اتىراۋ وبلىسىنىڭ يساتاي جانە قۇرمانعازى اۋدانىندا بىرنەشە جىلقىنىڭ بەلگىسىز سەبەپتەن ولگەنى انىقتالدى، دەپ حابارلايدى اlmaty-akshamy.kz اتىراۋ وبلىستىق كوممۋنيكاسيا قىزمەتىنە سىلتەمە جاساپ.
وبلىستىق اۋىل شارۋاشىلىعى باسقارماسىنىڭ باسشسى امانگەلدى سالاماتتىڭ ايتۋىنشا، ولاردىڭ سەبەبىن انىقتاۋ ءۇشىن 25 ناۋرىز كۇنى جەرگىلىكتى ۆەتەرينار ماماندار سىناما الىپ، ۇلتتىق ۆەتەريناريالىق رەفەرەنتتىك ورتالىققا تاپسىرعان. اتالعان ورتالىق جىلقىلاردا ينفەكسيالىق انەميا مەن رينوپنيەۆمونيا اۋرۋلارى، ياعني اسا ءقاۋىپتى جۇقپالى اۋرۋلار بولماعانىن انىقتادى.
ال ۆەتەريناريا ماماندارى ولاردان پارازيتارلىق اۋرۋ بەلگىلەرىنە ۇقساس جاعدايدى بايقاعاندىقتان، وبلىستىق ۆەتەريناريالىق زەرتحاناعا دا پارازيتارلىق اۋرۋلاردى انىقتاۋ ءۇشىن سىناما تاپسىرىلدى. زەرتتەۋ ناتيجەسى شىققان سوڭ قوسىمشا جاريالانادى.
مالى اۋىرعانىن حابارلاعان بىرنەشە ازاماتتىڭ جىلقىلارىنا قازىرگى ۋاقىتتا جەرگىلىكتى جەردەگى ۆەتەرينار ماماندارى سيمپتوماتيكالىق جۇمىستارىن جۇرگىزۋدە.
«سونداي-اق وبلىس اكىمدىگى وڭىرگە قازاق ۆەتەريناريالىق عىلىمي-زەرتتەۋ ينستيتۋتى مەن بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى ماماندارىن الدىرۋدا. ولار ەرتەڭ ياعني 31 ءساۋىر مەن 2 ءساۋىر ارالىعىندا اتالعان اۋدانداردا سىناما الىپ، زەرتتەۋ جۇمىستارىن جۇرگىزەدى»،-دەلىنگەن حابارلامادا.