الماتىلىقتار «وڭاي» كولىك كارتاسىن 2015 جىلدىڭ قازان ايىنان باستاپ، قولدانىپ كەلەدى.
دەسە دە، كۇن سايىن لىق تولى اۆتوبۋستارمەن قاتىناپ، جول ازابىن كورىپ جۇرگەن الماتىلىقتار ءۇشىن جولاقىسىن تولەۋگە ارنالعان جەڭىل ءارى تۇسىنىكتى «وڭاي» جۇيەسىنىڭ ءوزىن جەتىلدىرۋ ارتىق بولماس.
بۇل جۇيە ەڭ الدىمەن قوعامدىق كولىكتە تولەمنەن تۇسكەن قارجىنىڭ كولەڭكەلى اينالىمعا ءتۇسىپ كەتپەۋىن كوزدەدى. سونداي-اق بيۋدجەتكە سالىق ءتۇسىمىن ارتتىرۋ ءۇشىن ەنگىزىلدى. سودان بەرى جول ءجۇرۋ اقىسى قولما-قول اقشامەن ەمەس، كارتا ارقىلى تولەنە باستادى. جولاۋشىلاردىڭ وزدەرى مۇنى ءتيىمدى دەپ سانايدى. قوعامدىق كولىكتە جول اقىسىن ءموبيلدى قوسىمشا ارقىلى دا تولەۋگە بولادى. الايدا ونى سمارتفونعا جۇكتەمەس بۇرىن، جولاۋشى الدىمەن كارتا ساتىپ الۋى كەرەك. ايتپەسە تولەم جاساي المايسىز. وسى ءىستىڭ باسى-قاسىندا جۇرگەندەر كوپ ۇزاماي بۇل ماسەلەنى دە شەشەمىز دەپ ۋادە بەرىپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ.
«ءقازىر ءبىز وسىعان قاتىستى جاڭا ءونىمدى سوڭعى سىناقتان وتكىزۋگە ازىرلەپ جاتىرمىز. ياعني ۆيرتۋالدى كارتا بولادى. ەندى قالا تۇرعىندارى مەن قوناقتارى بۇرىنعىداي كارتا ىزدەپ، سابىلمايدى. ءتىپتى ونىڭ قاجەتى بولمايدى. جولاۋشىلار جاي عانا قوسىمشانى جۇكتەپ السا، جەتكىلىكتى. جولاقىسىن كارتاسىز، ءموبيلدى قوسىمشا ارقىلى تولەپ جۇرە بەرەدى. بۇل وتە ىڭعايلى بولادى دەپ ويلايمىن»، - دەيدى "وڭاي" كولىك حولدينگىنىڭ جوبالاۋ-ساراپتاما ءبولىمىنىڭ باسشىسى الىبەك قالابايەۆ.
دەسە دە، «وڭايعا» الماتىلىقتاردىڭ ءبارىنىڭ بىردەي كوڭىلى تولمايدى. «ماسەلەن، قوسىمشانى ازىرلەۋ بارىسىندا زاعيپ جانداردىڭ سۇرانىسى ەسكەرىلمەگەن»، – دەيدى داۋرەن باشەنوۆ.
«قوسىمشانى زاعيپتار مەن كوزى ناشار كورەتىن ادامدار قولدانا المايدى. بىزگە مۇلدەم قولجەتىمسىز. بۇل قالا ىشىندە جۇرۋگە ۇلكەن كەدەرگى. ويتكەنى ايالداماعا قانداي كولىك كەلە جاتقانىن بىلۋگە مۇمكىندىك جوق»، - دەيدى قالا تۇرعىنى داۋرەن باشەنوۆ.
زاعيپتار قوسىمشادا داۋىستاپ ايتىپ بەرەتىن نۇسقاۋلىق بولۋىن قالايدى. وسىعان قاتىستى كولىك حولدينگىنە بىرنەشە رەت ءوتىنىش تۇسىرگەنىمەن، تۇششىمدى جاۋاپ الا الماپتى.
«بۇل تەحنولوگيالىق تۇرعىدان كۇردەلى ءونىم سانالادى. سوندىقتان جىلدام دايىن بولمايدى. قاشان ءازىر بولاتىنىن انىق ايتا المايمىن. بۇل ماسەلە ءبىزدىڭ نازارىمىزدا. ءقازىر زەرتتەۋ جۇمىستارى جۇرگىزىلىپ جاتىر»، - دەيدى "وڭاي" كولىك حولدينگىنىڭ جوبالاۋ-ساراپتاما ءبولىمىنىڭ باسشىسى الىبەك قالابايەۆ.
الايدا قوعامدىق اۆتوبۋستار مەن تروللەيبۋستاردا قولما-قول تولەم جاسايتىندار ءالى دە كەزدەسەدى. ياعني جولاۋشىلاردىڭ ءبىرقاتارى سارالانعان تاريف بويىنشا تولەۋگە ءماجبۇر. قولما-قول اقشامەن جول ءجۇرۋ باعاسى 150 تەڭگە، ال كارتانى پايدالانسا نەمەسە SMS پەن QR-كود ارقىلى تولەسە - 80 تەڭگە.