا جەكەمەنشىك كلينيكالاردى تارتۋ باعىتىندا جۇمىس جۇرگىزىپ كەلەدى. ايماقتىق كوميسسيا اتالعان قىزمەت تۇرىنە تۇراقتى كونكۋرس جاريالاپ وتىرادى»، – دەدى تىلەۋحان ابىلدايەۆ.
تاقىرىپقا وراي ايتا كەتسەك، بىلتىر الماتى قالاسى بويىنشا پوستكوۆيدتىك وڭالتۋ قىزمەتىنە 222،4 ملن تەڭگە جۇمسالعان بولاتىن.