الماتىدا جىل باسىنان بەرى جاسوسپىرىمدەر اراسىنداعى قىلمىس 11،6%-عا تومەندەدى.
الماتىدا كامەلەتكە تولماعان بالالاردىڭ قۇقىقتارىن قورعاۋ جونىندەگى قالالىق كوميسسيانىڭ وتىرىسى ءوتتى، دەپ حابارلايدى Almaty-akshamy.kz
الماتى قالاسى اكىمىنىڭ ورىنباسارى ەرجان باباقۇماروۆتىڭ توراعالىعىمەن جانە الماتى قالاسى پروكۋرورىنىڭ كومەكشىسى ع. جانبەكوۆانىڭ قاتىسۋىمەن ونلاين فورماتتا كامەلەتكە تولماعانداردىڭ ءىسى مەن ولاردىڭ قۇقىعىن قورعاۋ جونىندەگى قالالىق ۆەدومستۆوارالىق كوميسسيانىڭ وتىرىسى ءوتتى.
وتىرىستا كامەلەتكە تولماعان جاسوسپىرىمدەرگە قاتىستى قىلمىس پەن قۇقىق بۇزۋشىلىق قارالدى. يۋۆەنالدى پوليسيانىڭ دەرەگى بويىنشا، 6 ايدىڭ ىشىندە جاسوسپىرىمدەر اراسىنداعى قىلمىستىڭ 11،6%-عا تومەندەگەنى بايقالدى. جۇرگىزىلگەن تالداۋعا سايكەس، جاسالعان قۇقىق بۇزۋشىلىقتىڭ 40%-ى قالاعا باسقا وڭىرلەردەن كەلگەن ادامدارعا قاتىستى ەكەنى انىقتالدى.
جاسوسپىرىمدەر ومىرلىك قيىن جاعدايعا تاپ بولعان بالالاردى قولداۋ ورتالىعىنا جىبەرىلەدى. سونداي-اق، كامەلەتكە تولماعاندارعا قاتىستى جاسالعان قىلمىستاردىڭ سانى 20%-عا تومەندەگەن. كامەلەتكە تولماعانداردىڭ ويىن-ساۋىق مەكەمەلەرىندە (ساعات 22.00-دەن كەيىن) جانە تۇرعىن ءۇي-جايلاردان تىس (ساعات 23.00-دەن كەيىن) تۇنگى ۋاقىتتا زاڭدى وكىلدەرىنىڭ بولماۋىنان 3573 (2020ج. – 3018) اتا-انا اكىمشىلىك جاۋاپكەرشىلىككە تارتىلدى.
سونىمەن قاتار، الاتاۋ اۋدانى اكىمدىگى جانىنداعى قىلمىستىڭ الدىن الۋ جونىندەگى كوميسسيا ءتوراعاسىنىڭ ەسەبى تىڭدالدى. اتاپ ايتقاندا، تاۋەكەل توبىنداعى وتباسىلارمەن جانە كامەلەتكە تولماعاندار اراسىندا قىلمىسقا جول بەرمەۋ ءۇشىن الدىن الۋ ءىس-شارالارىن قاراستىردى. باسقا دا اۋداندىق كوميسسيالاردىڭ ءتوراعالارى دا كەستەگە سايكەس تىڭدالادى. ايتا كەتسەك، جارتى جىلدىڭ ىشىندە اۋداندىق كوميسسيا وتىرىستارىندا كامەلەتكە تولماعانداردىڭ مۇددەسى ءۇشىن ءتۇرلى فاكتىلەر بويىنشا 197 ماتەريال قارالدى.
ەرجان باباقۇماروۆ قالا اۋماعىندا ورنالاسقان كوللەدج وقۋشىلارى جاساعان قىلمىستىق فاكتىلەرگە نازار اۋداردى. وسى باعىتتا كوللەدج، جالپى ورتا ءبىلىم بەرۋ مەكەمەلەرىنىڭ وقۋشىلارىمەن جانە باسشىلىعىمەن تۇسىندىرمە جۇمىستارىن جۇرگىزۋ، سونداي-اق جاسوسپىرىمدەردى وقۋدان تىس ۋاقىتتا جۇمىسپەن قامتۋدى ۇيىمداستىرۋ تاپسىرىلدى.
سونداي-اق، ءومىرى مەن بولاشاعى الاڭداۋشىلىق تۋدىراتىن بالالارى بار وتباسىلارعا العاشقى جىلى مەديسينالىق-الەۋمەتتىك تۇرعىدان قولداۋ كورسەتۋ جانە سىرتقى فاكتورلاردىڭ اسەرىنەن بولاتىن ءسابي ءولىمىنىڭ الدىن الۋ ماسەلەسى ۇنەمى باقىلاۋدا.