اقش باستاعان حالىقارالىق كواليسيا اسكەرى سيريادا ارنايى وپەراسيا جۇرگىزۋ ناتيجەسىندە «يسلام مەملەكەتى» (قازاقستاندا تىيىم سالىنعان – رەد.) لاڭكەستىك توبىنىڭ جوعارى شەندى جەتەكشىسىن ۇستادى، دەپ حابارلايدى Almaty-akshamy.kz قازاقپارات-قا سىلتەمە جاساپ.
كواليسيا مالىمدەمەسى بويىنشا «اينىماس شەشىم» (CJTF-OIR) دەپ اتالاتىن حالىقارالىق كواليسيا كۇشتەرى 16 ماۋسىمعا قاراعان ءتۇنى سيريانىڭ سولتۇستىگىندە ءيم-نىڭ جوعارى لاۋازىمدى جەتەكشىسىن ۇستاۋ ءۇشىن لاڭكەستىككە قارسى وپەراسيا جۇرگىزدى.
«تۇتقىنعا الىنعان ادام – تاجىريبەلى بومبا جاساۋشى جانە ءيم-نىڭ سيريالىق بولىمشەسىندەگى جوعارى باسشىلاردىڭ بىرىنە اينالعان جەدەل دەلدال»، - دەلىنگەن حابارلامادا. كواليسيا وپەراسيانىڭ ءساتتى وتكەنىن، بەيبىت تۇرعىنداردى قوسا العاندا ەشكىم زارداپ شەكپەگەنىن جاريالادى. سونداي-اق، كواليسيا كۇشتەرىنە، سونىڭ ىشىندە ۇشاقتار مەن باسقا دا مۇلىككە زيان كەلمەگەنىن مالىمدەدى. «كواليسيا كۇشتەرى تۇپكىلىكتى جويۋ ءۇشىن ءيم-نىڭ قالعان مۇشەلەرى قايدا جاسىرىنسا دا، ىزدەۋدى جالعاستىرادى»، - دەپ مالىمدەدى كواليسيا باسشىلىعى.