قازاقستاندا QR–كود ارقىلى كورسەتىلگەن مەديسينالىق قىزمەتتى راستاۋ بويىنشا پيلوتتىق جوبا ىسكە قوسىلدى
ق ر دەنساۋلىق ساقتاۋ مينيسترلىگى قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىمەن بىرلەسىپ پاسيەنتتىڭ QR-كود ارقىلى مەديسينالىق قىزمەت الۋ فاكتىسىن راستاۋ جونىندەگى پيلوتتىق جوبانى ىسكە قوستى.
پيلوتتىق جوباعا استانا، الماتى قالالارىنىڭ جانە سولتۇستىك قازاقستان وبلىسىنىڭ مەديسينالىق ۇيىمدارى قاتىسادى.
دارىگەرگە بارۋ فاكتىسىن راستاۋ ءۇشىن قولدانىلاتىن QR راستاۋى پاسيەنت پەن دەنساۋلىق ساقتاۋ مامانىنىڭ اراسىنداعى سيفرلىق ءوزارا ءىس-قيمىلدى ورناتۋ شەڭبەرىندە قاۋىپسىزدىك پەن اشىقتىقتى قامتاماسىز ەتەدى.
پاسيەنت ەمحاناعا egov mobile موبيلدىك قوسىمشاسىنىڭ كومەگىمەن كەلىپ، دارىگەردىڭ كابينەتىندە ۇسىنىلعان QR-كودتى سكانەرلەيدى جانە ونىڭ كەلگەنىن راستايدى.
سونداي-اق QR-كود ارقىلى پاسيەنت قاجەتتى اقپاراتپەن - ەمحانانىڭ اتاۋىمەن، مەديسينالىق اقپاراتتىق جۇيەنىڭ اتاۋىمەن تانىسا الادى، دارىگەرگە بارعان كۇنى مەن ۋاقىتىن، دارىگەردىڭ تەگى مەن اتىن، مەديسينالىق قىزمەت كورسەتۋگە ءوزىنىڭ كەلىسىمىن جانە دەربەس دەرەكتەردى جيناۋعا جانە وڭدەۋگە كەلىسىمىن كورە الادى.
ازاماتتىڭ مەديسينالىق قىزمەتتى الۋ فاكتىسىن راستاۋدىڭ سيفرلىق قۇرالى مەديسينالىق كومەك كورسەتۋدىڭ اشىقتىعىن قامتاماسىز ەتۋگە، پاسيەنتتىڭ قاناعاتتانۋشىلىعىن باعالاۋعا جانە ەڭ باستىسى، پاسيەنت دارىگەرگە ءىس جۇزىندە بارماعان كەزدە مەديسينالىق اقپاراتتىق جۇيەلەردەگى «تىركەۋلەردى» الىپ تاستاۋعا مۇمكىندىك بەرەدى.
ءوز كەزەگىندە، مەديسينالىق مەكەمەلەردىڭ وزدەرى بۇل جۇيەنى مەديسينالىق كومەكتىڭ ساپاسىن باقىلاۋ جانە كەلۋلەردى باقىلاۋ ءۇشىن قولدانا الادى.
پيلوتتىق جوبانى ەنگىزۋگە دايىندىق بارىسىندا QR-راستاۋ بويىنشا الدىن الا ساۋالناما ناتيجەلەرى ەسكەرىلگەنىن اتاپ وتكەن ءجون. ساۋالناماعا 1105 پاسيەنت جانە 2732 دارىگەر قاتىستى. ساۋالنامانى تالداۋ ناتيجەلەرى بويىنشا پاسيەنتتەردىڭ 50%-ى دارىگەرگە بارۋدى راستاۋ ءۇشىن QR كودتى ەنگىزۋ يدەياسىنا وڭ كوزقاراسپەن قارايدى جانە 48%-ى QR-راستاۋ ارقىلى قابىلداۋلارىن باقىلاعىسى كەلەدى، بۇل پاسيەنتتەردىڭ وڭ كوزقاراسى مەن جاڭا قۇرالدى ەنگىزۋگە دايىندىعىن كورسەتەدى.