زاڭدارعا ەنگىزىلەتىن تۇزەتۋلەر اياسىندا ۆەيپ جانە ناسىباي تاراتقانى ءۇشىن قىلمىستىق جاۋاپكەرشىلىككە تارتۋ كوزدەلگەن. وسى قادام ناسىبايعا تولىق تىيىم سالۋعا مۇمكىندىك بەرەدى. بۇل تۋرالى ۇلتتىق قۇرىلتاي وتىرىسىندا پرەزيدەنت قاسىم-جومارت توقايەۆ ايتتى، دەپ حابارلايدى اlmaty-akshamy.kz.
«دەنساۋلىققا زيان ءارى ۇيات ادەتتىڭ ءبىرى – ناسىباي اتۋ. ونىڭ قالاي جاسالاتىنى بەلگىلى. ەشقانداي سانيتارلىق تالاپ ساقتالمايدى. قۇرامىندا ءتۇرلى دەرتتى، ونىڭ ىشىندە ونكولوگيالىق اۋرۋلاردى قوزدىراتىن زاتتار بار. ناسىبايدى وندىرۋگە جانە تاراتۋعا 2015 جىلى تىيىم سالىنعان. ءبىراق ءالى كۇنگە دەيىن كوشەدە، ءتىپتى ازىق-تۇلىك دۇكەندەرىندە اشىق ساتىلىپ جاتىر»، - دەدى قاسىم-جومارت توقايەۆ.
مەملەكەت باسشىسى اتالعان پروبلەماعا قاتىستى قۇقىق قورعاۋ مەكەمەلەرى ەشقانداي شارا قولدانىپ جاتپاعانىن سىنعا الدى.
«ءقازىر – 21 عاسىر، جوعارى تەحنولوگيا مەن جاساندى ينتەللەكتى قارقىندى دامىعان زامان. ال ءبىزدىڭ ازاماتتارىمىز اۋزىنا ناسىباي سالىپ، قاقىرىپ-تۇكىرىپ جۇرەدى. بۇل نە دەگەن ماسقارا؟! وسى جاعىمسىز قىلىقتى اتا ءداستۇرى سانايدى. شىن مانىندە، بۇل بارىپ تۇرعان مادەنيەتسىزدىك. ونى توقتاتۋ قاجەت. جالپى، ناسىباي ءوندىرىپ، تاراتقانى ءۇشىن زاڭ جۇزىندە بەلگىلەنگەن جاۋاپكەرشىلىك تىم تومەن. ءقازىر وسىعان قاتىستى زاڭدارعا تۇزەتۋ ەنگىزۋ ماسەلەسى قاراستىرىلىپ جاتىر. وندا ۆەيپ قانا ەمەس، ناسىباي تاراتقانى ءۇشىن دە قىلمىستىق جاۋاپكەرشىلىككە تارتۋ كوزدەلگەن. بۇل قادام ناسىبايعا تولىق تىيىم سالۋعا مۇمكىندىك بەرەدى. سونداي-اق، اقپارات قۇرالدارى ارقىلى جان-جاقتى ءتۇسىندىرۋ جۇمىسى جۇرگىزىلۋى ءتيىس. بۇل - ۇلت ساۋلىعىنا دا، ەلىمىزدىڭ ابىروي-بەدەلىنە دە كەرى اسەرىن تيگىزەتىن ادەت. وركەنيەتتى ەل بولامىز دەسەك، ودان تولىق ارىلۋىمىز كەرەك»، - دەدى پرەزيدەنت.