2022 جىلدىڭ جەلتوقسان ايىنىڭ قورىتىندىسى بويىنشا ءبىلىم بەرۋ قىزمەتتەرى ءبىر جىلدا 14،5% قىمباتتاعان.
Ranking.kz مالىمەتىنشە، باعا ەڭ كوپ قىمباتتاعان اتىراۋ وبلىسى: ءبىر جىلدا بىردەن 60،4%. ودان كەيىن تۇركىستان (28،2% قىمباتتاعان)، قاراعاندى (21،9% قىمباتتاعان)، شىعىس قازاقستان (19،9% قىمباتتاعان) جانە پاۆلودار (19% قىمباتتاعان) وبلىستارى. ەڭ از جىلدىق باعا ءوسىمى الماتى وبلىسىندا تىركەلدى: 5،3%، دەپ حابارلايدى Almaty-akshamy.kz.
قىزمەت كورسەتۋ تۇرلەرى بويىنشا مەكتەپكە دەيىنگى جانە باستاۋىش ءبىلىم 11،1%-عا، ورتا ءبىلىم 9،6%-عا، كاسىپتىك ورتا ءبىلىم 20،2%-عا، جوعارى ءبىلىم 17%-عا، ەرەسەكتەرگە ارنالعان ءبىلىم 15،9%-عا قىمباتتادى.
2022 جىلدىڭ ءۇشىنشى توقسانىندا ءبىلىم بەرۋ سالاسىندا كورسەتىلگەن قىزمەت كولەمى 949،8 ملرد تەڭگەگە جەتتى، بۇل ءبىر جىل بۇرىنعىدان 17،4% كوپ. ءبىلىم بەرۋ قىزمەتتەرىنىڭ باسىم بولىگى بيۋدجەت قاراجاتى ەسەبىنەن كورسەتىلدى: 836،6 ملرد تەڭگە. تاعى 90،4 ملرد تەڭگەنى حالىق تولەسە، 22،9 ملرد تەڭگەنى كاسىپورىندار تولەدى.
ءبىلىم بەرۋ تۇرلەرى بويىنشا قىزمەتتەردىڭ قۇندىق ماندەگى ەڭ ۇلكەن كولەمى نەگىزگى جانە جالپى ورتا ءبىلىم بەرۋ سالاسىنا تيەسىلى: 444،9 ملرد تەڭگە، ءبىر جىل بۇرىنعىدان 12،5% كوپ. مەكتەپكە دەيىنگى تاربيە مەن وقىتۋ سالاسىندا كورسەتىلگەن قىزمەت كولەمى 158،7 ملرد تەڭگەگە، جوعارى ءبىلىم بەرۋ سالاسىندا 110،2 ملرد تەڭگەگە جەتتى.
وڭىرلەر ىشىندە ەڭ كوپ قىزمەت ءداستۇرلى تۇردە الماتىدا كورسەتىلدى: 113،1 ملرد تەڭگە – ءبىر جىل بۇرىنعىدان قۇندىق ماندە 16،6% ارتىق. كوشباسشى وڭىرلەردىڭ ۇشتىگىنە سونداي-اق ەلوردا (98،8 ملرد تەڭگە، ءبىر جىلدا 61،3% كوبەيگەن) جانە تۇركىستان وبلىسى (98،7 ملرد تەڭگە، 29،1% كوبەيگەن) كىردى.
ەڭ از قىزمەت كورسەتىلگەن وڭىرلەر ۇلىتاۋ، اباي جانە سولتۇستىك قازاقستان وبلىستارى.