وماروۆ الماتى قالاسىنا جۇمىس ساپارىمەن كەلدى

اقپارات جانە قوعامدىق دامۋ ءمينيسترى اسقار وماروۆ ساپار بارىسىندا الماتى قالاسىنداعى ءدىن ماسەلەلەرىن زەرتتەۋ ورتالىعىنىڭ ۇجىمىمەن كەزدەسىپ، قالاداعى مەملەكەتتىك-كونفەسسياارالىق قارىم-قاتىناس ماسەلەلەرىن تالقىلادى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
جۇمىس ساپارى اياسىندا مينيستر ءا.قاستەيەۆ اتىنداعى مەملەكەتتىك ونەر مۋزەيىنە بارىپ، ميتروپوليت وكرۋگى تۇركىستان ەپارحياسىنىڭ 150 جىلدىق مەرەيتويى اياسىندا ۇيىمداستىرىلعان «ەجەلگى ورىس ونەرى» كورمەسىنە قاتىستى. وندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ قۇتتىقتاۋ حاتىن وقىدى.
مەملەكەت باسشىسى اتاپ وتكەندەي، ميتروپوليت وكرۋگى ەپارحيانىڭ ءىسىن لايىقتى جالعاستىرۋشى رەتىندە، اعارتۋشىلىق جانە قوعامدىق جۇمىستارمەن بەلسەندى اينالىسىپ، ءداستۇرلى رۋحاني-ادامگەرشىلىك قۇندىلىقتاردى ناسيحاتتاپ، ەتنوسارالىق جانە كونفەسسياارالىق ديالوگتى دامىتۋعا ۇلەس قوسىپ ءجۇر.
بۇعان قوسا كورمەدە ءا.قاستەيەۆ اتىنداعى مۋزەي قورىنان الىنعان XVII-XIX عاسىرداعى شىركەۋ ونەرى جيناعىنىڭ تۇساۋى كەسىلدى.
ساپار اياسىندا ا.وماروۆ الماتى قالاسىنداعى جاستار رەسۋرستىق ورتالىعىندا بولىپ، مەكەمەنىڭ تىنىس-تىرشىلىگىن كورىپ، مينيسترلىكتىڭ جاستارعا ارنالعان وقىتۋ باعدارلامالارى جانە جاستار سالاسىندا جۇمىس ىستەيتىن قىزمەتكەرلەردىڭ مارتەبەسى توڭىرەگىندە ءسوز قوزعادى.
سونداي-اق مينيستر «ەرىكتىلەر ليگاسى» قوزعالىسىنىڭ وكىلدەرىمەن، «جايدارمان» قوزعالىسىنىڭ قاتىسۋشىلارى جانە ۇيىمداستىرۋشىلارىمەن كەزدەستى. اڭگىمە ۆولونتەرلىكتى دارىپتەۋ، «جايدارمان» ويىندارىن ودان ءارى دامىتۋ، سونداي-اق، جاستاردى تاربيەلەۋ تۋرالى بولدى.
اسقار وماروۆ جاستار رەسۋرستىق ورتالىعى بازاسىنداعى قازاق stand up-تى دامىتۋدى كوزدەيتىن «J-club» جوباسى، CAD مودەلدەۋگە وقىتۋ، 3D پروتوتيپتەۋ، گرافيكالىق ديزاين، مونتاجداۋ نەگىزدەرىمەن اينالىساتىن «Innovation HS» جانە دە ارت-تەراپيانى قولدانا وتىرىپ، ناشار ەستيتىن بالالارمەن جۇمىس ىستەيتىن «ەل-نازى» مەكەمەلەرىمەن تانىستى.