اكە جايلى جىلى ەستەلىك...
وتان قورعاۋشىلار كۇنى ءبىزدىڭ وتباسىمىز ءۇشىن ءارقاشان ورنى ەرەكشە مەرەكە بولاتىن، ءالى دە سولاي. بۇل كۇنى ءبىز بۇكىل وتباسىمىزبەن جينالىپ، ۇلكەن اق داستارحان باسىندا باس قوسامىز. ءدال وسى مەرەكەنى اتاپ ءوتۋ ءداستۇرىن بىزگە اكەمىز ۇيرەتىپ، ءسىڭدىردى. ءتىپتى ءوزىنىڭ تۋعان كۇنى ول ءۇشىن قاتارداعى قاراپايىم كۇندەردىڭ ءبىرى بولاتىن جانە وعان ءدال بۇگىنگى كۇن سياقتى اسا ءمان بەرە قويمايتىن. اكەم وتە پاتريوت ادام ەدى جانە ءبارىمىزدى سونداي بولۋعا ۇيرەتتى. وكىنىشكە قاراي، ءقازىر ءوزى ورتامىزدا جوق، ءبىراق ءوزى ۇيرەتىپ كەتكەن ءداستۇر قالدى.
ءۇش بالاسىنىڭ ىشىندە ەكى ۇلى اكە جولىن قۋىپ، ءوزى سياقتى وفيسەر بولادى دەگەن ءۇمىتى دە جوق ەمەس ەدى. الايدا، حالىق اراسىندا قىزدار اكەسىنە كوبىرەك ۇقسايدى دەپ بەكەر ايتپايتىن بولار. قىز بالاسى اكەگە جاقىنىراق بولادى. اكەلەرى دە قىزدارىنا كەلگەندە مەيىرىمدىرەك. ءارى قىزدار اكەنى قورعانى ەكەنىن سەزىنىپ، ونىڭ پاناسىندا وزدەرىن ەركىن سەزىنەدى. مەن دە اكەمدى وزىمە ءپىر ساناپ، سوعان قاراي بوي تۇزەۋگە تىرىستىم. وتباسىنداعى جالعىز قىز بولعاننان كەيىن، مەنى بارىنشا ەركە قىلىپ ءوسىردى، بەتىمنەن قاقپاعاسىن، باتىلداۋ بولىپ ءوستىم. اكەمنىڭ جۇمىستان شارشاپ كەلگەنىنە قاراماي، الدىنا وتىرىپ الىپ، بالالىقپەن ونىڭ كۇنىمەن نە ىستەگەنىن، قايدا بولعانىن سۇراپ قويمايتىنمىن.
اكەم كۇلىمسىرەگەن كۇيى كۇنى بويى قىلمىسكەرلەردى قولعا تۇسىرگەنىن، قاراپايىم بەيبىت جانداردىڭ تىنىش ۇيقىسى ءۇشىن ءقاۋىپتى قىلمىسكەرلەردى قۋعانىن ايتاتىن. سول اڭگىمەلەردى ايتىپ وتىرعاندا ول قىزىنىڭ ءوز ويىندا اكەسىنىڭ باتىرلىعىنىڭ بەينەسىن سالىپ، ونىڭ ءار سوزىنەن جۇرگەنىنەن وتكىزىپ جاتقانىنان مۇلدە بەيحابار بولعان شىعار.
اكەمنىڭ ەرلىگىنە سۇيسىنگەن مەن سول كەزدە-اق اكەم سياقتى بولامىن دەپ شەشكەن بولاتىنمىن. تۋرا اكەم سياقتى ەرجۇرەك ءارى باتىل وفيسەر بولامىن دەپ. بۇل شەشىمىم جايلى مەن وعان 10 جاسىمدا ايتتىم. ول كەزدە اكەم مەنى قولدادى. 10-11-سىنىپتاردا مەن ميليسيا مەكتەبىن ءبىتىردىم. اكەمدى مەنىڭ وزىمە دەگەن سەنىمدىلىگىم مەن شەشىم قابىلداعىش قاسيەتىم قىزىق بولعان سياقتى. ول مەن مەكتەپ اياقتاعانشا ويى وزگەرىپ، وزىنە ساي «قىزدارعا ساي» ماماندىق تاڭدايدى دەپ سەندى. مەنىڭ ءوز شەشىمنەن قايتپايتىنىمدى بىلە تۇرا، وتباسىمىزدىڭ ءبارى، الدىمەن اكەم مەنىڭ ماماندىعىما قارسى بولدى. اكەم مەنىڭ ينجەنەر ەكولوگ وقۋىنا تۇسكەنىمدى قالادى. ۋنيۆەرسيتەتتى ەكولوگ ماماندىعىنا ءتامامداعاننان كەيىن، مەن سول ديپلومدى اكەلىپ، اكەمنىڭ قولىنا ۇستاتتىم. ال ءوزىم بولسام اكەمنەن جاسىرىپ، ەكىنشى جوعارى ءبىلىم – زاڭگەرلىككە ءتۇستىم.
زاڭ فاكۋلتەتىندە وقىپ ءجۇرىپ، مەن اتىراۋ وبلىسىنىڭ قاجد-نە جۇمىسۇا ورنالاستىم. ۇيگە اسكەري كيىم كيىپ، جىلتىراعان بەرس ەتىك كيىپ كەلگەن كەزدە اكەمنىڭ تاڭ قالا قاراعان ءتۇرى ءالى كوز الدىمدا. ءبارى مەنىڭ بالا كەزىمدە اكەم ايتىپ بەرگەن، سيپاتتاعان بەينە بولاتىن. سوندا اكەم ۇندەمەي مەنى قۇشاقتادى دا، باتاسىن بەردى.
وفيسەرلىك قىزمەتتى ابىرويمەن اتقارىپ جۇرگەنىمە 10 جىل بولدى. ءار تاڭدا جۇمىسقا باراردا ءبىر جارىم جاستاعى قىزىم مەنى باقىلاپ وتىرادى. ول دا ءبىر كەزدەگى مەن سياقتى پوگونىمداعى جۇلدىزدارعا قىزىعادى. مەنىڭ كامۋفلياجىم مەن فۋراجكامدى كيگىسى كەلەدى.
كوپتەگەن جىلدار وتكەن سوڭ، مەنىڭ ەڭ ىزگى ارمانىم - تولەگەنوۆتار اۋلەتىنىڭ اسكەري ىستەگى قىزمەتىن جالعاستىرۋ جانە ونى ابىروي مەن قادىر-قاسيەتىن جوعالتپاي جوعارى كوتەرىپ الىپ ءجۇرۋ. مەن ءوز جۇمىسىمدى جاقسى كورەمىن جانە قىزمەت ەر ادامدىكى نەمەسە ايەلدىكى دەپ بولىنبەيدى دەپ سانايمىن. ەڭ باستىسى - وتان الدىنداعى بورىشىن ورىنداۋعا دەگەن قۇلشىنىس پەن ۇمتىلىس.
اكەم 2014 جىلى 59 جاسىندا ءومىردىن ءوتتى. مەن اكەمنىڭ مەنى تۇسكى ءۇزىلىس كەزىندە اتتراكسيوندار ساياباعىنا اپارعانىن ءجيى ەسكە الامىن. ويتكەنى كەشكە ول ءارقاشان جۇمىستان بوسامايتىن. ال كارۋسەلدەر ءوز جۇمىسىن تەك كەشكى ۋاقىتتا باستايتىن، ال اكەم يەسىنەن ولاردى ءبىر مەن ءۇشىن ىسكە قوسۋدى سۇراپ بەرگەن بولاتىن. مەن سول كۇنى كارۋسەلدە كوپ اينالدىم جانە قۋانىشتان بال-بۇل جانعان ءجۇزىمدى تومەندە اكەم مەيىرىممەن قاراپ تۇردى. مەنىڭ باسىمداعى بانتىمدى بەتىمە ەسكەن جەل جەلپىدى. ءقازىر جانىم ەرەكشە قۇلازىپ، مۇڭايعاندا، ءدال سول ءساتتى، اكەمنىڭ باقىتتى ءجۇزىن ەسىمە الامىن. قۇددى اكەم ءقازىر دە مەنى باقىلاپ تۇرعانداي. بۇل ماعان ءارقاشان جاڭا كۇش بەرەدى، مەن ويىمدا ونىمەن تىلدەسىپ: «ءبارى جاقسى، اكە! ويتكەنى مەن سەنىڭ قىزىڭمىن عوي. وفيسەردىڭ قىزى!» دەيمىن.
بارشا قازاقستاندىقتاردى مەرەكەمەن قۇتتىقتايمىن! ەلىمىزگە بەيبىتشىلىك پەن وركەندەۋ تىلەيمىن. ءبىزدىڭ بالالارىمىزدىڭ كۇلكىسى الاڭسىز بولسىن!