اتىراۋداعى قۇرىلتايدا قوعامدىق توپتاسۋ مەن جالپىۇلتتىق قۇندىلىقتاردى دامىتۋ تاقىرىپتارى ارقاۋ بولدى. بۇل رەتتە، مەملەكەت باسشىسى قاسىم-جومارت توقايەۆ «حالىقتىڭ بەرەكە-بىرلىگىن ساقتاۋ ەلدىگىمىز ءۇشىن اسا ماڭىزدى» ەكەنىن ايتىپ، وعان قاجەتتى العىشارتتار مەن ناقتى ىستەرگە توقتالدى.
ۇلتىمىز ءۇشىن ماڭىزدى ونوماستيكا، ءتول تاريح، رۋحانيات، قازاق ءتىلى، كرەاتيۆتى يندۋستريا، ۇلتتىق بىرەگەيلىگىمىزدى نىعايتۋ، كىتاپ وقيتىن ۇلتقا اينالۋ ماسەلەلەرى دە پرەزيدەنت نازارىنان تىس قالمادى. «وزىق ويلى ەلگە اينالۋدىڭ توتە جولى – كىتاپ وقۋ» ەكەنىن ەكپىن تۇسىرە ەسكە سالدى.
ءبىزدىڭ باي تاريحي-مادەني مۇرامىزدى ساقتاۋ، تاريحي جادىگەرلەرىمىزدى شەتەل مۇراجايلارىنان قازاقستانعا قايتارۋ جۇمىستارىن جانداندىرۋ، ارحەولوگيا سالاسىنا قاتىستى زاڭداردى جەتىلدىرۋ تۋرالى كەلەلى ويلار ورتاعا سالىندى. اسىرەسە، پرەزيدەنت «ۇلتتىڭ جاڭا ساپاسىن قالىپتاستىرۋ، جاعىمسىز ادەتتەردەن ارىلۋ، ەسىرتكى زاتتارىن وندىرەتىن ادامداردىڭ جازاسىن بارىنشا قاتاڭداتىپ، ونى ەڭ اۋىر قىلمىستارعا تەڭەستىرۋ» قاجەتتىگىن تىلگە تيەك ەتىپ، پارلامەنتتى بۇل باستامانى قولداۋعا شاقىردى.
مەملەكەت باسشىسى «ءبىز ناشاقورلىققا جانە ەسىرتكى بيزنەسىنە قارسى كۇرەسۋ ءۇشىن كەشەندى جوسپار قابىلدادىق. ۇكىمەت لۋدومانيامەن كۇرەسكە قاتىستى ءدال سونداي جوسپار قابىلداۋى كەرەك”،- دەدى. قۇمارپازدىققا زاڭ جۇزىندە شەكتەۋ قويۋ قاجەتتىگىن ايتتى. پارلامەنتتە قارالىپ جاتقان سول جوبانى وسى سەسسيانىڭ سوڭىنا دەيىن قابىلداۋ قاجەت» ەكەنىن دە ايرىقشا اتاپ ءوتتى.
وسى ورايدا، «زاڭ مەن ءتارتىپ ساقتالۋعا ءتيىس، ياعني قوعامدا زاڭ ۇستەمدىگى بولۋى قاجەت» دەگەن پرەزيدەنت ۇستانىمى – باستى باعدار بولماق. بۇل مەملەكەت باسشىسى ۇسىنعان «ادىلەتتى قازاقستان – ادال ازامات – وزىق ويلى ۇلت» ءۇشتاعان ۇعىمىن بارىنشا تياناقتاي تۇسەدى.