فرانسيا ەلشىسى اقىننىڭ ەڭبەگىن ەرەكشە اتاپ ءوتتى
بەلگىلى جازۋشى، اقىن، ديپلومات جانە قوعام قايراتكەرى، «نيەۆادا – سەمەي» قوعامدىق انتيادرولىق قوزعالىسىنىڭ نەگىزىن قالاۋشى ولجاس سۇلەيمەنوۆ «قۇرمەت لەگيونى» وردەنىمەن ماراپاتتالدى، دەپ حابارلايدى Almaty-akshamy.kz Vecher.kz-كە سىلتەمە جاساپ.
ولجاس ومارۇلىنا جوعارى ماراپاتتى فرانسيانىڭ قازاقستان رەسپۋبليكاسىنداعى ەلشىسى ديدە كانەسس مىرزا تابىس ەتتى. سالتاناتتى شاراعا قۇرمەتتى قوناق، فرانسۋز رەسپۋبليكاسىنىڭ باس كونسۋلى الەكسيس شاحتاحتينسكيي، ولجاس سۇلەيمەنوۆتىڭ وتباسى مۇشەلەرى، قازاقستاننىڭ كورنەكتى عىلىم جانە مادەنيەت قايراتكەرلەرى، قوعام مەن ب ا ق وكىلدەرى قاتىستى.
«قۇرمەتتى ولجاس اعا، بۇگىن سىزگە «قۇرمەت لەگيونى» وردەنىن تابىس ەتۋ ءۇشىن كەلگەنىمە وتە قۋانىشتىمىن. فرانسيا پرەزيدەنتى ەممانيۋەل ماكرون، «قۇرمەت لەگيونىنىڭ» ۇلتتىق وردەنىنىڭ ۇلى شەبەرى، جارلىققا 2022 جىلدىڭ 7 ناۋرىزىندا قول قويدى»، - دەدى ديدە كانەسس.
فرانسيا ەلشىسى اقىننىڭ ەڭبەگىن ەرەكشە اتاپ ءوتتى:
«ءسىز ءسوزسىز قازىرگى قازاقستان مادەنيەتىنىڭ كورنەكتى تۇلعاسىسىز: بەلگىلى اقىن، جازۋشىسىز. ءسىز سونداي-اق بەيبىتشىلىكتى ساقتاۋعا، گۋمانيتارلىق قۇندىلىقتاردى ىلگەرىلەتۋگە جانە قورشاعان ورتانى قورعاۋعا ۇلكەن ۇلەس قوستىڭىز. ءسىز «قايتا قۇرۋ» كەزەڭىنىڭ كوشباسشىلارىنىڭ ءبىرى بولدىڭىز. ءسىز قازاقستاننىڭ ەلشىسى بولدىڭىز جانە ءالى دە فرانسياداعى قازاقستاندىقتار قاۋىمداستىعىنىڭ قۇرمەتتى پرەزيدەنتى بولىپ كەلەسىز».
ال ولجاس ومار ۇلى فرانسيا پرەزيدەنتى مەن ديدە كانەسس مىرزاعا ريزاشىلىعىن ءبىلدىردى:
«مەن وسى جارلىققا قول قويعان فرانسيا پرەزيدەنتى ەممانيۋەل ماكرونعا قۇرمەت پەن العىسىمدى بىلدىرگىم كەلەدى. بۇگىن مەن جوعارى دارەجەلى وردەنمەن ماراپاتتالدىم. مەنىڭ جولداستارىم ادەتتە وردەندەرىمدى تاقپايتىنىمدى بىلەدى، ءبىراق بۇل «قۇرمەت لەگيونى» وردەنى – ەرەكشە مارتەبە. مەن ديدە كانەسس مىرزانىڭ قولىنان بۇل ماراپاتتى ۇلكەن ماقتانىشپەن جانە العىسپەن قابىلدايمىن. وسى قۇرمەت ءۇشىن العىس ايتىپ، بۇكىل فرانسياعا ساتتىلىك تىلەيمىن».