قازاقستاننىڭ ەنەرگەتيكا ءمينيسترى الماسادام ساتقالييەۆ ەلىمىزدە ۇزاق ۋاقىت بويى پايدالانىلماعان جانە كەلىسىمشارتتىق مىندەتتەمەلەرىن ورىنداماعان جەر قويناۋىن پايدالانۋشىلاردان تالاپ ەتىلگەن ايىپپۇلدار تۋرالى ايتتى، دەپ حابارلايدى aqshamnews.kz
2022 جىلدان باستاپ مينيسترلىك 52 كەلىسىمشارتتى بۇزعان. بۇل كەلىسىمدەر كەيىن اۋكسيون ارقىلى قايتا ساتىلىمعا شىعارىلادى. ەنەرگەتيكا ءمينيسترىنىڭ ايتۋىنشا، قازىرگى تاڭدا توعىز كەلىسىم بويىنشا 1،9 ميلليارد تەڭگە كولەمىندەگى قارىز وتەلگەن.
«2022 جىلعى كەلىسىمشارتتار بويىنشا 158 ەسكەرتۋ جاسالىپ، جالپى سوماسى 12 ميلليارد تەڭگە بولدى، ونىڭ 5،6 ميلليارد تەڭگەسى وتەلدى. ال 2023 جىلعى كەلىسىمشارتتار بويىنشا 141 ەسكەرتۋ جاسالدى، جالپى سوماسى 14 ميلليارد تەڭگە بولدى، بۇگىنگى كۇنى 2،4 ميلليارد تەڭگە وتەلدى»، — دەدى الماسادام ساتقالييەۆ ۇكىمەتتىك ساعاتتا.
2024 جىلدىڭ 1 قاراشاسىنا قاراي قازاقستاندا 315 مۇناي-گاز كەلىسىمشارتى كۇشىندە تۇر.
«2020 جىلدان باستاپ جەر قويناۋىن پايدالانۋعا قۇقىق بەرۋ جۇيەسى تولىق اۆتوماتتاندىرىلدى. ول ەلەكتروندى اۋكسيون ارقىلى جۇزەگە اسىرىلادى. بۇل پروسەسس اشىق ءارى ايقىن ەتەدى. وسى ۋاقىت ىشىندە توعىز ەلەكتروندى اۋكسيون وتكىزىلدى. ونىڭ بارىسىندا 110 جەر ۋچاسكەسى ساتىلىپ، بيۋدجەتكە 49،5 ميلليارد تەڭگە كولەمىندە قول قويۋ بونۋسى تولەنىپ، گەولوگيالىق بارلاۋ جۇمىستارىن جۇرگىزۋگە 443 ميلليون دوللار ينۆەستيسيا تارتىلدى»، — دەپ قوستى مينيستر.
كەلەسى اۋكسيون 27 قاراشادا توعىز ۋچاسكە بويىنشا وتكىزىلۋى جوسپارلانعان.