تەكسەرۋ كوميسسياسىنىڭ وكىلدەرى راستاپ وتىر.
الماتىدا سپورتتىق جانە شىعارماشىلىق تاپسىرىستى جۇزەگە اسىرۋ بويىنشا قوعامدىق جۇمىس توبىنىڭ كەزەكتى وتىرىسى ءوتتى. شارا باراسىندا الماتى اكىمىنىڭ ورىنباسارى ارمان قىرىقبايەۆ ارتسپورت جۇيەسى بويىنشا ماسەلەلەر بارىن ايتتى، دەپ حابارلايدى Almaty-akshamy.kz.
«وزدەرىڭىز بىلەسىزدەر، 2022 جىلى قولدانىستاعى ۆاۋچەرلەر بويىنشا جەتكىزۋشىلەرگە قىزمەتتەردى تولەۋ ءۇشىن اعىمداعى جىلدىڭ قىركۇيەگىنە دەيىن بولىنگەنى - 11،7 ملرد تەڭگە. بۇگىنگى تاڭدا artsport.edu.kz سايتىنىڭ دەرەكتەرى بويىنشا شۇعىلدانۋشىلار سانى 83 مىڭ بالانى قۇرايدى، ونىڭ 35،5 مىڭى سپورتپەن جانە 47،5 مىڭى شىعارماشىلىقپەن اينالىسادى. 27 قىركۇيەكتەگى جاعداي بويىنشا اكىمدىكتە ۇسىنىلعان اكتىلەر نەگىزىندە بيىلعى جىلدىڭ ماۋسىم ايىنان تامىز ايىنىڭ سوڭىنا دەيىن كورسەتىلگەن قىزمەتتەر ءۇشىن 2،2 ملرد تەڭگە كولەمىندە بەرەشەك بار»، - دەدى ارمان قىرىقبايەۆ.
قالا اكىمىنىڭ ورىنباسارى الماتى قالاسى اكىمدىگىنىڭ بيۋدجەت كوميسسياسى بۇل سومانى ماقۇلداپ، ءوتىنىم ءماسليحاتقا جىبەرىلگەنىڭ ايتتى.
«ءماسليحات وتىرىسى 30 قىركۇيەكتە وتەدى. دەپۋتاتتار بۇل ءوتىنىشتى قولدايدى دەپ ۇمىتتەنەمىز. وسى سەبەپتى اكىمدىكتىڭ بەرەشەگى ماسەلەسى شەشىلگەن، ياعني ءماسليحات جۇما كۇنى ماقۇلداعاننان كەيىن، ءبىز ودان ءارى راسىمدەردىڭ جىلدام وتۋىنە جانە بارلىق جەتكىزۋشىلەرمەن ەسەپ ايىرىسۋعا تىرىسامىز. ءبىراق، وزدەرىڭىز بىلەتىندەي، جالپى، ارتسپورت جۇيەسى بويىنشا وتە ماڭىزدى ماسەلەلەر بار. مۇنى پروكۋراتۋرا مەن تەكسەرۋ كوميسسياسىنىڭ وكىلدەرى دە راستاپ وتىر»، - دەدى اكىمنىڭ ورىنباسارى.
ءارى قاراي ارمان قىرىقبايەۆ سپورت جانە مادەنيەت باسقارمالارىنىڭ مىندەتتەمەلەرى زاڭناماعا جانە باعدارلامانى ىسكە اسىرۋدىڭ قولدانىستاعى قاعيدالارىنا قاتاڭ سايكەستىكتە ورىندالاتىنىن ايتتى.
«ءقازىر تەكسەرۋ كوميسسياسى مەن پروكۋراتۋرانىڭ الدىن الا دەرەكتەرىن ەسكەرە وتىرىپ، جىل سوڭىنا دەيىن قاجەتتى بولجامدى قاراجات كولەمى 8،5 ملرد تەڭگەدەن 5 ملرد تەڭگەگە دەيىن تومەندەگەنىن تۇسىنەمىز. جاقىن ارادا تەكسەرۋ بارىسىندا ءبىز بۇل كورسەتكىشتىڭ ودان دا ازاياتىنىنا سەنىمدىمىز. بۇل كەيبىر جەتكىزۋشىلەرمەن جانە كەم دەگەندە جۇيەنىڭ وزىندە كۇردەلى پروبلەمالاردىڭ بار ەكەندىگىن كورسەتەدى. بۇل تۋرالى ءبىز بۇرىننان ايتىپ كەلەمىز. دەگەنمەن، باسقارمالار اكسەپتەگەن ۆاۋچەرلەر بويىنشا بارلىق مىندەتتەمەلەر، ەگەر ءسوز الماتى قالاسىندا تۇراتىن جانە تىركەلگەن، سەكسيالار مەن ۇيىرمەلەرگە ناقتى قاتىسقان ادال جەتكىزۋشىلەر، ناقتى بار بالالار تۋرالى بولعان جاعدايدا عانا ورىندالاتىنىن حابارلاعىمىز كەلەدى»،- دەدى ارمان قىرىقبايەۆ.
ونىڭ ايتۋىنشا، قاۋىپ-قاتەر نەگىزىندە ەشقانداي تولەمدەر، ونىڭ ىشىندە ميتينگىلەر، دۇرلىكپە، حايپ جانە ت.ب. جۇرگىزىلمەيدى.
بارلىعى زاڭ نەگىزىندە، تەكسەرۋ كوميسسياسى مەن پروكۋراتۋرا ايتقان تەكسەرۋلەردىڭ ناتيجەلەرىنە سۇيەنە وتىرىپ، جالعان اقپاراتتىڭ بارلىق تۇرلەرىن قوسپاعاندا، ياعني قاتاڭ تۇردە بەلگىلەنگەن ەرەجەلەر اياسىندا تولەنەدى.
«ەل پرەزيدەنتىنىڭ تاپسىرماسى ءبىز ءۇشىن ءابسوليۋتتى باسىمدىق بولىپ تابىلادى جانە ول كەز كەلگەن جاعدايدا ورىندالادى. ءبىز كەيبىر جاڭا ەرەجەلەردى مينيسترلىك ازىرلەگەنىن نەمەسە ءالى دە ازىرلەنىپ جاتقانىن بىلەمىز، ءبىراق بۇل كەلەسى جىلدىڭ ماسەلەسى. ءقازىر ءبىز قولدانىستاعى ەرەجەلەر بويىنشا جۇمىس ىستەيمىز»، - دەدى ارمان قىرىقبايەۆ.