التى عىلىمي-زەرتتەۋ ينستيتۋتى مەن ءبىرقاتار جوعارى وقۋ ورىندارىنىڭ 50 عالىمى جەڭىمپاز اتاندى.
بۇگىن ەلوردادا «ۇزدىك عىلىمي قىزمەتكەر-2021» بايقاۋىنىڭ جەڭىمپازدارىن ماراپاتتاۋ ءراسىمى ءوتتى، دەپ حابارلايدى Almaty-akshamy.kz
بايقاۋ جەڭىمپازدارى 6 ميلليون تەڭگە كولەمىندە اقشالاي سىيلىقاقى الدى.
بۇل بايقاۋ العاش رەت وتكىزىلىپ وتىر. التى عىلىمي-زەرتتەۋ ينستيتۋتى مەن ءبىرقاتار جوعارى وقۋ ورىندارىنىڭ 50 عالىمى جەڭىمپاز اتاندى. لاۋرەاتتارعا توسبەلگىلەر مەن سەرتيفيكاتتاردى ق ر ءبىلىم جانە عىلىم ءمينيسترى اسحات ايماعامبەتوۆ تابىستادى.
«بيىلدان باستاپ وتاندىق عىلىم سالاسى دامۋىنىڭ جاڭا كەزەڭى باستالدى. 3 مىڭعا جۋىق عالىم جوباسىنا گرانت ۇتقانىنا نەمەسە ۇتپاعانىنا قاراماستان، تۇراقتى تۇردە جالاقى الاتىن بولادى. تۇراقتى قارجىلاندىرۋ زەرتتەۋلەردى كەدەرگىسىز جۇرگىزۋگە مۇمكىندىك بەرەدى. سونداي-اق گرانتتىق جانە ماقساتتى قارجىلاندىرۋ مەحانيزمىن وزگەرتتىك. سوڭعى جىلدارى عىلىم سالاسىن قارجىلاندىرۋ ەكى ەسە ءوستى. پرەزيدەنتتىڭ تاپسىرماسىنىڭ اياسىندا وسى جاڭاشىلدىقتاردى بەكىتكەن زاڭ قابىلداندى»، - دەدى مينيستر.
ا. ايماعامبەتوۆ پرەزيدەنتتىڭ قولداۋىنىڭ ارقاسىندا عىلىم سالاسىندا زاڭنامالار جەتىلدىرىلىپ، قارجىلاندىرۋ ەكى ەسە وسكەنىن ايتتى. جاس عالىمدارعا جان-جاقتى قولداۋ كورسەتىلىپ، ۇلتتىق عىلىمي-زەرتتەۋ ينستيتۋتتارىنىڭ ماتەريالدى-تەحنيكالىق بازاسى جاڭارتىلىپ جاتىر. سونداي-اق عالىمدار جەتەكشى عىلىمي ورتالىقتارعا تاجىريبەدەن وتۋگە جىبەرىلەدى، عىلىم سالاسىنداعى بيۋروكراتيانى توقتاتۋ بويىنشا جۇمىس جۇرگىزىلىپ جاتىر.
«ءبىز ءۇشىن بارلىق پروسەدۋرالاردىڭ اشىقتىعىن قامتاماسىز ەتۋ ماڭىزدى. عىلىم سالاسىنىڭ دامۋىنا ۇلەس قوسقان عالىمداردى جەڭىستەرىمەن شىن جۇرەكتەن قۇتتىقتايمىن. قىزمەتتەرىڭىزگە تابىس تىلەيمىن!» – دەدى ءبىلىم جانە عىلىم ءمينيسترى.
ايتا كەتەيىك، بايقاۋعا وتىنىمدەر ارنايى قۇرىلعان اقپاراتتىق پلاتفورمادا قابىلداندى. قۇجاتتاردى تەكسەرۋ كوميسسياسىنىڭ قۇرامىنا ساراپشىلار، عالىمدار، عىلىم اكادەمياسىنىڭ وكىلدەرى، جاس عالىمدار كەڭەسى جانە جاس عالىمدار اليانسى مۇشەلەرى، عىلىمي ۇيىمداردىڭ مۇشەلەرى ەندى.