بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان، دەپ حابارلايدى Almaty-akshamy.kz.
«وتكەن جىلى ىشكى ىستەر ورگاندارى جىلدامدىق رەجيمىن بۇزۋدىڭ 3،1 ملن استام دەرەگىن انىقتادى. جاياۋ جۇرگىنشىلەر جول بەرگەن 280 مىڭعا جۋىق قۇقىق بۇزۋشىلىقتىڭ جولىن كەستى. جول ءجۇرىسى قاۋىپسىزدىگىن قامتاماسىز ەتۋدە بۇزۋشىلىقتى تىركەۋدىڭ اۆتوماتتى جۇيەلەرى (بۇدان ءارى – بتاج) ءوزىنىڭ تيىمدىلىگىن دالەلدەدى. جولداردا بارلىعى 18 مىڭنان استام بتاج ورناتىلدى. ونىڭ كومەگىمەن وتكەن جىلى 5 ملن بۇزۋشىلىق انىقتالىپ، مەملەكەت بيۋدجەتىنە ايىپپۇل تۇرىندە 33 ملرد تەڭگە ءتۇستى»، - دەپ اتاپ ءوتتى ءبىرىنشى ۆيسە-پرەمەر جاۋابىندا.
ونىڭ دەرەگىنشە، حالىقارالىق وڭ تاجىريبەنى ەسكەرە وتىرىپ، ءبىرقاتار وڭىردە پاترۋلدىك اۆتوموبيلدەردى زاماناۋي زياتكەرلىك كەشەندەرمەن جاراقتاندىرۋ تاجىريبەسى ەنگىزىلدى. بتاج جەلىسىن دامىتۋ اياسىندا «قورعاۋ – ءقاۋىپتى جۇرگىزۋشى» ءموبيلدى قوسىمشاسى ازىرلەندى. وندا «سەرگەك» جۇيەسىنىڭ كامەرالارى مەن ىشكى ىستەر مينيسترلىگىنىڭ جەدەل باسقارۋ ورتالىقتارىنىڭ مۇمكىندىكتەرى ينتەگراسيالانعان.
«بۇل ناقتى ۋاقىت رەجيمىندە تەحنيكالىق تەكسەرۋدەن وتپەگەن، ساقتاندىرۋ ءپوليسىنسىز پايدالانىلاتىن، باعدارلارى بويىنشا ىزدەستىرىلەتىن جانە جالعان مەملەكەتتىك تىركەۋ نومىرلىك بەلگىلەرىن پايدالاناتىن اۆتوموبيلدەردى انىقتاۋعا مۇمكىندىك بەرەدى. بۇگىنگى تاڭدا مۇنداي موبيلدىك قوسىمشالار ەلىمىزدىڭ بارلىق وڭىرىندە ودان ءارى تاراتىلا وتىرىپ، 11 قالادا (استانا، الماتى، شىمكەنت، اتىراۋ، تۇركىستان، وسكەمەن، پەتروپاۆل، قاراعاندى، تەمىرتاۋ، كوكشەتاۋ جانە ورال) ەنگىزىلدى»، - دەدى رومان سكليار.