كىتاپ وقۋدى ناسيحاتتاۋ، قوعامدا كىتاپقا دەگەن قىزىعۋشىلىقتى ارتتىرۋ ماقساتىندا جەتىسۋدا يگى باستامالار جۇزەگە اسىرىلىپ جاتىر. س. سەيفۋللين اتىنداعى ورتالىق كىتاپحانا وقىرمانداردىڭ وقىعان كىتاپتارىنىڭ سانىنا قاراي جىل سايىن ۇزدىك وقىرماندارىن انىقتاپ وتىرادى.
بيىل تالدىقورعاندىق بولات نۇرجانوۆ جىل باسىنان بەرى 70 كىتاپ كىتاپ وقىپ، وبلىستىق كىتاپحانانىڭ «ەڭ ۇزدىك وقىرمان» اتالىمىندا جەڭىمپاز دەپ تانىلدى، دەپ حابارلايدى اlmaty-akshamy.kz.
ساكەن سەيفۋللين اتىنداعى ورتالىقتاندىرىلعان كىتاپحانا ديرەكتورى سامال شاياحمەتوۆانىڭ ايتۋىنشا، كىتاپ وقۋ مادەنيەتىن قالىپتاستىرۋ ماقساتىندا تۇراقتى جۇمىستار قولعا الىنعان.
سونىڭ ىشىندە «وقيتىن ۇلت» رەسپۋبليكالىق جوباسىنا جەتىسۋلىقتار بەلسەنە قاتىسىپ جاتىر. وسى جوبانىڭ بىرنەشە باعىتى اياسىندا ۇلتتىق اكادەميالىق كىتاپحانانىڭ باستاماسىمەن بيىل وڭىرلىك كىتاپحانا ۇجىمى كوپتەگەن اقىن-جازۋشىلاردى وقىرماندارىنا كەڭىنەن ناسيحاتتاپ، كىتاپتارىن ۇسىندى.
«وبلىستىق كىتاپحانا جىل سايىن ۇزدىك وقىرماندارىن انىقتاپ وتىرادى.ءقازىردىڭ وزىندە مادەنيەت مەكەمەسى بىرنەشە نوميناسيا بويىنشا بەلسەندى ازاماتتاردىڭ ەسىمدەرىن انىقتاپ، قورىتىندىسىن شىعارىپ قويدى. جەڭىمپازداردى جەلتوقسان ايىندا ارنايى ماراپاتتاۋ جوسپارلانعان»، - دەيدى مەكەمە ديرەكتورى س.شايازحمەتوۆا.
ايتۋىنشا، جەتىسۋ وبلىسىنىڭ س.سەيفۋللين اتىنداعى ورتالىق كىتاپحاناسىنىڭ «ەڭ ۇزدىك وقىرمان» اتالىمىندا جىل باسىنان بەرى 70 كىتاپ وقىعان تالدىقورعاندىق بولات نۇرعوجانوۆ ۇزدىك شىقسا، وتەناي اۋىلىندا تۇراتىن 75 جاستاعى زەينەتكەر بولاتبەك تويبەكوۆ 62 كىتاپ وقىپ، «ارداگەر وقىرمان» رەتىندە تانىلدى. ال 51 كىتاپتى وقىپ تاۋىسقان تالدىقورعاندىق جەكە كاسىپكەر جاڭىل نۇرتايەۆا «بەلسەندى وقىرمان» نوميناسياسىنا لايىق دەپ تانىلدى.
«بالا جاسىمنان كىتاپ وقۋعا قۇمار بولدىم.س.سەيفۋللين اتىنداعى كىتاپحاناعا ءجيى بارامىن. ايىنا 5 كىتاپقا دەيىن وقىپ تاستايمىن. ءوزىم جاستايىمنان اسكەري سالادا قىزمەت ىستەگەننەن كەيىن بە، باۋىرجان مومىش ۇلى، تاحاۋي احتانوۆ، ءادي ءشارىپوۆ، كەمەل توقايەۆتاردىڭ شىعارمالارى جانىما جاقىن. كىتاپتى نەعۇرلىم تاڭدا ەرتە تۇرىپ وقۋعا تىرىسامىن، سەبەبى تاڭعا جاقىن وقىعان كىتاپ الدەقايدا ءسىڭىمدى، ءارى ميدى قوزعالىسقا كەلتىرۋگە كوپ كومەكتەسەدى»، - دەيدى تالدىقورعان تۇرعىنى بولاتبەك تويبەكوۆ.
جالپى، جەتىسۋ وبلىسىنىڭ كىتاپحانالار جۇيەسىنە 147 مەكەمە كىرەدى. وبلىس بويىنشا 2،8 ميلليونعا جۋىق كىتاپ قورى بار. وتكەن 9 ايدا كىتاپحانالار قىزمەتىنە 1،6 ملن ادام جۇگىنگەن. كىتاپ بەرىلىمى 3،3 ميلليونعا جەتتى.