وزگەرىستەردى جان-جاقتان قولداۋمىز كەرەك
مەملەكەتىمىز جاڭا دامۋ كەزەڭىن باستادى. ءبىز دانا اباي قالاعان رۋحاني جولعا باستاپ بارامىز. «ادىلەتتى مەملەكەت. ءبىرتۇتاس ۇلت. بەرەكەلى قوعام». جاڭا تاۋەلسىز ۇرانىمىز جاريالانىپ، جولىمىز ايقىندالدى.
الدىمىزدا كونستيتۋسيالىق رەفورما، جاڭا، ادىلەتتى قازاقستاندى قۇرۋ جولىنداعى اسا ماڭىزدى قادام كۇتىپ تۇر. ەلىمىزدەگى ساياسي جاڭعىرۋ ەندى ەكونوميكالىق ۇلكەن وزگەرىستەرگە ۇلاسادى دەپ ويلايمىن. ەكونوميكاعا بايلانىستى ۇسىنىستار كوپ. مەن ولارعا توقتالماي-اق قويايىن.
قازىرگىدەي كۇردەلى گەوساياسي جاعدايدا مەملەكەتتىڭ ىشكى ساياسي رەفورمالارىنىڭ ورنىقتىلىعى – وتە ماڭىزدى ماسەلە. پرەزيدەنت جولداۋىنداعى جاڭا ساياسي پراكتيكا، جاڭا ساياسي ءداستۇر – جاريالىلىق پرينسيپىنە ۇلكەن كوڭىل ءبولىنىپ وتىر. ساياسي رەفورمالار باعدارلاماسىندا سايلاۋ جۇيەسىن جەتىلدىرۋ، سايلاۋ ۇدەرىسىن جاڭعىرتۋ، پارتيا جۇيەسىن دامىتۋ مۇمكىندىكتەرىن كەڭەيتۋ سەكىلدى ماسەلەلەر ءوز شەشىمىن تابادى. بيىل كەزەكتەن تىس پرەزيدەنت سايلاۋى وتەدى. وسى ساياسى رەفورمالاردىڭ قاجەتتىگىن ءبارىمىز ءتۇسىنىپ جاتىرمىز. بۇل مەملەكەتىمىزگە، بارىمىزگە جانە تاۋەلسىزدىگىمىز ءۇشىن قاجەت دەپ ويلايمىن. وزگەرىستەردى جان-جاقتان قولداۋمىز كەرەك. وتە كۇردەلى تاريحي كەزەڭ ەكەنىن ءبارىمىز ءبىلىپ تۇرمىز.
«مەن ءۇشىن مەملەكەت مۇددەسى بارىنەن بيىك! مەملەكەتىمىزدى قورعاۋ – مەن ءۇشىن اسا ماڭىزدى مىندەت. وسى جولدا جاۋاپكەرشىلىكتىڭ ءبارىن موينىما الۋعا دايىنمىن!»، – دەپ تۇيىندەدى مەملەكەت باسشىسى. ەڭ باستىسى – سول دەپ ەسەپتەيمىن.
ۇسىنىستار كوپ. سونىڭ ىشىندە ۇلتتىق قوردان تۇسكەن تابىستى بالالارعا ءبولىپ بەرۋ جانە زەينەتكە شىعۋ جاسىن ءوسىرۋدى توقتاتۋ دا وتە ماڭىزدى. دەنساۋلىق ساقتاۋ ماسەلەسىنە ەرەكشە كوڭىل ءبولىنىپ وتىر. جولداۋدىڭ باسىندا جاستارعا قولداۋ ءبىلدىرىپ جاتىر. جاستارعا ەرەكشە جول بەرۋىمىز كەرەك. قازىرگى جاستاردىڭ العا ۇمتىلىسى جاقسى. جالپى، جولداۋ – وڭ وزگەرىستەردىڭ باستاۋى.