50 جىلدان استام ۋاقىت بۇرىن «كەمەل» شاعىن اۋدانىنداعى ەسەنتاي وزەننىڭ بويىنا سالىنعان اپاتتى كوپىردى الماتى اكىمى ەربولات دوسايەۆ جەتىسۋ اۋدانىنىڭ تۇرعىندارىمەن ەسەپتىك كەزدەسۋ جانە جۇمىس ساپارى بارىسىندا قاراپ شىقتى، دپ حابارلايدى Almaty-akshamy.kz
جولىمبەت كوشەسىندە ورنالاسقان وسى كوپىر بويىنشا بارلىق كولىكتەردىڭ قوزعالىسى ونىڭ اقاۋلى جاعدايىنا بايلانىستى وسى جىلدىڭ مامىر ايىنىڭ سوڭىندا شەكتەلگەن. وتكەن عاسىردىڭ 60-جىلدارىندا سالىنعان كوپىر قۇرىلىمى ەشقاشان جوندەلمەگەن جانە جارامسىز بولىپ قالعان. كوپىر تىرەكتەرىندە ءقاۋىپتى جارىقتار پايدا بولدى، بەتون كونسترۋكسيالارى جارتىلاي بۇزىلدى. كوپىردى كوزبەن شولىپ تەكسەرۋ بارىسىندا كوپىرگە كىرەبەرىستەردە ۇيىندىلەردىڭ، سونداي-اق كوپىردىڭ بەتكەيلەرىندەگى توپىراقتىڭ شوگۋى انىقتالدى.
قالا باسشىسىنا قالالىق موبيلدىلىك باسقارماسىنىڭ باسشىسى ساعىندىق تەلىبايەۆتىڭ ايتۋىنشا، كوپىردى تەحنيكالىق تەكسەرۋ دەفورماسيالىق تىگىستىڭ جوقتىعىن دا انىقتادى. مۇنىڭ ءبارى قۇرىلىمنىڭ جۇك كوتەرگىشتىگىنە جانە ونىڭ بەرىكتىگىنە تەرىس اسەر ەتەدى. دەمەك، كوپىردى جوندەۋ مۇمكىن ەمەس. سوندىقتان جاڭاسىن سالۋ قاجەت.
جاڭا كوپىردىڭ جوباسى قادالار نەگىزى بار ءبىر ارالىقتى قۇرىلىستى، سونداي-اق كوپىرگە كىرەبەرىستەردىڭ ءجۇرىس بولىگىن قايتا قۇرۋدى كوزدەيدى. جاڭا قۇرىلىم ەسكىدەن الدەقايدا ۇلكەن بولادى. سونىمەن، ەگەر اپاتتىق كوپىردىڭ ۇزىندىعى 16،8 مەتر، ەنى 8،5 مەتر جانە تىرەكتەردىڭ بيىكتىگى 7 مەتر بولسا، وندا جاڭا كوپىردىڭ ۇزىندىعى 24 مەتر، ەنى 13،5 مەتر، بيىكتىگى 9 مەتر بولادى. بۇل كوپىردەن ءوتۋدى جولمەن ءبىر دەڭگەيدە قامتاماسىز ەتۋگە مۇمكىندىك بەرەدى.
جاياۋ جۇرگىنشىلەردىڭ جايلىلىعى مەن قاۋىپسىزدىگىن قامتاماسىز ەتۋ ءۇشىن ەربولات دوسايەۆ ەكى جاقتان دا تروتۋارلاردى جايلاستىرۋدى، سونداي – اق كوپىر «كەمەل»، «كوكجيەك» شاعىن اۋداندارى مەن «قويانقۇس»، «ىنتىماق»، ءجاڭاداۋىر، جاڭاتالاپ پوسەلكەلەرى تۇرعىندارى ءۇشىن كولىك بايلانىسىن قامتاماسىز ەتەتىندىگىن ەسكەرىپ، قىسقا مەرزىمدە جۇمىستار جۇرگىزۋدى تاپسىردى.
«بۇل الەۋمەتتىك ماڭىزى بار نىسان، كوپىر ارقىلى بىرنەشە اۆتوبۋس مارشرۋتتارى، سونىڭ ىشىندە مەكتەپ مارشرۋتتارى وتەدى، سوندىقتان بارىنشا قىسقا مەرزىمدە جول قوزعالىسىنىڭ قامتاماسىز ەتۋ كەرەك. قاجەتتى قاراجات بولىنەتىن بولادى، قوزعالىس وسى جىلدىڭ قازان ايىندا اشىلۋى ءتيىس. كوپىر ونداعان جىلدار بويى ادامدارعا قىزمەت ەتەتىندەي ساپالى بولعانى ءجون»، - دەپ اتاپ ءوتتى ەربولات دوسايەۆ.
قازىرگى ۋاقىتتا جاڭا كوپىر سالۋ بويىنشا جوندەۋ جۇمىستارى اياقتالعانعا دەيىن اۆتوكولىك يەلەرى اتالعان ۋچاسكەنى مۇحامەدجان سەرالين كوشەسى ارقىلى اينالىپ وتە الادى.