سەيسەنبى كۇنى ماسكەۋدە وتكەن راسىمدە «دوستاستىق جۇلدىزدارى» مەملەكەتارالىق سىيلىقتارى تمد-نىڭ توعىز ەلىنىڭ لاۋرەاتىنا تابىستالدى، دەپ حابارلايدى almaty-akshamy.kz قازاقپاراتقا سىلتەمە جاساپ.
«دوستاستىق جۇلدىزدارى» - تمد-نىڭ گۋمانيتارلىق سالاداعى جوعارى جەتىستىكتەرى ءۇشىن بەرىلەتىن ماراپات. ونىڭ يەگەرلەرىنىڭ اراسىندا ممحقي رەكتورى، رەسەي عىلىم اكادەمياسىنىڭ اكادەميگى اناتوليي توركۋنوۆ، رەسەي-ارميان ۋنيۆەرسيتەتىنىڭ رەكتورى ارمەن داربينيان (ارمەنيا)، فيزيك عالىمداردىڭ اۆتورلىق ۇجىمى: الەكساندر تۋزيكوۆ، سەرگەي زولوتوي جانە سەرگەي كورەنياكو (بەلارۋس)، استروفيزيكا ينستيتۋتىنىڭ ديرەكتورى گۇلچەحرا كوحيروۆا (تاجىكستان)، ۇلتتىق عىلىم اكادەميالارىنىڭ پرەزيدەنتتەرى مۇرات جۇماتايەۆ (قىرعىزستان) جانە يون تيگينيانۋ (مولداۆيا) بار. سونداي-اق، سىيلىق يەگەرلەرىنىڭ اراسىندا قازاقستان جازۋشىسى ولجاس سۇلەيمەنوۆ، ءازىربايجاننىڭ وپەرا ءانشىسى ەلچين ءازيزوۆ جانە وزبەكستاننىڭ ەسترادا-سيمفونيالىق وركەسترىنىڭ جەتەكشىسى مانسۇر تاشماتوۆ بار.
شارا ارالاس فورماتتا ءوتتى، راسىمگە رف پرەزيدەنتىنىڭ ارنايى وكىلى شۆىدكوي، ءازىربايجان ەلشىسى بيۋلبيۋل وعلى جانە گۋمانيتارلىق ىنتىماقتاستىق مەملەكەتارالىق قورىنىڭ اتقارۋشى ديرەكتورى اناتوليي يكسانوۆ قاتىستى، ال لاۋرەاتتار بەينەبايلانىسقا شىققان. سىيلىقتاردىڭ تابىستالۋ راسىمىنە تمد جاستار سيمفونيالىق وركەسترى ارنايى كونسەرتتىك باعدارلاماسىن ۇسىندى.
سىيلىق لاۋرەتتارىنا ارنايى ديپلوم، قۇرمەت بەلگىسى مەن كۋالىك تابىستالادى. سىيلىقتىڭ اقشالاي بالاماسى 2 ملن رەسەي ءرۋبلىن قۇرايدى.