قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆ الماتىدا وتكەن ەۋرازيالىق ۇكىمەتارالىق كەڭەس (ەۇاك) وتىرىسىندا ەۋرازيالىق ەكونوميكالىق وداق (ەاەو) ەلدەرى ۇكىمەتتەرىنىڭ باسشىلارىمەن ءوزارا ىنتىماقتاستىقتى نىعايتۋ ماسەلەلەرىن تالقىلادى. جيىندا كەدەرگىسىز ساۋدا، قولايلى بيزنەس-ورتا قالىپتاستىرۋ جانە ءتۋريزمدى دامىتۋ ماسەلەلەرى قارالدى، دەپ حابارلايدى aqshamnews.kz
وتىرىسقا ەاەو ەلدەرىنىڭ جوعارى لاۋازىمدى وكىلدەرى، ونىڭ ىشىندە بەلارۋس، قىرعىزستان، رەسەي، ارمەنيا، يران، وزبەكستان جانە ازەربايجان ۇكىمەت باسشىلارى، سونداي-اق ەۋرازيالىق ەكونوميكالىق كوميسسيانىڭ (ەەك) ءتوراعاسى باقىتجان ساعىنتايەۆ قاتىستى.ولجاس بەكتەنوۆ ءوز سوزىندە ەاەو اياسىنداعى ساۋدا قاتىناستارى مەن ەكونوميكالىق ينتەگراسيانىڭ ماڭىزدىلىعىنا توقتالدى.
«قازاقستان پرەزيدەنتى قاسىم-جومارت توقايەۆ ەۋرازيالىق ەكونوميكالىق وداقتىڭ ەكونوميكالىق ينتەگراسيا جانە ءوزارا ساۋدانى دامىتۋ الاڭى رەتىندەگى تيىمدىلىگىن اتاپ ءوتتى. بۇگىندە سىرتقى وزگەرىستەرگە يكەمدى بەيىمدەلۋ مۇمكىندىگى – ەكونوميكالىق باسەكەگە قابىلەتتىلىكتىڭ باستى فاكتورى»، – دەدى ق ر پرەمەر-مينيسترى.
قازاقستان تاراپى ساۋدا قاتىناستارىنداعى كەدەرگىلەردى جويۋ جانە رەتتەۋشى ورتاداعى كەمشىلىكتەردى جويۋعا باسىمدىق بەردى. سونىمەن قاتار، ەاەو ەلدەرى اراسىنداعى بيزنەستى دامىتۋ ءۇشىن حالىقارالىق شارتتارعا ناقتى اسەردى باعالاۋ مەحانيزمىن كەڭەيتۋ ۇسىنىلدى.
جيىندا ەاەو ەلدەرى اراسىنداعى ءتۋريزمدى دامىتۋ ماسەلەسى دە كوتەرىلدى. وداق ەلدەرىندەگى تانىمال تۋريستىك باعىتتار مەن كورىكتى جەرلەر تۋرالى ءبىرىڭعاي اقپاراتتىق پلاتفورما قۇرۋ باستاماسى ۇسىنىلدى.
وتىرىس سوڭىندا ەاەو ەلدەرىنىڭ ەكونوميكالىق الەۋەتىن نىعايتۋعا، كاسىپكەرلىك احۋالدى جاقسارتۋعا جانە بىرلەسكەن جوبالاردى جۇزەگە اسىرۋعا باعىتتالعان ءبىرقاتار ماڭىزدى قۇجاتتارعا قول قويىلدى.