الماتىنىڭ پەريناتولوگيا جانە بالالار كارديوحيرۋرگياسى ورتالىعىنا رەتينالدى كامەرا ورناتىلدى
بۇل قۇرىلعى دارىگەرلەرگە جاڭا تۋعان نارەستەلەردىڭ كوز پاتولوگياسىن، سونىڭ ىشىندە شالا تۋعان نارەستەلەردىڭ رەتينوپاتياسىن دەر كەزىندە انىقتاۋعا كومەكتەسەدى. ورتالىقتا زاماناۋي دياگنوستيكالىق قۇرالدار «AYALA» قايىرىمدىلىق قورىنىڭ «الەمدى كورەمىن» جوباسى جانە الماتى قالاسى قوعامدىق دەنساۋلىق ساقتاۋ باسقارماسىمەن ىنتىماقتاستىق تۋرالى مەموراندۋم اياسىندا ىسكە استى.
قايىرىمدىلىق قوردىڭ ەلىمىزدەگى مەديسينالىق ورتالىقتارىنا تارتۋ ەتكەن وسىمەن جەتىنشى رەتينالدى كامەراسى. بيىل وسىنداي دياگنوستيكالىق قۇرىلعىلارمەن تاعى ەكى وبلىستىق پەريناتالدىق ورتالىقتى – اقتوبە مەن اتىراۋداعى ورتالىقتاردى جاراقتاندىرۋدى جوسپارلاپ وتىر.
FORUS NEO (ءۇندىستان) رەتينالدى كامەراسى وفتالمولوگ-دارىگەرگە رەانيماسيا جاعدايىندا جانە جاڭا تۋعان نارەستەنى ءوجج اپپاراتىنا قوسقاندا دا بالانى دياگنوستيكالاۋعا مۇمكىندىك بەرەدى. مۇنداي مۇمكىندىك باسقا قۇرىلعىلاردا جوق.
«AYALA» قايىرىمدىلىق قورى «الەمدى كورەمىن» جوباسىن ءۇشىنشى جىل جۇزەگە اسىرىپ كەلەدى. قور ءتيىمدى قايىرىمدىلىق ءتاسىلىن قولدانا وتىرىپ، قازاقستاندىق وفتالمولوگ-دارىگەرلەرگە قازاقستاننىڭ 17 پەريناتالدىق جانە عىلىمي ورتالىقتارىندا 4،5 مىڭنان استام جاڭا تۋعان نارەستەلەردى دياگنوستيكالاۋعا، ولاردى 26 بىرلىك دياگنوستيكالىق جانە لازەرلىك جابدىقتارمەن قامتاماسىز ەتۋگە كومەكتەستى.
«الماتى قالاسىنىڭ پەريناتولوگيا جانە بالالار كارديوحيرۋرگياسى ورتالىعىندا جىل سايىن 8،2 مىڭنان استام نارەستە دۇنيەگە كەلەدى، ونىڭ ىشىندە دەنە سالماعى وتە تومەن 800 شاقتى ءسابي بار. رەتينالدى كامەرا بۇل ورتالىقتىڭ وفتالمولوگتارىنا جەدەل جانە ءدال دياگنوز قويۋعا جانە قاجەتتى ەمدى ۋاقىتىلى ۇسىنۋعا كومەكتەسەدى، سونىڭ ارقاسىندا جۇزدەگەن بالا كورۋ قابىلەتى بويىنشا مۇگەدەكتىكتەن قۇتىلا الادى»، – دەپ اتاپ ءوتتى «AYALA» قايىرىمدىلىق قورىنىڭ نەگىزىن قالاۋشى جانە پرەزيدەنتى ايدان سۇلەيمەنوۆا.
قايىرىمدىلىق قور 2021 جىلدىڭ مامىرىنان باستاپ ق ر دەنساۋلىق ساقتاۋ مينيسترلىگىمەن مەموراندۋمعا سايكەس «الەمدى كورەمىن» جوباسىن جۇزەگە اسىرۋدا. 2023 جىلدىڭ قازان ايىندا قور الماتى قالاسى قدسب پەريناتولوگيا جانە بالالار كارديوحيرۋرگياسى ورتالىعىمەن دە ىنتىماقتاستىق تۋرالى مەموراندۋمعا قول قويدى. جوبانى ىسكە اسىرۋ كەزىندە قازاقستاندا رەتينوپاتياعا بايلانىستى شالا تۋعان بالالاردىڭ كورۋ قابىلەتى بويىنشا مۇگەدەكتىگى 0،6 پايىزعا دەيىن تومەندەدى.
تاقىرىپقا وراي
سابينا سماعۇلوۆا، پەريناتولوگيا جانە بالالار كارديوحيرۋرگياسى ورتالىعىنىڭ وفتالمولوگ-دارىگەرى:
– بۇل كامەرانىڭ ەرەكشەلىگى سول، بىرنەشە سۋرەت ءتۇسىرىپ، اتا-اناسىمەن، شەتەلدىك ارىپتەستەرمەن بولىسەمىز. حيرۋرگيالىق ەمدەۋ ءادىسىن دۇرىس تاڭداۋعا مۇمكىندىك بەرەدى. پروسەسس دايىندىق ارقىلى وتەدى. بالالار وتە كىشكەنتاي، ياعني العاشقى تەكسەرۋ تۋىلعاننان كەيىن 21–25 كۇن ىشىندە وتەدى. كامەرا بالانى تەكسەرۋگە دايىندايدى. ناقتى ۋاقىت رەجيمىندە ودان ءارى دياگنوستيكالاۋ جانە ەمدەۋ ءۇشىن ءبىرقاتار سۋرەتتەر تۇسىرىلەدى.
كەرەك دەرەك
* شالا تۋعان نارەستەلەردىڭ رەتينوپاتياسى – شالا تۋعان نارەستەلەردىڭ كوز تورىنىڭ (جارىققا سەزىمتال ايماعىنىڭ) دامۋىنىڭ بۇزىلۋىمەن بايلانىستى اۋرۋى، ول تولىق سوقىرلىققا اكەلۋى مۇمكىن. بالا مەرزىمىنەن نەعۇرلىم ەرتە تۋعان سايىن وندا رەتينوپاتيانىڭ كۇردەلى تۇرلەرىنىڭ پايدا بولۋ ىقتيمالدىعى جوعارى بولادى، ويتكەنى كوز تورىنىڭ قالىپتاسۋى گەستاسيانىڭ 39-40 اپتاسىندا عانا اياقتالادى. قازاقستاندا جىل سايىن 20 000-نان استام شالا تۋعان نارەستەلەر دۇنيەگە كەلەدى، ولاردىڭ 20%-ىن دەنە سالماعى 500-دەن 1000 گرامعا دەيىن وتە تومەن بالالار قۇرايدى. شالا تۋعان بالالاردىڭ رەتينوپاتياسىندا ەشقانداي سىرتقى بەلگىلەر جوق. سوندىقتان ارنايى جابدىقتاردىڭ كومەگىمەن مامانداندىرىلعان جانە بىلىكتى وفتالمولوگ قانا اۋرۋدىڭ بەلگىلەرىن ەرتە انىقتاپ، بالانى لازەرمەن حيرۋرگيالىق تۇزەتۋگە جىبەرە الادى. «AYALA» قايىرىمدىلىق قورى – قازاقستانداعى نەوناتولوگياعا ماماندانعان جالعىز قايىرىمدىلىق قورى.