جىل سايىن ەلدە 13 مىڭنان استام ادام ونكولوگيالىق دەرتتەن كوز جۇمادى.
ونكولوگيالىق اۋرۋلاردان بولاتىن ءولىم بويىنشا ءبىرىنشى ورىندا وكپە وبىرى (16،3%)، ەكىنشى ورىندا – اسقازان وبىرى (12%)، ءۇشىنشى ورىندا – توق ىشەك وبىرى -10،6%). بۇل تۋرالى بۇگىن ۇكىمەت وتىرىسىندا دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz.
«جەكەلەگەن وڭىرلەردە ەمدەۋ جۇرگىزۋ ءۇشىن جاعدايلار ءارتۇرلى ەكەنىن كورىپ وتىرسىزدار. ماسەلەن، قىزىلوردا وبلىسىندا ونكولوگيا ورتالىعى توزعان عيماراتتا ورنالاسقان، پالاتالار كوپ ورىندى. پاۆلودار جانە ماڭعىستاۋ ونكولوگيا ورتالىقتارىنداعى زاماناۋي كرەسلولارى، فۋنكسيونالدىق توسەكتەرى بار جەكە پالاتاردى مىسال رەتىندە الۋعا بولادى»، - دەدى اجار عينيات.
ءمينيستردىڭ ايتۋىنشا، ەلىمىزدىڭ بارلىق وڭىرلەرىندە ساۋلەلىك تەراپيا جۇرگىزۋ ءۇشىن جەلىلىك ۇدەتكىشتەر، ال ءبىرقاتار ءىرى وبلىس ورتالىقتارىندا اپپاراتتار ورناتىلادى. ساۋلەلىك ەمدەۋدى كەڭەيتۋ جانە جەتىلدىرۋ كوزدەلگەن (پروتوندىق تەراپيا، ينتراوپەراسيالىق ساۋلەلىك تەراپيا).
«لاپاروسكوپيالىق حيرۋرگيانى دامىتۋ، 3-D مودەلدەۋ جانە باسىپ شىعارۋ ارقىلى رەكونسترۋكتيۆتىك-پلاستيكالىق وپەراسيالاردىڭ سپەكترىن كەڭەيتۋ ءۇشىن ءتيىستى جابدىقتارمەن جابدىقتاۋ كوزدەلگەن. ىسىككە قارسى جاڭا دارىلىك زاتتارعا قولجەتىمدىلىكتى ارتتىرۋ ماقساتىندا تارگەتتىك جانە يممۋندىق-ونكولوگيالىق پرەپاراتتار جەلىسىن كەڭەيتۋ (10 تارگەتتىك، 2 يممۋندىق-ونكولوگيالىق پرەپاراتقا قولجەتىمدىلىك جوق)، گەندىك ينجەنەريانى، راديوفارماسيەۆتيكالىق پرەپاراتتاردى پايدالانا وتىرىپ تەراپيانى ەنگىزۋ بويىنشا جۇمىس جۇرگىزىلەتىن بولادى»، - دەدى مينيستر.
مينيستر مەديسينالىق جابدىقتاردى، دارىلىك پرەپاراتتاردى ساتىپ الۋعا، مامانداردى وقىتۋعا، زاماناۋي ونكولوگيا ورتالىقتارىن سالۋعا، رەكونسترۋكسيالاۋعا جانە كۇردەلى جوندەۋ جۇرگىزۋگە شامامەن 474 ملرد تەڭگە قاجەت ەكەنىن ايتتى.
2022 جىلعى 18 قازاندا وتكەن دۇنيەجۇزىلىك دەنساۋلىق ساقتاۋ ءسامميتىنىڭ مالىمەتتەرى بويىنشا «ونكولوگيالىق اۋرۋلاردىڭ باسىم بولىگىنىڭ الدىن الۋعا بولادى. وبىر – ۇكىم ەمەس، توقتاماي كۇرەسۋ قاجەت» دەلىنگەن.