قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆتىڭ ەلىمىز بويىنشا قالىپتاسقان توتەنشە جاعداي مەن قوعامدىق تارتىپسىزدىككە قاتىستى ماجىلىستە جاساعان مالىمدەمەسى مەملەكەتىمىزدە جىلدار بويى قوردالانىپ قالعان تەرەڭ الەۋمەتتىك، ەكونوميكالىق، ساياسي، قاۋىپسىزدىك جانە قورعانىس ماسەلەلەرىن شەشۋگە باعىتتالدى.
سونىڭ ىشىندە، اسىرەسە، پرەزيدەنتتىڭ ەلدەگى ورىن العان جاپپاي تارتىپسىزدىكتەردى اۋىزدىقتاپ، ەل ازاماتتارىنىڭ قاۋىپسىزدىگى مەن تىنىشتىعىن قامتاماسىز ەتۋ ماقساتىندا ۇجىمدىق قاۋىپسىزدىك شارتى ۇيىمىنىڭ (ۇقشۇ) كومەگىنە جۇگىنۋى وتە دۇرىس شەشىم بولعانىن ايتىپ ءوتۋ كەرەك. وسى ماسەلەگە قاتىستى ەلدەگى ازاماتتار اراسىندا ۇقشۇ اسكەري كونتينگەنتتەرىنىڭ قازاقستانعا كەلۋىنە وراي ءبىرقاتار الىپ قاشپا اڭگىمە، اقپارات تارادى. ءبىراق، پرەزيدەنت توقايەۆ بۇل اسكەري كونتينگەنتتەردىڭ باستى ميسسياسى – ەلدەگى قوعامدىق ءتارتىپتى قالپىنا كەلتىرۋگە كومەكتەسۋ، ودان كەيىن الداعى ەكى كۇننەن كەيىن ۇقشۇ اسكەرلەرى ەلدەن بىرتىندەپ كەتەدى دەپ ناقتى شەگەلەپ ايتىپ ءوتتى.
ەكىنشىدەن، پرەزيدەنت توقايەۆ تاۋەلسىزدىك العالى بەرى ەلدە الەۋمەتتىك، بيزنەس، ەكونوميكا جانە ۇلتتىق بايلىقتى يگەرۋ سالاسىندا قالىپتاسقان، تامىرى تەرەڭگە كەتكەن پروبلەمالاردى، اشىق ايتىپ، قوردالانعان ماسەلەلەردى الداعى ۋاقىتتا ءتيىستى دارەجەدە شەشىلەتىنىن باسا كورسەتۋى كوڭىلگە سەنىم ۇيالاتادى. پرەزيدەنت وسى ۋاقىتقا دەيىن شامادان تىس بايىپ كەتكەن كومپانيالار مەن وليگارحتار توبى ەلدەگى باسەكەلەستىكتى تومەندەتكەنىن باسا ايتتى.
وسى ورايدا مەملەكەت باسشىسى ەندى ۇكىمەت حالىقتىڭ مۇڭ-مۇقتاجىن ويلاپ، الەۋمەتتىك ماسەلەلەردىڭ ءتۇيىنىن شەشۋگە ەرەكشە باسىمدىق بەرۋ كەرەك ەكەنىن اڭعارتتى. سونىڭ ىشىندە قازاقستان بويىنشا حالىق نارازىلىعىنىڭ باستالۋىنا تۇرتكى بولعان باستى ماسەلە – ەلدەگى قىمباتشىلىق، باعانىڭ تۇراقسىزدىعى، ستراتەگيالىق ماڭىزى بار تاۋارلار مەن ونىمدەر باعاسىنىڭ تىم شارىقتاپ كەتۋى. وسىعان وراي جاڭا قۇراممەن جاساقتالاتىن ۇكىمەتكە ماكروەكونوميكالىق باعدارلامالاردى جۇزەگە اسىرۋ، ينفلياسيانى تەجەۋ جانە الەۋمەتتىك ماسەلەلەردى شەشۋدى قاتاڭ تاپسىردى.
قاسىم-جومارت كەمەل ۇلى توقايەۆ مەملەكەت جانە ۇلت ءۇشىن وسىنداي قيىن قىستاۋ ۋاقىتتا كورەگەندىك تانىتىپ، ستراتەگيالىق شەشىمدەر قابىلداپ، ەلدە بولعان قاسىرەتتى وقيعادان ساباق الۋ كەرەك ەكەنىن ايرىقشا اتاپ ءوتتى.
ەڭ باستىسى، مەملەكەت باسشىسى ەلدەگى ازاماتتاردىڭ ارىز-وتىنىشتەرىن ەسكەرەتىن، «تىڭداۋشى مەملەكەت» قاعيداسىن دامىتىپ، الەۋمەتتىك مەملەكەت قۇرۋدى، باعا تۇراقسىزدىعى مەن قىمباتشىلىقتى، ۇلتتىق ۆاليۋتانىڭ ديەۆالۆاسياسىن جانە ينفلياسيانى اۋىزدىقتاۋدى، وليگارحيالىق ادىلەتسىز جۇيەنى جويۋدى، ەلدىڭ ىشكى قاۋىپسىزدىگى مەن سىرتقى قورعانىسىن قامال ەتۋدى ستراتەگيالىق مىندەتتەر رەتىندە الۋى قازاقستاندى تۇراقتىلىق پەن بەيبىتشىلىككە، ەكونوميكالىق دامۋ مەن گۇلدەنۋگە الىپ باراتىنىنا كامىل سەنەمىز.