دەنساۋلىق ساقتاۋ سالاسىندا 34 جىلدان بەرى ابىرويلى قىزمەت ەتىپ كەلە جاتقان كاسىبي دارىگەر راۋيا مامىلەنوۆا الماتى قالالىق پسيحيكالىق ساۋىقتىرۋ ورتالىعىندا تەراپيەۆت. ول جۇمىسى بارىسىنداعى وقيعالاردى اڭگىمەلەگەندە داۋىسى جارقىن ەستىلىپ، جانارىنان كاسىبىنە دەگەن ەرەكشە سۇيىسپەنشىلىك ايقىن بايقالادى.
راۋيا مامىلەنوۆا جەدەل جاردەم ستانسياسىندا دا ون بەس جىل تەر توككەنىن ايتادى. مەديسينالىق شۇعىل كومەك كورسەتكەن، تەز ارادا شەشىم قابىلداي بىلگەن قىزمەتتەرى وعان كاسىبي تۇرعىدا دامۋعا، ءبىلىمىن تاجىريبەمەن ۇشتاستىرىپ شىڭدالۋعا سەپتىگىن تيگىزگەن. ءيا، ول قىزىعى مەن شىجىعى قاتار جۇرەتىن «جەدەل جاردەمدى» ەڭ ۇلكەن مەكتەپ دەيدى.
بىزبەن ءتۇن جارىمىندا جەدەل جاردەم شاقىرعان، ءوزى اششى سۋعا سىلقيا تويىپ العان ءبىر تۇرعىننىڭ پىشاق كەزەپ، دارىگەرلەردى ۇيىندە ءبىر جارىم ساعات قاماپ ۇستاپ، سۇراقتى جاۋدىرعان وقيعاسىمەن ءبولىستى.
– 2000 جىلدىڭ باسى ەدى. تۇنگى ساعات بىردە ناۋقاس جەدەل جاردەم قىزمەتىن قايتا شاقىرىپتى. جاس جىگىت. 38 جاستا. ىشىمدىك ىشكەن بولىپ شىقتى. ءبىز ىزدەگەن پاتەر بەسىنشى قاباتتا ەكەن. كورشىلەرىن وياتىپ، ەسىكتى اشىپ، ۇيگە كىردىك. ول جالاڭاش ءجۇر. اسحاناعا بارىپ، ءبىر ستاكان كونياك ءىشىپ الىپ، قولىندا ۇلكەن پىشاق، «مەن دىرىلدەپ جاتىرمىن» دەيدى. وتىرىڭىز دەدىم. «ول جەردە ستالين تۇر» دەيدى. ءسويتىپ پىشاقتى كەزەپ، «جۋكوۆ كىم، تەگى، اكەسى كىم»، – دەپ سۇرايدى دارىگەردەن. وعان جاۋاپ العان سوڭ:
– ءبىرىنشى عارىشكەر كىم؟ – دەپ سۇرايدى اۋرۋ جىگىت دارىگەردەن.
– گاگارين.
– مەنىڭ مىنا قولىمدى كورىپ تۇرسىز با؟ بۇل جۋكوۆ تا، تۇڭعىش عارىشكەر دە ۇستاعان قول، – دەپ ماقتانادى. ودان ءارى «تۇڭعىش دەنساۋلىق ساقتاۋ ءمينيسترى كىم، ريەۆوليۋسيا قاشان باستالدى، لەنين كىم، قانداي دارى-دارمەك قايدا جاسالدى؟» دەپ، قىسقاسى، الگى جىگىت دارىگەردى ءبىر جارىم ساعات بويى سۇراقتىڭ استىنا الىپ، ءار سۇراق سايىن پىشاعىن كەزەپ قويىپ، ابدەن زىعىردى قايناتادى. ءبىراق ءوزىن ۇلتتىق قاۋىپسىزدىك كوميتەتىنىڭ وفيسەرىمىن دەپ تانىستىرعان جىگىتتىڭ بارلىق ساۋالىنا راۋيا مامىلەنوۆا اسقان سابىرمەن جاۋاپ بەرىپ وتىرعان. سۇراقتارىنا قاتەسىز جاۋاپ بەرگەنى ءۇشىن دارىگەرگە ءبىر مارتە قوڭىراۋ شالۋعا رۇقسات بەرەدى. سول ءساتتى پايدالانعان راۋيا گەروي قىزى پوليسيا شاقىرىپ ۇلگەرەدى. ءسويتىپ پىشاعى جالاڭداعان وفيسەردىڭ ۇيىنەن دارىگەرلەر امان-ەسەن شىعادى.
«مەديسينا سالاسىن جۇرەگىمەن تاڭداعان ادامدار كاسىبىنە ادال كەلەدى، ولار ەشنارسەدەن جيىركەنبەيدى، ءتۇرلى وقىس جاعدايلاردا ءوزىن عانا ەمەس، وزگەنىڭ دە ءومىرىن امان ساقتاپ قالۋ – باستى ماقساتى ەكەنىن ۇمىتپاۋ كەرەك. ماماندىعىن اداسپاي تاڭداپ، كاسىبىن شىن سۇيگەن ادامدار عانا ءوز جۇمىسىنان ءلاززات الادى»، – دەيدى بىلىكتى دارىگەر.
راۋيا گەروي قىزى – وسكەمەننىڭ تۋماسى. بالالار دارىگەرى بولۋدى ارمانداعان بولاتىن. ءبىراق تۋىستارى جۋرناليستيكاعا، تەاتر ينستيتۋتىنا بار دەپ ۇگىتتەيدى. سەبەبى، ول جان-جاعىن كۇلكىگە كومىپ جۇرەتىن ازىلكەش ەدى. «تاماشادا» وينايتىن بولاسىڭ دەۋشى ەدى ءبارى.
اناسى – دارىگەر. سونىڭ دا اسەرى بولدى ما، ايتەۋىر جۇرەگى مەديسينانى قالاپ تۇردى. ەمدەۋ بولىمىنە وقۋعا ءتۇستى. جۇمىس ىستەگەندە دە، وقۋ كەزىندە دە كوپ قينالدى. سەبەبى، مەديسينانى تاڭداعان ادامعا ۇزدىكسىز وقىپ، ءبىلىمىن ۇدايى جەتىلدىرىپ وتىرۋ كەرەك ەكەن.
ەكى پەرزەنت ءسۇيدى. ون بەس جىل جەدەل جاردەم ستانسياسىندا ەڭبەك ەتتى.
«ەڭ قيىنى – شاقىرتۋمەن جەدەل كومەك بەرۋگە اتتانعاندا، العاشىندا قۇتقارا الماي قالامىن، ۇلگەرمەي قالمايىق دەگەن ۇرەي بيلەيتىن بويىن. ويتكەنى كەيبىر دەرتتەردەن پاسيەنتتى قۇتقارىپ قالۋ ءۇشىن بىلىكتىلىك پەن ۋاقىت تا ماڭىزدى. ال ناۋقاستى اجالدان اراشالاپ قالعاندا، ول ايىعىپ، العىس ايتقاندا، سول ساتتەگى سەزىمدى ەشنارسەمەن سالىستىرۋ مۇمكىن ەمەس»، – دەيدى دارىگەر.
جۋىردا راۋيا مامىلەنوۆا «ەڭبەك قايراتكەرى» مەدالىمەن ماراپاتتالدى. وتىز جىلدان اسا جانكەشتىلىكپەن ەڭبەك ەتىپ، تالاي ناۋقاستى دىڭكەلەتكەن دەرتتىڭ بەتىن قايتارىپ، بۇگىن سول يگىلىكتىڭ ناتيجەسىندەي قۇشاعى دا گۇلگە تولدى.
«دارىگەرلەر ناۋقاستار اشۋلانىپ كەلگەندە ەرەگىسپەۋ كەرەك. كەيدە تۇيمەدەي ماسەلە تۇيەدەي داۋعا اينالىپ كەتىپ جاتادى. تاعى ءبىر وقيعا ەستەن كەتپەيدى. ءبىر ايەل ۇيىندە بوسانىپ جاتىر دەگەن اقپارات ءتۇستى. جەدەل جولعا شىقتىق. كەلىنشەك توسەكتە تولعاتىپ جاتىر. كەلەسى بولمەدە كۇيەۋى داستارحاندى اسقا تولتىرىپ قويىپ، تويلاپ وتىر. ءقازىر ۇيدە بوسانادى دەپ ءماز. ءتورتىنشى پەرزەنتى دۇنيەگە كەلمەك. ايەلدىڭ زاتتارىن تەز-تەز جيناپ ۇلگەرىپ، پەرزەنتحاناعا دا جەتىپ ۇلگەردىك»، – دەيدى راۋيا مامىلەنوۆا.
بۇگىندە ول پسيحيكالىق اۋرۋعا شالدىققان ناۋقاستاردىڭ تەراپيەۆتى. دارىگەردىڭ ايتۋىنشا، كوبىنە اقىل-ەسى كەم ادامداردىڭ ءىش قۇرىلىسى، باسقا دا كەسەلدەرى اسقىنىپ كەلەدى. قاي جەرى اۋىرىپ تۇرعانىن تۇسىندىرە المايتىن، ءتىپتى ايتقىسى كەلمەيتىن ناۋقاستارعا مەديسينالىق تەكسەرۋ كەزىندە دەنساۋلىعىنداعى اقاۋدى انىقتاپ، ونى ەمدەۋگە ماماندار اسا ءمان بەرسە ەكەن دەيدى راۋيا مامىلەنوۆا. ءوزى سولاي جاسايدى. ەشكىمگە بەي-جاي قارامايدى، ومىردەگى ادامزاتتىڭ ءبارى ءدىن امان بولسا دەپ تىلەيدى دارىگەر جۇرەگى.