وبلىس اتاۋلارى تەك مەملەكەتتىك تىلدە بەكىتىلدى - ونوماستيكا

مادەنيەت جانە سپورت مينيسترلىگى جانىنداعى رەسپۋبليكالىق ونوماستيكا كوميسسياسى جالپى سانى 606 ۇسىنىستى قاراعان.

وتكەن جىلى 68 ەلدى مەكەن مەن 572 قۇرامداس بولىكتىڭ اتاۋى وزگەرتىلدى. ماسەلەن، اقمولا وبلىسى بويىنشا يۋجنايا كوشەسى ءسابيت مۇقانوۆ، بۋدەننىي كوشەسى باۋىرجان مومىش ۇلى، لەنين كوشەسى ابىلاي حان ەسىمدەرىمەن قايتا اتالدى، دەپ حابارلايدى Almaty-akshamy.kz.

مادەنيەت جانە سپورت مينيسترلىگى مادەنيەت كوميتەتىنىڭ اقپاراتى بويىنشا 2022 جىلى رەسپۋبليكالىق ونوماستيكا كوميسسياسى 606 ۇسىنىستى قاراعان.

«بۇدان بولەك، بىلتىر مەملەكەت باسشىسىنىڭ جولداۋىندا كوتەرىلگەن ەلىمىزدىڭ اكىمشىلىك-اۋماقتىق قۇرىلىمىن جەتىلدىرۋ بويىنشا بەرىلگەن تاپسىرماسىن ورىنداۋ ماقساتىندا جاڭادان قۇرىلعان ءۇش وبلىسقا اباي، جەتىسۋ، ۇلىتاۋ اتاۋلارى بەرىلدى. ال قاپشاعاي قالاسى – قونايەۆ قالاسى بولىپ قايتا اتالدى. ايتا كەتۋ كەرەك، وبلىس اتاۋلارى تەك مەملەكەتتىك تىلدە بەكىتىلدى. مىسالى، اباي وبلىسى - وبلاست اباي، ۇلىتاۋ وبلىسى - وبلاست ۇلىتاۋ، جەتىسۋ وبلىسى - وبلاست جەتىسۋ.  سونداي-اق احمەت بايتۇرسىن ۇلىنىڭ 150 جىلدىق مەرەيتويىنا وراي قوستاناي حالىقارالىق اۋەجايىنا ۇلت ۇستازىنىڭ ەسىمى بەرىلدى»، – دەدى مادەنيەت جانە سپورت مينيسترلىگى ونوماستيكا باسقارماسىنىڭ باسشىسى ەلەركە تورەحان.