ولجاس بەكتەنوۆ اتىراۋ وبلىسىنداعى مۇناي، گاز حيمياسىن جانە ونەركاسىپتى دامىتۋ جونىندەگى تاپسىرمالاردىڭ ورىندالۋىن تەكسەردى
اتىراۋ وبلىسىنا جۇمىس ساپارى بارىسىندا پرەمەر-مينيستر ولجاس بەكتەنوۆ ءوڭىر ونەركاسىبىنىڭ دامۋىمەن تانىسىپ، يندۋستريالدى كومپانيالار مەن مۇناي-گاز حيمياسى سەكتورىنىڭ كاسىپورىندارىنا باردى. بۇل ساپار پرەزيدەنتتىڭ تەرەڭ وڭدەۋگە كوشۋ جانە ءونىمنىڭ ىشكى قۇنىن ارتتىرۋ ارقىلى ەكسپورتتىڭ شيكىزاتتىق باعىتىنان باس تارتۋ جانە ەكونوميكانى ءارتاراپتاندىرۋ جونىندەگى تاپسىرماسىنىڭ ورىندالۋىن تەكسەرۋ ماقساتىندا ءوتتى.
اتىراۋ وبلىسى ەلىمىزدىڭ مۇناي-گاز حيمياسى سالاسىنداعى جەتەكشى ءوڭىرى بولىپ تابىلادى. مۇندا مۇناي قورىنىڭ 80%-نا دەيىن شوعىرلانعان، تەڭىز بەن قاشاعان ءىرى كەن ورىندارى ورنالاسقان. قاشاعاندا قازىرگى ۋاقىتتا جوبالىق قۋاتى جىلىنا شامامەن 1 ملرد تەكشە مەتر بولاتىن «GPC INVESTMENT» ج ش س گاز وڭدەۋ زاۋىتىن سالۋ بويىنشا ءىرى ينۆەستيسيالىق جوبا ىسكە اسىرىلۋدا.
پرەمەر-مينيسترگە شيكى گازدى قايتا وڭدەۋدىڭ ۇلتتىق باعدارلاماسى اياسىندا جۇمىس جۇرگىزىلىپ جاتقانى باياندالدى. بۇگىنگى تاڭدا قۇرىلىس-مونتاجداۋ جۇمىستارى 11%-عا اياقتالدى، بۇل رەتتە نىساننىڭ جالپى دايىندىعى 23%-عا جەتەدى. ولجاس بەكتەنوۆ QazaqGaz كومپانياسى قاتارلىق ينۆەستورلارمەن بىرلەسىپ جۇزەگە اسىرىپ جاتقان جوبانىڭ ماڭىزىن اتاپ ءوتتى. زاۋىتتى پايدالانۋعا بەرۋ ەلىمىزدىڭ وڭىرلەرىنە قوسىمشا گاز كولەمىن جىبەرۋگە مۇمكىندىك بەرەدى.
NCOC كومپانياسى قاشاعان كەن ورنىنان زاۋىتقا شيكىزاتتى تاسىمالداۋدى قامتاماسىز ەتەتىن قۇبىر سالۋ جوباسىن ىسكە اسىرۋ جونىندەگى جوسپارى تۋرالى مالىمەت بەرىلدى. بۇگىنگى تاڭدا NCOC QazaqGaz-بەن بىرلەسىپ جىلىنا 700 مىڭ تونناعا دەيىن سۇيىتىلعان كومىرسۋتەكتى گازدى نارىققا جەتكىزۋ بويىنشا جۇمىس ىستەپ جاتىر. سونىمەن بىرگە جىلىنا 1 ملرد تەكشە مەتر گاز تاسىمالداۋدى قامتاماسىز ەتەتىن قۇبىر ينفراقۇرىلىمىنىڭ قۇرىلىسىن اياقتاۋدا.
ولجاس بەكتەنوۆ «Kazakhstan Petrochemical Industries Inc.» ج ش س (KPI) پوليپروپيلەن ءوندىرۋ زاۋىتىندا بولدى. زاۋىت ىسكە قوسىلعان ساتتەن باستاپ 341،4 مىڭ توننا تۇيىرشىكتى پوليپروپيلەن ءوندىرىلدى. قازاقستاننىڭ پوليپروپيلەن نارىعىنىڭ قۇرىلىمىنداعى KPI كاسىپورنىنىڭ ۇلەسى 2022 جىلى 2%-دى قۇراسا، 2023 جىلدىڭ ەكىنشى توقسانىنا قاراي 49%-دى قۇرادى.
پرەمەر-مينيستر اتىراۋ مۇناي وڭدەۋ زاۋىتىنىڭ قازىرگى جاعدايىمەن جانە دامىتۋ جوسپارىمەن تانىستى. مۇناي ونىمدەرىنىڭ 35-كە جۋىق ءتۇرىن شىعاراتىن زاۋىتتا بيىلعى 7 ايدا شيكىزاتتى قايتا وڭدەۋ كولەمى 3،4 ملن توننانى قۇرادى. ۇكىمەت باسشىسى اۋىل شارۋاشىلىعى تاۋارىن وندىرۋشىلەرگە ديزەل وتىنىن تۇراقتى ءوندىرۋدى جانە تيەپ-جونەلتۋدى تولىق كولەمدە قامتاماسىز ەتۋدى تاپسىردى.
ءاموز-دە ەكولوگيالىق ماسەلەلەرگە ەرەكشە كوڭىل بولىنگەن. مەملەكەت باسشىسىنىڭ تاپسىرماسى بويىنشا ازىرلەنگەن «تازالىق» جوباسى شەڭبەرىندە مەحانيكالىق تازارتۋ قۇرىلىستارى مەن ءنورماتيۆتى تۇردە تازارتىلعان اعىندى سۋلارعا ارنالعان ارنانى رەكونسترۋكسيالاۋ، سونداي-اق بۋلانۋ الاڭدارىن رەكۋلتيۆاسيالاۋ كوزدەلگەن.
ۇكىمەت باسشىسى «جىگەرمۇنايسەرۆيس» زاۋىتىندا بولىپ، وڭىردەگى ماشينا جاساۋ سالاسىنىڭ دامۋ قارقىنىمەن تانىستى. زاۋىت بۇرعىلاۋ-جارۋ جۇمىستارىنا ارنالعان بۇرعىلاۋ قۇرالدارى ءوندىرىسىن ىسكە قوستى. ولجاس بەكتەنوۆ نارىقتىڭ ىشكى قاجەتتىلىگىن وتەۋ ءۇشىن ءوندىرىستى كەڭەيتىپ، قۋاتىن ارتتىرۋ كەرەگىن اتاپ ءوتتى.
پرەمەر-مينيستر ولجاس بەكتەنوۆتىڭ اتىراۋ وبلىسىنا ساپارى بارىسىندا ءوڭىردىڭ مۇناي-گاز حيمياسى جانە ونەركاسىپ سالاسىنداعى دامۋى، ەكولوگيالىق ماسەلەلەر جانە ينفراقۇرىلىمدىق جوبالار تالقىلاندى. پرەزيدەنتتىڭ تاپسىرمالارىنىڭ ورىندالۋىن قاداعالاۋ ءۇشىن ناقتى شارالار قابىلداندى.