27-28 قاراشادا استانادا وتەتىن ۇجىمدىق قاۋىپسىزدىك تۋرالى شارت ۇيىمى (ودكب) وتىرىسىندا ماڭىزدى قۇجات قابىلدانادى. بۇل تۋرالى ودكب باس حاتشىسى يمانعالي تاسماعامبەتوۆ بەلارۋستىڭ ستۆ تەلەارناسىنا بەرگەن سۇحباتىندا مالىمدەدى.
تاسماعامبەتوۆتىڭ ايتۋىنشا، ۇجىمدىق قاۋىپسىزدىك كەڭەسى تاجىكستان مەن اۋعانستان شەكاراسىنداعى قاۋىپسىزدىكتى قامتاماسىز ەتۋگە باعىتتالعان ارنايى مەملەكەتارالىق باعدارلامانى بەكىتۋدى جوسپارلاپ وتىر.
«اۋعان ماسەلەسى – ودكب-نىڭ ماڭىزدى باعىتتارىنىڭ ءبىرى. سىزدەر بۇل جاعدايدىڭ ماڭىزدىلىعىن جاقسى تۇسىنەسىزدەر. ورتالىق ازيا ءۇشىن اۋعانستان تۇراقتانىپ، بەيبىت باعىتقا بەت بۇرعانىمەن، بۇل ەلدە ءالى دە كوپتەگەن تەرروريستىك ۇيىمدار بار. بۇل، ءسوزسىز، وتە كۇردەلى ماسەلە»، – دەپ اتاپ ءوتتى يمانعالي تاسماعامبەتوۆ.
باس حاتشىنىڭ ايتۋىنشا، جاڭا باعدارلاما ۇيىمعا مۇشە ەلدەردىڭ شەكاراداعى جاعدايدى بىرلەسىپ رەتتەۋىنە جانە ايماقتىڭ قاۋىپسىزدىگىن نىعايتۋعا مۇمكىندىك بەرەدى.
اتالعان قۇجات ودكب ەلدەرىنىڭ اۋعانستان اۋماعىنان كەلەتىن قاۋىپ-قاتەرلەردى الدىن الۋ جانە ورتالىق ازيادا تۇراقتىلىقتى قامتاماسىز ەتۋ باعىتىنداعى ىنتىماقتاستىعىنىڭ ماڭىزدى قادامى بولماق.