وبلىس اكىمدەرىنىڭ قىزمەت مەرزىمىن شەكتەۋ ۇسىنىلدى

ولار ءوز ءوڭىرىنىڭ بارلىق ازاماتىنا قىزمەت كورسەتۋگە ءتيىس.

ماجىلىستەگى «اق جول» فراكسياسىنىڭ دەپۋتاتتارى وبلىس پەن رەسپۋبليكالىق ماڭىزى بار قالا اكىمدەرىنىڭ جۇمىس مەرزىمىن بەس جىلدىق مەرزىممەن شەكتەۋدى ۇسىندى، دەپ حابارلايدى Almaty-akshamy.kz

دەپۋتات ەرلىك ءومىرعاليدىڭ ايتۋىنشا، وتىز جىل بويى قازاقستاندا ءبىر عانا پارتيا بيلىككە مونوپوليا جاسادى. سول سەبەپتى ول وبلىس پەن قالا اكىمدەرىنە ساياسي پارتياعا مۇشە بولۋعا تىيىم سالۋ كەرەك دەپ ەسەپتەيدى.

«اكىمدەر تەك ءوز اينالاسىنا عانا ەمەس، ءوز ءوڭىرىنىڭ بارلىق ازاماتىنا قىزمەت كورسەتۋگە ءتيىس. اكىمدەردىڭ پارتياعا مۇشە بولۋىن توقتاتۋ تۋرالى ۇسىنىس نەگىزدى جانە كونستيتۋسيالىق رەفورماعا ساي كەلەدى دەپ سانايمىز»، - دەدى ەرلىك ءومىرعالي پرەمەر-مينيسترگە جولداعان دەپۋتاتتىق ساۋالىندا.

وسىعان بايلانىستى «اق جول» دەپۋتاتتىق فراكسياسى ۇكىمەتكە مىناداي نورمالارعا باستاما جاساۋدى ۇسىندى:

1. وبلىس پەن قالا اكىمدەرىنە قىزمەتىن اتقارۋ كەزىندە ساياسي پارتيالاردىڭ مۇشەسى بولۋعا تىيىم سالۋ؛

2. وبلىس پەن رەسپۋبليكالىق ماڭىزى بار قالا اكىمى لاۋازىمىن اتقارۋ مەرزىمىن ءبىر رەتتىك 5 جىلدىق مەرزىممەن شەكتەۋ.