«تاعزىم» - جاڭا داۋىردەگى تاعدىرىمىزدى انىقتاۋ.
بەلگىلى مەملەكەت جانە قوعام قايراتكەرى نۇرلان ورازالين الماتى شاھارىندا اشىلعان «تاعزىم» اتتى مەموريالىنا بايلانىستى ءوز پىكىرىن ورتاعا سالدى، دەپ حابارلايدى Almaty-akshamy.kz.
ارعى كەڭەستىك ءداۋىردى، بەرگى تاۋەلسىزدىك ءداۋىرىن ايتپاعان كۇننىڭ وزىندە، الماتى - ەجەلدەن تامىرىن تەرەڭنەن تارتاتىن، تاۋ-تاسى، توپىراعىنا دەيىن سويلەپ جاتقان ۇلى شاھارىمىز. مىنە، كەيىنگى وتىز جىل ەنشىلەپ بەرگەن ءبىزدىڭ الماتى - ازاتتىعىمىزدىڭ التىن بەسىگى دەگەن كيەلى ۇعىممەن ۇلت جادىندا جاتتالا باستادى.
وسى جىلدىڭ باسىندا ورىن العان قاڭتار وقيعاسى سول التىن بەسىگىمىزدىڭ باسىنا عانا ەمەس، الاش جۇرتىنىڭ باسىنا قايعى بۇلتى بولىپ ءۇيىرىلىپ، قابىرعامىزدى قايىستىراعانىن قالاي جاسىرامىز. بۇل وقيعاعا مەملەكەتتىك تۇرعىدان، حالىقتىق نەمەسە ۇلتتىق تۇرعىدان قاراساق تا، ءبىزدىڭ ۇلى شەجىرە-تاريحىمىزعا ەنگەن قاسىرەتتى كۇندەر. كەشە الماتى تورىندە «تاعزىم» اتتى مەموريال اشىلدى. ونىڭ سالتاناتتى اشىلۋىندا ءسوز سويلەگەن پرەزيدەنتىمىز قاسىم-جومارت كەمەل ۇلى توقايەۆ ىرگەلى كەشەننىڭ سول ەل ءىشىن ءبىر ساتتە تەڭسەلتىپ تاستاعان قارالى كۇندەردى ۇمىتپاۋ، ودان ساباق الۋ جانە كەلەر ۇرپاقتىڭ قايتالاماۋى ءۇشىن اشىلعانىن اتاپ ءوتتى.
«تاعزىم» وتكەنىمىزدەن ساباق بەرەتىندەي، قاتەمىزدى، جىبەرگەن "اتتەگەن-ايلارىمىزدى" كوز الدىمىزعا تاعى ءبىر مارتە اكەلەتىن جانە ۇلت رەتىندە، ۇرپاق رەتىندە بىزگە ۇياتىمىزدى بەكىتە باستايتىن، ەكىنشىدەن، قايعى-قاسىرەتىمىزدەن قورىتىندى شىعاراتىنداي، نامىسىمىزدى قامشىلايتىنداي ادەمى ءبىر ارحيتەكتۋرالىق كەشەن بولىپ شىعىپتى. ءبىز مۇنى كورىپ وتىرىپ، كەشەگى قاڭتار قاسىرەتى كەزىندە جاساعان قاتەلىكتەرىمىزدى تانيمىز.
الماتىنىڭ ءار تاسى، ءار كوشەسى وسىعان دەيىن قالاي تاريح بولىپ، تۇلعالاردىڭ تاعدىرى بولىپ سويلەپ، كەشەگى اۋىر كۇندەردىڭ كوزىندەي بولىپ، ءتىل قاتىپ وتىرسا، مىنا «تاعزىم» جاڭا داۋىردەگى تاعدىرىمىزدى انىقتاۋ، باعىتىمىزدى بەلگىلەۋگە، بىرىگىپ وتىرىپ جاڭا سيپاتتاعى جاڭا قوعامدا قالاي جاساۋ كەرەك دەگەن ساۋالدارعا جاۋاپ تابۋعا كومەكتەسەتىن تىڭ كەشەن دەپ ويلايمىن. ءتىپتى، ەرتە داۋىردەگى كۇلتەگىننىڭ، كەشەگى بۇقار جىراۋدىڭ، تولە ءبيدىڭ، قاز داۋىستى قازىبەك ءبيدىڭ، بەرتىندەگى الاشوردا كوسەمدەرى ءاليحان بوكەيحانوۆ، مۇحتار اۋەزوۆتىڭ، كۇنى كەشە قاتارىمىزدا جۇرگەن اقيىق اقىن مۇقاعالي ماقاتايەۆ سىندى تۇلعالاردىڭ قاشاپ جازىلعان ۇلاعاتتى سوزدەرى وتانشىل ۇلتتىق ۇرپاقتى تاربيەلەۋگە جانە ارتىڭا بۇرىلىپ قاراپ وتىرىپ، الدىڭداعى جولىڭدى اداسپاي تابۋعا كومەكتەسەتىن كەشەن بولدى بۇل.
بۇل كەشەگى «قاڭتار وقيعاسىنىڭ» عانا قاسىرەتىن ەسكە سالىپ قويماي، ءوزىمىزدى تانۋعا جەتەلەيدى. بۇل پوەتيكالىق ۇلتتىڭ ءوز مۇمكىندىگىن ءوزى باعالاۋعا باعىتتايتىن ۇلكەن ماعىنالى تۋىندىنىڭ دۇنيەگە كەلگەنىن اڭعارتادى.
سوندىقتان ايبىنى مىقتى، ايدىنى كەڭ، تامىرى تەرەڭ، تۇرپاتى بولەك حالىقتىق رۋحتاعى مەموريالدىق كەشەن ۇلكەن-كىشىگە وي سالارى ءسوزسىز.
