پرەمەر-مينيستر ولجاس بەكتەنوۆ قازاقستاندا قوسىلعان قۇن سالىعىنىڭ (ققس) مولشەرلەمەسىن ارتتىرۋ قاجەت ەكەنىن مالىمدەدى. بۇل قادام سالىق جۇيەسىن رەفورمالاۋ اياسىندا تالقىلاناتىن نەگىزگى شارالاردىڭ ءبىرى بولماق.
ۆيسە-پرەمەر سەرىك ءجۇمانعاريننىڭ ايتۋىنشا، ققس بويىنشا تىركەۋ شەگىن تومەندەتۋ دە جوسپارلانىپ وتىر. قازىرگى شەك 78 ملن تەڭگە بولسا، ونى 15 ملن تەڭگەگە دەيىن ازايتۋ ۇسىنىلۋدا.
– «قازىرگى ۋاقىتتا 2،3 ميلليون بيزنەس سۋبەكتىسىنىڭ تەك 6%-ى، ياعني 137،7 مىڭى عانا ققس تولەۋشى بولىپ تابىلادى. ال ءىس جۇزىندە ققس تولەۋشىلەر سانى نەبارى 88 مىڭ. مۇنىڭ ءبىر سەبەبى – ققس بويىنشا تىركەۋ شەگىنىڭ جوعارى بولۋى»، – دەدى جۇمانعارين.
سالىق جۇيەسىن رەفورمالاۋ جانە ققس مولشەرلەمەسىن ارتتىرۋ ماسەلەسى الداعى ۋاقىتتا پارلامەنتتە جانە ساراپشىلار اراسىندا تالقىلاناتىن بولادى. بۇل وزگەرىستەر شاعىن جانە ورتا بيزنەسكە اسەر ەتۋى مۇمكىن، سوندىقتان ۇكىمەت بارلىق تاراپتاردىڭ پىكىرىن ەسكەرۋدى كوزدەپ وتىر.