ولجاس بەكتەنوۆ قاراعاندى وبلىسىنىڭ ءبىرقاتار نەگىزگى ونەركاسىپتىك كاسىپورنىنا باردى
قازاقستان پرەمەر-مينيسترى ولجاس بەكتەنوۆ قاراعاندى وبلىسىنا جۇمىس ساپارىمەن بارىپ، ءبىرقاتار نەگىزگى وندىرىستىك كاسىپورىندى ارالادى، سونداي-اق ونەركاسىپ سەكتورىنىڭ وزەكتى ماسەلەلەرىمەن تانىستى.
ءوڭىر باسشىسى ەرماعانبەت بولەكپايەۆ ۇكىمەت باسشىسىنا وبلىس بويىنشا 61 ينۆەستيسيالىق جوبادان تۇراتىن پۋل قۇرىلعانىن ايتتى. جالپى قۇنى 1،5 ترلن تەڭگەنى قۇرايتىن جوبالار 14 مىڭنان استام جۇمىس ورنىن قۇرۋعا مۇمكىندىك بەرەدى. ولاردىڭ باسىم كوپشىلىگى تاۋ-كەن ونەركاسىبى، مەتاللۋرگيا جانە قۇرىلىس سالالارىن قامتيدى.
2024 جىلى 252 ملرد تەڭگەگە 10 ينۆەستيسيالىق جوبانى ىسكە اسىرۋ جوسپارلانىپ وتىر. اتاپ ايتقاندا، كاتودتى مىس، كرەمنيي قورىتپالارى، جەل ەنەرگەتيكاسى مۇنارالارى، مىرىشتالعان مەتالل بۇيىمدارى جانە ت.ب. شىعارۋ بويىنشا جاڭا وندىرىستەر اشىلۋى ءتيىس. ساران قالاسىندا جۇك اۆتوموبيلدەرىنىڭ ءوندىرىسى ىسكە قوسىلادى.
«سارىارقا» ارنايى ەكونوميكالىق ايماعىن ارالاۋ بارىسىندا ولجاس بەكتەنوۆ «Steel Manufacturing» پاترون زاۋىتىنىڭ جۇمىسىمەن تانىستى. بيىل ۆينتوۆكا پاتروندارى جەلىسىن ىسكە قوسۋ جۇمىستارىن اياقتاۋ جوسپارلانىپ وتىر، سونداي-اق ءتۇرلى كاليبردەگى پاترونداردىڭ سەريالىق ءوندىرىسى ىسكە قوسىلادى دەپ كۇتىلۋدە.
قازاقستاندىق پاترون زاۋىتى – قورعانىس-ونەركاسىپ كەشەنىندەگى جوعارى تەحنولوگيالىق بىردەن-بىر كاسىپورىن. مۇندا قاۋىپسىزدىك ماسەلەسىنە جانە ءوندىرىستى اۆتوماتتاندىرۋعا باسىمدىق بەرىلگەن، وندىرىستىك پروسەستىڭ بارلىعى ادامنىڭ قاتىسۋىنسىز، اۆتوماتتى تۇردە جۇزەگە اسىرىلادى. بۇعان دەيىن قازاقستاندا ءوق-دارى ءوندىرىسى بولماعان، ال ەلدىڭ قاجەتتىلىكتەرى بۇرىنعى قورلاردىڭ ەسەبىنەن جابىلىپ كەلدى نەمەسە شەتەلدەن ساتىپ الىندى.
پرەمەر-مينيستر زاۋىت وندىرىستىك قۋاتىن تولىعىمەن پايدالانىپ جۇمىس ىستەۋى كەرەك ەكەنىن، سول سەبەپتى ونى سالالىق ۆەدومستۆولاردىڭ جوسپارعا ساي تاپسىرىستارىمەن جۇكتەۋ قاجەتتىگىن اتاپ ءوتتى.
سونداي-اق ولجاس بەكتەنوۆ «قاراعاندى – بالقاش – الماتى» اۆتوجولىن رەكونسترۋكسيالاۋ بارىسى تۋرالى باياندامالاردى تىڭدادى. بۇگىنگى تاڭدا جاڭا اسفالت بويىنشا جول قوزعالىسى قامتاماسىز ەتىلگەن، اينالما جولدار تەك جول وتپەلەرى سالىنىپ جاتقان ۋچاسكەلەردە عانا قالىپ وتىر.
«قازاۆتوجول» كومپانياسىنىڭ باسشىسى دارحان يماناشيەۆتىڭ ايتۋىنشا، 11 كوپىر مەن نىسان بويىنشا جۇمىستار اياقتالىپ، بالقاش قالاسىن اينالىپ وتەتىن جەردە تەمىرجول كوپىرى ارقىلى وتپە جول سالىندى. وعان قوسا تاسجول بويىندا 18 دەمالىس الاڭى، ونىڭ ىشىندە سانيتاريالىق-گيگيەنالىق توراپتار سالىنباق. جوبانى اياقتاۋ ءۇشىن ءقازىر جول قۇرىلىسى ماتەريالدارى مەن قاجەتتى جايلاستىرۋ ەلەمەنتتەرى بەلسەندى تۇردە دايىندالىپ جاتىر.
ۇكىمەت باسشىسى بارلىق جۇمىستى جىل سوڭىنا دەيىن اياقتاۋ قاجەتتىگىن اتاپ ءوتتى. بۇل رەتتە ول قوسىمشا ارنايى تەحنيكانى ءبولۋ جانە ۇزىن-سونار كەپتەلىستەردى بولدىرماۋ ءۇشىن اۆتوجولدارداعى قار تازالاۋ شارالارىن كۇشەيتۋدى تالاپ ەتتى.
ودان كەيىن ولجاس بەكتەنوۆ Qarmet مەتاللۋرگيالىق كومبيناتىنىڭ وندىرىستىك سەحتارىنا باردى. بۇگىنگى تاڭدا كومبينات – رەسپۋبليكاداعى تولىق وندىرىستىك سيكلى بار ءىرى تاۋ-كەن جانە بولات كاسىپورىندارىنىڭ ءبىرى. ق ر پرەزيدەنتى قاسىم-جومارت توقايەۆتىڭ تاپسىرماسى بويىنشا مەملەكەت ونى ءارى قاراي دامىتۋعا قاجەتتى قولداۋ كورسەتۋدە.
ولجاس بەكتەنوۆ №3 دومنا پەشىنىڭ، تاباقشا مەتالدى يلەمدەۋ سەحىنىڭ، سونداي-اق ىستىق كۇيدە مىرىش جانە اليۋمينيي جاساۋ سەحتارىنىڭ جۇمىسىمەن تانىستى.
مۇندا پرەمەر-مينيستر مەتاللۋرگتەرمەن اڭگىمەلەستى، ونىڭ بارىسىندا كاسىبي ماماندىق مارتەبەسىن ارتتىرۋ، جالاقىنى ۇلعايتۋ، جاس مامانداردى دايارلاۋ ءۇشىن جاڭا وقۋ ورىندارىن قۇرۋ، سونداي-اق باسقا دا ءبىرقاتار ماسەلە كوتەرىلدى.
ۇكىمەت باسشىسى كوتەرىلگەن ماسەلەلەردىڭ بارلىعى جانە Qarmetء-تىڭ الداعى جۇمىسى مەملەكەتتىڭ باقىلاۋىندا بولاتىنىنا سەندىردى.
«جاڭا ينۆەستور ءوندىرىستى جاڭعىرتۋعا جانە قاۋىپسىزدىك دەڭگەيىن ارتتىرۋعا اۋقىمدى ينۆەستيسيالار سالۋ بويىنشا مىندەتتەمەلەر قابىلدادى. بۇل بوس ءسوز ەمەس، مۇنىڭ ءبارى قاعازعا قاتتالعان جانە مەملەكەتتىڭ باقىلاۋىندا بولادى. پرەزيدەنت بارلىق ءتيىستى تاپسىرمانى بەردى. كومبيناتتىڭ تىنىسى كەڭەيىپ، جاڭا ومىرگە جول اشاتىنىنا سەنىمدىمىز. بۇل – وتاندىق ونەركاسىپتىڭ ماقتانىشى. ءبىز ءوز تاراپىمىزدان باقىلاپ، جان-جاقتى قولداۋ كورسەتەتىن بولامىز»، — دەدى ولجاس بەكتەنوۆ.
سونىمەن قاتار پرەمەر-مينيستر سالالىق ۆەدومستۆولار باسشىلارىنىڭ، جاڭا ينۆەستوردىڭ، اكىمدىك وكىلدەرىنىڭ جانە كاسىپورىن قىزمەتكەرلەرىنىڭ قاتىسۋىمەن Qarmetء-تىڭ وزەكتى ماسەلەلەرىن شەشۋ جانە ودان ءارى دامىتۋ جونىندە كەڭەس وتكىزدى.
Qarmet اكسيونەرى اندرەي لاۆرەنتيەۆ 2028 جىلعا قاراي تەمىر كەنى كونسەنتراتىن شىعارۋدى 5 ملن تونناعا دەيىن ۇلعايتۋ، 9 ملن توننا كومىر جانە 5 ملن توننا بولات ءوندىرۋ جوسپارلانىپ وتىرعانىن ايتتى.
وعان قوسا ۇكىمەت باسشىسىنىڭ نازارىنا حيميا، مۇناي، قۇرىلىس جانە كەمە جاساۋ سالالارى ءۇشىن بولاتتىڭ جاڭا جانە پرەميۋم ماركالارىن شىعارۋ، جۇك تەحنيكاسىن، اۆتوبۋستاردى، اۋىل شارۋاشىلىعى تەحنيكاسىن، تەمىرجول ۆاگوندارىن جانە ت.ب. ءوندىرۋ الەۋەتى ۇسىنىلدى. اسىرەسە اۆتوموبيل جاساۋ كەزىندە پايدالانىلاتىن بولاتتىڭ جەكەلەگەن تۇرلەرىنە ەرەكشە نازار اۋدارىلماق، بۇل وتاندىق ماشينا جاساۋ ءوندىرىسىن لوكاليزاسيالاۋعا وڭ اسەر ەتەدى. جالپى الەمدىك نارىقتاعى ءونىمنىڭ جاڭا ماركالارىنا دەگەن سۇرانىس كومبيناتتىڭ ورتالىق ازيا مەن تمد مەتاللۋرگياسى كوشباسشىلارىنىڭ ءبىرى رەتىندەگى مارتەبەسىن قايتارۋعا مۇمكىندىك بەرەدى دەپ كۇتىلۋدە.
كومپانيا ءۇشىن باسىمدىققا يە تاعى ءبىر پەرسپەكتيۆالى باعىت – كومىر حيمياسى. ءپيروليزدى كونۆەرسيالاۋ تەحنولوگياسىنا سۇيەنە وتىرىپ، كومىردى پايدالى ونىمدەر مەن شيكىزات رەتىندە وڭدەۋ جوسپارلانىپ وتىر. بۇل قاراعاندى كومىر باسسەينىنىڭ قايتا تۇلەۋىنە ەلەۋلى سەرپىن بەرمەك.
بارلىق ستراتەگيالىق مىندەتكە قول جەتكىزۋ ءۇشىن ولجاس بەكتەنوۆ ۋاكىلەتتى مەملەكەتتىك ورگاندارعا كاسىپورىننىڭ وزەكتى ماسەلەلەرىن پىسىقتاۋدى تاپسىردى. اتاپ ايتقاندا، Qarmetء-تى تابيعي گازبەن قامتاماسىز ەتۋ ماسەلەسىن شەشۋ كەرەك، بۇل ءوز كەزەگىندە تەمىرتاۋ قالاسىنىڭ ەكولوگياسىن تۇبەگەيلى جاقسارتۋعا مۇمكىندىك بەرەدى.
وسى ورايدا پرەمەر-مينيستر كومپانيانىڭ ينۆەستيسيالىق جوسپارلارىن ىسكە اسىرۋدى بارىنشا جەدەلدەتۋ قاجەتتىگىن اتاپ ءوتتى، بۇل ءوز كەزەگىندە قازاقستان ەكونوميكاسىنىڭ قۇرىلىمىن وزگەرتۋگە ەلەۋلى ۇلەس قوسپاق.
Saran يندۋستريالىق ايماعىن ارالاۋ كەزىندە ۇكىمەت باسشىسى 2021 جىلى ىسكە قوسىلعان اۆتوبۋس شىعاراتىن «Qaztehna» زاۋىتىنىڭ جۇمىسىمەن تانىستى.
بۇگىنگى تاڭدا كاسىپورىندا شاعىن توراپتى قۇراستىرۋ، دانەكەرلەۋ جانە بوياۋ سەحتارى جۇمىس ىستەيدى. 2023 جىلى مۇندا 1 700-گە جۋىق اۆتوبۋس شىعارىلدى. زاۋىتتىڭ ءونىمى قازاقستاننىڭ ىشكى نارىعىنا، سونداي-اق ەاەو ەلدەرىنە جىبەرىلەدى.
سودان كەيىن ولجاس بەكتەنوۆ اۆتوموبيل شينالارىن شىعاراتىن «KamaTyresKZ» كاسىپورنىنا باردى. مۇندا كوكتەمدە سەريالىق ءوندىرىستى باستاۋ جوسپارلانىپ وتىر. ول ءۇشىن ارنايى كۋرستاردان ءبىلىم العان 500-دەن استام قىزمەتكەر بۇگىندە جۇمىسقا كىرىسۋگە دايىن، ال كاسىپورىن تولىق قۋاتىنا شىققاننان كەيىن قوسىمشا 1 000-نان استام جۇمىس ورنى اشىلماق.
جوباعا 214 ملرد تەڭگەدەن استام ينۆەستيسيا سالىندى. جوبالىق قۋاتى جىلىنا 3،5 ملن جەڭىل، جەڭىل جۇك جانە جۇك شيناسىن قۇرايدى. قازىرگى ۋاقىتتا مۇندا جابدىقتاردى مونتاجداۋ جانە ىسكە قوسۋ، رەتكە كەلتىرۋ جۇمىستارى ءجۇرىپ جاتىر.