الماتىدا زاڭسىز قوقىس توگەتىن جەرلەر كوبەيىپ بارادى

تابيعات جاناشىرلارى الاڭداۋشىلىق ءبىلدىرىپ وتىر

مەگاپوليستىڭ ەكوبەلسەندىلەرى دابىل قاعۋدا. بۇعان عارىشتان تۇسىرىلگەن فوتوسۋرەتتەر دە دالەل. ناۋرىزباي اۋدانىنىڭ شەتىندەگى قازاندىق اۋەلدە قۇرىلىسقا قاجەتتى ماتەريال الۋ ءۇشىن قازىلعان. قايتا قالپىنا كەلتىرىلمەگەن شۇڭقىر ءقازىر قوقىس توگەتىن ورىنعا اينالعان، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

«كارەر مەن ۇيلەردىڭ اراسى بىرنەشە مەتر عانا. ال تالاپ بويىنشا مىڭ مەتر بولۋى ءتيىس. تۇرعىنداردىڭ شاعىمى وبلىسقا جىبەرىلەدى، ءبىراق ەشقانداي شارا قولدانىلمايدى. سوندىقتان ماسەلەگە ق ر ەكولوگيا، گەولوگيا جانە تابيعي رەسۋرستار مينيسترلىگى نازار اۋدارسا دەيمىز»، - دەيدى «الماتىنى قورعايمىز» قوعامدىق بىرلەستىگىنىڭ ءتورايىمى سالتانات ءتاشىموۆا.

قالادا تۇرمىستىق جانە قۇرىلىس قالدىقتارى ۇيىلگەن بىرنەشە جەر بار. عارىشتىق مونيتورينگ قىزمەتى ارقىلى ءبىر عانا مەدەۋ اۋدانىندا 9 زاڭسىز قوقىس الاڭى انىقتالعان.

«قالدىقتاردى وڭدەيمىز دەپ قازاندىق قازىپ، قوقىس قابىلدايدى. ونىڭ ىشىندە تىيىم سالىنعان ورگانيكالىق قالدىقتار دا بار. مۇنىڭ ءبارى توپىراقتى، جەراستى سۋلارىن لاستايدى. جەردى پايدالانۋ قۇقىعى دا ساقتالىپ جاتقان جوق. اشىق جاتقان قوقىستىڭ ءيىسى اۋاعا تاراپ، جاقىن جەردەگى تۇرعىنداردى ۋلايدى»، - دەيدى «قازەكولوگيا» رەسپۋبليكالىق عىلىمي-وندىرىستىك ورتالىعى باس ديرەكتورىنىڭ مىندەتىن اتقارۋشى ميراس بايسەيىتوۆ.

قالدىقتاردىڭ مەملەكەتتىك كاداسترىنا سايكەس، 2021 جىلدىڭ باسىندا قازاقستاندا 16،3 ملرد توننا قوقىس جيناقتالعان. بۇل كورسەتكىشكە زاڭسىز توگىلگەن قوقىستار كولەمى كىرمەگەن. ماماندار «جاڭا ەكولوگيالىق كودەكس بويىنشا جۇيەلى جۇمىس ىستەلگەندە عانا بۇل ماسەلە شەشىمىن تابادى» دەپ وتىر.