وليمپيادا ويىندارى 23 شىلدە مەن 8 تامىز ارالىعىندا وتەدى، دەپ جوسپارلانعان.
وليمپيادا الاۋىنىڭ ەستافەتاسىن تاپسىرۋ ءراسىمى جۇما كۇنى توكيودا ءوتتى، دەپ حابارلايدى Almaty-akshamy.kz Interfax.ru سايتىنا سىلتەمە جاساپ.
«كومادزاۆا» وليمپيادالىق ساياباعىندا ارنايى شاقىرىلعان ءجۇز قوناقتىڭ قاتىسۋىمەن توكيو اكىمى يۋريكو كويكە وليمپيادا شامىن الدى.
ءبىر كۇن بۇرىن كويكە جانكۇيەرلەردىڭ ويىندارعا بارۋىنا تىيىم سالىنعانىنا رەنجىگەنىن جەتكىزگەن بولاتىن. الايدا ۇيىمداستىرۋشىلار مۇنداي قادامعا جاپونيادا كوروناۆيرۋستىق ينفەكسيا مەن اۋرۋ سانىنىڭ ارتۋىنا بايلانىستى بارعانىن تۇسىندىرگەن.
بۇعان دەيىن جاپونيا بيلىگى COVID-19 تارالۋىنا بايلانىستى 12 شىلدە مەن 22 تامىز ارالىعىندا جاريالانعان توتەنشە جاعدايعا بايلانىستى جازعى وليمپيادا ويىندارىنا كورەرمەندەردى جىبەرمەۋ تۋرالى شەشىم قابىلداعان بولاتىن.
وليمپياداعا ارنالعان جارىستاردىڭ كوپ بولىگى توكيودا وتەدى، الايدا جارىستاردىڭ كەي تۇرلەرى جاپونيا استاناسىنان تىس جەرلەردە ۇيىمداستىرىلادى. كورەرمەندەردىڭ قاۋىپسىزدىگىنە ارنالعان شارالارعا قاتىستى شەشىمدى ويىن ۇيىمداستىرۋشىلارى جەرگىلىكتى بيلىك وكىلدەرىمەن جۇرگىزگەن كەلىسسوزدەردەن كەيىن قابىلدايتىن بولادى.