پرەمەر-مينيستر ولجاس بەكتەنوۆتىڭ توراعالىعىمەن وتكەن كەڭەستە مەملەكەت باسشىسى قاسىم-جومارت توقايەۆتىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ ماسەلەلەرى قارالدى. اتاپ ايتقاندا، ەنەرگەتيكانى دامىتۋ جانە يادرولىق كلاستەر قۇرۋ بويىنشا ناقتى شارالار تالقىلاندى. بۇل تۋرالى Aqshamnews.kz سايتى حابارلايدى.
كەڭەس بارىسىندا 2025–2031 جىلدارعا ارنالعان ەلەكتر ەنەرگياسىنىڭ بولجامدى تەڭگەرىمى تىڭدالدى. بۇل قۇجات پرەزيدەنتتىڭ ەلەكتر ەنەرگەتيكاسى ينفراقۇرىلىمىن قارقىندى دامىتۋ جانە قاجەتتى رەزەرۆتەر قۇرۋ جونىندەگى تاپسىرماسىنا سايكەس ازىرلەنگەن. ەلەكتر ەنەرگياسىن تۇتىنۋدىڭ تۇراقتى ءوسۋىن ەسكەرە وتىرىپ، جەكە ينۆەستيسيالار ەسەبىنەن جۇمىس ىستەپ تۇرعان ەلەكتر ستانسيالارىن جاڭعىرتۋ ارقىلى 2035 جىلعا دەيىن 26،5 گۆت كولەمىندە جاڭا گەنەراسيا قۋاتىن قۇرۋ جوسپارلانۋدا.
ەنەرگەتيكا ءمينيسترى الماسادام ساتقالييەۆ قازاقستاندا ءبىرىنشى اتوم ەلەكتر ستانسياسىن (اەس) سالۋ بويىنشا الەۋەتتى جەتكىزۋشىلەرمەن جۇرگىزىلگەن كەلىسسوزدەردىڭ ناتيجەلەرى تۋرالى باياندادى. ول كەلىسسوزدەر بارىسىندا ەل ءۇشىن ەڭ ءتيىمدى تەحنولوگيالاردى تاڭداۋ ماسەلەسى باسىمدىققا يە بولعانىن اتاپ ءوتتى.
پرەمەر-مينيستر ولجاس بەكتەنوۆ اەس سالۋ كەزىندە ەكونوميكالىق تيىمدىلىكتى بارىنشا قامتاماسىز ەتۋدىڭ ماڭىزدىلىعىن اتاپ ءوتتى. جەتكىزۋشىنى تاڭداۋدا ءوندىرىستى جەرگىلىكتى دەڭگەيدە دامىتۋ، تەحنولوگيا ترانسفەرتى مەن ەل ىشىندەگى قۇندىلىقتى ارتتىرۋعا ەرەكشە نازار اۋدارۋ قاجەتتىگىن تاپسىردى.
سونىمەن قاتار، اتوم عىلىمىن دامىتۋ، سالا ماماندارىن دايارلاۋ جانە ءبىلىم بەرۋ باعدارلامالارىن جەتىلدىرۋ ماسەلەلەرى دە قارالدى. بۇل باعىتتا «قازاقستان اتوم ەلەكتر ستانسيالارى» ج ش س باسشىسى تيمۋر جانتيكين، ۇلتتىق يادرولىق ورتالىقتىڭ باسشىسى ەرلان باتىربەكوۆ جانە يادرولىق فيزيكا ينستيتۋتىنىڭ باسشىسى سايابەك ساحييەۆ وزدەرىنىڭ ساراپتامالىق پىكىرلەرىمەن ءبولىستى.
كەڭەس قورىتىندىسىندا پرەمەر-مينيستر اتوم ەنەرگەتيكاسىن دامىتۋ بويىنشا ناقتى تاپسىرمالار بەرىپ، سالاداعى جوبالاردى ءتيىمدى ىسكە اسىرۋ ءۇشىن ۆەدومستۆولار اراسىنداعى ۇيلەسىمدى جۇمىستىڭ ماڭىزدىلىعىن ەرەكشە اتاپ ءوتتى.