ولجاس بەكتەنوۆ پرەمەر-مينيستر لاۋازىمىندا قىزمەتكە كىرىسكەنىنە ءبىر جۇما ءوتتى. 6 اقپاندا مەملەكەت باسشىسى قاسىم-جومارت توقايەۆ ونى اتقارۋشى ورگاننىڭ باسشى ەتىپ تاعايىنداعان ەدى. ءبىر اپتا از ۋاقىت بولعانىمەن دە، ونىڭ العاشقى قادامدارىنان اق وي تۇيۋگە بولادى.
ولجاس بەكتەنوۆتىڭ باسقارۋ ءستيلىن «اقىلدى قاتالدىق» دەپ سيپاتتاۋعا بولادى. «جۇمساق اۆتوريتاريزم» جانە «ليبەرالدى» باسقارۋ ەلەمەنتتەرىن ورنىمەن قولدانادى.
كوپ سوزىمەن ەمەس، ىسىمەن ءوز جۇمىسىن كورسەتۋگە بەيىم. سوندىقتان اۆتوريتارلى جابىقتىق بايقالادى. نەبارى ءبىر جۇمانىڭ ىشىندە ولجاس بەكتەنوۆتىڭ باسشىلىعىمەن ۇكىمەتتە 3 جينالىس ءوتتى. 6 اقپاندا جاڭا مينيسترلەردى تانىستىردى. وندا جاڭا كابمين باسشىسى:
«فورماليزمسىز، بيۋروكراتياسىز جانە قاجەتسىز جيىندارسىز بەلسەندى جۇمىس. از سويلەپ، كوپ ءىس تىندىرۋ كەرەك»، - دەپ مالىمدەمە جاسادى.
9 اقپاندا ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ بەرگەن تاپسىرمالاردى ىسكە اسىرۋ ماسەلەلەرى جونىندە كەڭەس وتكىزدى. وندا و. بەكتەنوۆ:
«جۇمىس قارقىنى جوعارى، ال تالاپ قاتاڭ بولادى»، - دەپ ۇكىمەت الدىنداعى نەگىزگى مىندەتتەردى بەلگىلەپ بەردى. اس سويلەپ، كوپ ءىس تىندىرۋ جانە ۇكىمەت مۇشەلەرىنەن تالاپتىڭ قاتاڭ بولاتىنى «جۇمساق اۆتوريتارلى» باسقارۋ ءستيلىنىڭ ەلەمەنتتەرى.
بۇگىن جاڭارتىلعان ۇكىمەتتىڭ ءبىرىنشى وتىرىسىندا بيىل قاڭتارداعى الەۋمەتتىك-ەكونوميكالىق دامۋ قورىتىندىلارى مەن رەسپۋبليكالىق بيۋدجەتتىڭ اتقارىلۋ ماسەلەلەرى تالقىلاندى. بۇل جولى اۆتوريتارلى مالىمدەمەلەر جاسالعان جوق.
بۇدان بولەك «جۇمساق اۆتوريتاريزمنەن» قاتار «ليبەرالدى» باسقارۋ بەلگىلەرى كورىندى. جاڭا كابمين باسشىسى قولىنداعى بيلىكتى ءبولىسىپ وتىر. ياعني، كورپەنى وزىنە تارتىپ جاۋاپكەرشىلىكتى ءوز موينىنا الىپ جاتقان جوق. ەڭ الدىمەن بيلىگىن ورىنباسارلارىمەن بولىسۋدە. ۇكىمەتتىڭ دەڭگەيىندە ءبىر اپتادا 7 جينالىس وتسە، ونىڭ 4-ەۋىنە ورىنباسارلارى ءتوراعالىق ەتكەن. ءبىرىنشى ورىنباسار رومان سكليار جانە ۆيسە پرەمەر سەرىك ءجۇمانعاريننىڭ توراعالىعىمەن بىر-بىردەن جينالىس وتسە، تامارا دۇيسەنوۆانىڭ باسشىلىعىمەن 2 جينالىس ءوتتى.
بيلىكتى ءبولىسۋ تەك ۇكىمەتتە عانا ەمەس، ۇكىمەت پەن جەرگىلىكتى اكىمدىكتەر اراسىندا دا وتۋدە. مىسالى، الماتىدا بولعان قايعىلى لاي كوشكىنىنە بايلانىستى بولعان كەيستە قالا اكىمدىگىنىڭ ىسىنە تىكەلەي ارالاسقان جوق. ەسكى ۇكىمەت بولعاندا ورتالىقتان ءبىر شەنەۋنىك مىندەتتى تۇردە الماتىعا كەلەر ەدى.
بۇل قادامدار مەن شەشىمدەردىڭ ءبارى جاڭا كابمين باسشىسىنىڭ «اقىلدى قاتالدىق» باسقارۋ ءستيلىن قولدانىپ جاتقانىن كورسەتەدى. ونىڭ قانداي ناتيجە كورسەتەتىنى بيىلعى جىل قورىتىندىسى بويىنشا بەلگىلى بولماق. 2029 جىلعا قاراي ەكونوميكالىق ءوسىم 450 ملرد دوللارعا جەتۋى ءۇشىن جىلدا كەمىندە 6% ءوسىم بولۋى قاجەت ەكەنىن ەسكەرگەن ءجون.