1 شىلدە - ۇلتتىق دومبىرا كۇنى. اتاۋلى كۇن 2018 جىلدان بەرى كەڭىنەن تانىلىپ كەلەدى.
بۇل كۇن قازاقتىڭ مادەني كودى سانالعان قوس ىشەكتى، شەرتىپ وينايتىن اسپاپقا دەگەن قۇرمەتتىڭ بەلگىسى. دومبىرا - جاي عانا مۋزىكا قۇرالى عانا ەمەس، ول - ۇلتتىڭ رۋحى، تاريحى مەن تاعدىرىن سويلەتكەن كيەلى مۇرا. وسى كۇنى زاماناۋي مۋزىكانى ۇلتتىق اسپاپپەن شەبەر ۇشتاستىرىپ جۇرگەن، دومبىرا ارقىلى جاس ۇرپاققا شابىت بەرىپ كەلە جاتقان جاندار كوپ. ءتىپتى "ناعىز قازاق - قازاق ەمەس، ناعىز قازاق - دومبىرا" دەگەن سوزگە لايىق ەكەنىنە دالەل بولار جاندار جەتكىلىكتى.
بۇگىن وسى ونەردى دارىپتەپ جۇرگەن ەرەكشە تۇلعا، ەسترادا ءارتىسى، كوپ اسپاپتى مەڭگەرگەن مۋزىكانت ولەگ نيكيتيننىڭ شىعارماشىلىعىنا ءۇڭىلىپ كوردىك.
دومبىرا - مەنىڭ العاشقى "ماحابباتىم"
ولەگ نيكيتين كۇنىنە كەم دەگەندە 1،5-2 ساعاتىن دومبىرا تارتۋعا ارنايدى ەكەن. سەبەبى بۇل اسپاپ ونىڭ جۇرەگىنىڭ تورىنەن ورىن العان. ونەردەگى سەنىمدى سەرىگى - دومبىرا ءومىرىنىڭ 80 %-دا جانىنان تابىلعان، سوندىقتان ونى ەرەكشە قۇرمەتتەيدى. ولەگ نيكيتين — زاماناۋي دومبىراشى، الەمدىك حيتتەردى قازاقتىڭ باس اسپابى - دومبىرامەن ورىنداپ جۇرگەن ەرەكشە ونەر يەسى
ولەگ دومبىرانى تەك كۇي تارتاتىن اسپاپ ەمەس، مۋزىكانىڭ كەز كەلگەن تۇرىنە بەيىمدەۋگە بولاتىنىن دالەلدەپ جۇرگەن تالانتتى مۋزىكانت، ءارى ەسترادا ءارتىسى.
دومبىرامەن اجىراماس 30 جىل
جاسى 37-گە كەلگەن ولەگ نيكيتين دومبىرانى 7 جاسىنان بەرى كاسىبي تۇردە مەڭگەرىپ كەلەدى. سودان بەرى بۇل اسپاپ ونىڭ ءومىرىنىڭ اجىراماس بولىگىنە اينالدى. قوس ىشەكتى اسپاپتىڭ مۇمكىندىگىن بارىنشا اشىپ، ونى بەتحوۆەننەن باستاپ قازىرگى زامانعى حيپ-حوپقا دەيىن جەتكىزگەن.
— دومبىرامەن العاش اقتاۋدا تانىستىم. ول جاقتا دومبىرا ءار ۇيدە بار دەسە بولادى. ءبىراق مەنىڭ شىن قىزىعۋشىلىعىم اقتوبەگە كوشكەن سوڭ وياندى. بىردە قالاعا كەلگەن قۇرمانعازى اتىنداعى وركەستردىڭ كونسەرتىنە بارىپ، اسەرلەنىپ شىققان سوڭ، اتا-انامنان مۋزىكالىق مەكتەپكە بەرۋلەرىن ءوتىندىم، — دەيدى مۋزىكانت.
دومبىرادان بولەك، ولەگ گيتارا، فورتەپيانو، بايان، ساكسوفون، سونداي-اق سىبىزعى، سازسىرناي، شاڭقوبىز سياقتى حالىق اسپاپتارىندا دا جاقسى وينايدى. مۋزىكاعا جان-تانىمەن بەرىلگەن ول — كاسىبي دەڭگەيدە وينايتىن امبەباپ مۋزىكانت.
SuperStar.kz - ساحناعا جول سالعان جوبا
ولەگتىڭ ۇلكەن ساحناعا شىعۋىنا تۇرتكى بولعان — SuperStar.kz جوباسى. 2007 جىلى وتكەن بايقاۋعا ەلىمىزدىڭ تۇكپىر-تۇكپىرىنەن 14 مىڭنان استام ادام قاتىسقان. كوپتىڭ اراسىنان ونەرىمەن كوزگە تۇسكەن ولەگ ۇزدىك وندىققا ەنگەن.
— ول كەزدە مەن نەبارى 17 جاستا ەدىم. فينالعا جەتكەنىم وزىمە دە، ونەرىمە دە ۇلكەن سەرپىن بەردى، — دەيدى ول.
SuperStar.kz جوباسىنان كەيىن ول رەسپۋبليكانىڭ بارلىق ايماعىن ارالاپ، 6 مىڭنان استام مەكتەپ پەن 1،5 مىڭداي بالالار ۇيىندە كونسەرت بەرگەن. بىرنەشە حالىقارالىق بايقاۋلاردىڭ جەڭىمپازى. مۋزىكامەن قاتار جەكە ومىردە دە ەرتە ەسەيگەن: 18 جاسىندا ۇيلەنىپ، 20 جاسىندا اكە اتانعان. ءقازىر ءۇش قىزدىڭ اكەسى.
دومبىرامەن بەتحوۆەندى ورىنداۋعا بولادى
ءقازىر ولەگ — الماتى قالالىق پوليسيا دەپارتامەنتىنىڭ مەملەكەتتىك وركەسترىندە سوليست. سونىمەن قاتار «Rolex BAND» توبىنىڭ مۇشەسى. بۇل توپتا دومبىرا، گيتارا، كلاۆيشتىك اسپاپتار قاتار ورىندالادى. رەپەرتۋارلارى كەڭ اۋقىمدى: كەڭەس ءداۋىرىنىڭ اندەرىنەن باستاپ، قازىرگى زامانعى ەستراداعا دەيىن بار.
ولەگ نيكيتيننىڭ باستى ماقساتى — دومبىرانىڭ مۇمكىندىگىن كەڭىنەن تانىتۋ. سول سەبەپتى دە ول الەمدىك جانە زاماناۋي حيتتەرگە دومبىرامەن كاۆەرلەر جاساپ ءجۇر.
— ادامدار تانىس اۋەندەردى دومبىرامەن تىڭداعاندا تاڭعالادى. اسىرەسە بالالار. TikTok پەن YouTube-تا ميلليونداعان قارالىم جيناپ جاتقان كاۆەرلەردەن كەيىن اتا-انالار بالالارىن دومبىرا ۇيىرمەلەرىنە جازىپ جاتىر. بۇل مەن ءۇشىن ۇلكەن ماقتانىش، — دەيدى ولەگ.
«جاساي بەر، قازاق!» جانە وتان انا
مۋزىكانتتىڭ رەپەرتۋارىندا حالىق كۇيلەرىمەن قاتار، ەسكەندىر حاسانعالييەۆتىڭ «جاساي بەر، قازاق!»، باتىرحان شۇكەنوۆتىڭ «وتان انا» سەكىلدى شىعارمالارى دا بار.
— كەز كەلگەن ۇلكەن شارانى كۇيمەن اشىپ، «جاساي بەر، قازاق!» انىمەن جابامىن. بۇل — مەنىڭ ونەرىمدەگى باستى سيمۆولدارىم، — دەيدى ول.
ارمان – دومبىرانى الەمگە تانىتۋ
ءقازىر ولەگ نيكيتين — ەسترادا ءارتىسى عانا ەمەس، قازاقستاندا دومبىرانى جاڭا دەڭگەيدە ناسيحاتتاپ جۇرگەن بەلگىلى ازاماتتاردىڭ ءبىرى. ونىڭ ۇلتتىق دومبىرا كۇنىنە وراي تۇسىرگەن بەينەبايانى دا بار. قازاق جانە ورىس تىلىندە بىرنەشە اندەرى دە بار. قازاقتىڭ كۇيلەرىن دە كۇمبىرلەتە اسقان شەبەرلىكپەن ورىنداپ ءجۇر.
— مەندە ءبارى اسىقپاي، رەتىمەن جۇرەدى. باسقالار ءبىر جىلدا جاساپ ۇلگەرەتىن دۇنيەلەر ءۇشىن مەن ون جىل جۇمساۋىم مۇمكىن. ءبىراق شىن نيەتپەن جاسالعان ونەر ەشقاشان ۇمىت قالمايدى، — دەيدى ولەگ.
«كاسىبي دومبىراشى رەتىندە مەن ءۇشىن ۇلتتىق دومبىرا كۇنىنىڭ ماڭىزى زور. بۇل كۇندى ءوزىمنىڭ مەرەكەم رەتىندە سەزىنەمىن جانە ەرەكشە قۋانىشقا بولەنەمىن. وسى كۇنى ەل بويىنشا مىڭداعان دومبىراشى باس قوسىپ، اۋقىمدى كونسەرتتەرگە قاتىسادى. دومبىراعا ەرەكشە قۇرمەت كورسەتىلەدى. ۇلتتىق رۋح ويانىپ، ەرەكشە كۇيگە بولەنەمىن»، - دەپ قورىتتى ول بۇگىنگى ۇلتتىق مەرەكەنىڭ ءمان-ماڭىزى جايلى ويىن.
ولەگ نيكيتيننىڭ ونەر جولى — دومبىرانىڭ شەكسىز مۇمكىندىگىن دالەلدەيتىن جارقىن مىسال. ۇلتتىق اسپاپتى جاڭا قىرىنان تانىپ، بۇگىنگى ۇرپاقپەن ۇندەستىرگىسى كەلەتىن ءار مۋزىكانت ءۇشىن شابىت كوزى. ولەگ سىندى مۋزىكانتتاردىڭ ەڭبەگى - ۇلتتىڭ مادەني مۇراسىن ساقتاپ قانا قويماي، ونى جاڭا بۋىنمەن بايلانىستىرۋ جولىندا ماڭىزدى قادام. دومبىرا - حالىقتىڭ شەجىرەسى ىسپەتتى، سەبەبى وندا بۇگىنگى كۇننىڭ دە، بولاشاقتىڭ دا ءۇنى بار.