شەتەلدە قولدانىلاتىن جوعارى تەحنولوگيالىق ونكولوگيالىق وتانىڭ ءبارى الماتى ونكولوگيالىق ورتالىعىندا دا جاسالادى – ونكوحيرۋرگ نۇرلان بالتايەۆ
وكق بريفينگىندە ءسوز العان الماتى ونكولوگيالىق ورتالىعىنىڭ حيرۋرگيالىق قىزمەتىنىڭ باسشىسى نۇرلان بالتايەۆ ورتالىقتا ناۋقاستاردى ەمدەۋ ءۇشىن سوڭعى تەحنولوگيالار قولدانىلىپ جاتقانىن، ورتالىق ماماندارى جىل سايىن شەتەلدىك تاجىريبەدەن ءوتىپ، بىلىكتىلىگىن ارتتىراتىنىن اتاپ ءوتتى.
«ءبىزدىڭ كەيبىر وتانداستارىمىز مەديسينالىق تۋريزممەن الىس-جاقىن شەتەلگە بارادى. دەگەنمەن ول جاقتا كورسەتىلەتىن كومەكتى ءبىزدىڭ ەلدە دە تەگىن الۋعا بولادى. الەمدە بار ءادىستىڭ ءبارىن ءبىز ورتالىقتا قولدانامىز. ءبىز ۇزاق ۋاقىت بويى بارلىق ورگانعا شاعىن ءينۆازيۆتى حيرۋرگيالىق ادىستەردى قولدانىپ كەلەمىز. ءبىز قاشاندا شەتەلدەن كەلگەن ارىپتەستەرىمىزبەن تاجىريبە الماسامىز، ولار ءبىزدىڭ دەڭگەيىمىزدى، اسىرەسە لاپاروسكوپيالىق حيرۋرگيانى جوعارى باعالايدى. بەس جىل بۇرىن شاعىن ءينۆازيۆتى حيرۋرگيا، ياعني كەسۋسىز جاسالاتىن وتا، بىزدە 10 پايىز بولعان. ءقازىر بىزدە جاسالاتىن بارلىق وتانىڭ 50 پايىزدان استامى شاعىن ءينۆازيۆتى ادىسپەن جاسالادى. ونىڭ ۇستىنە بۇل وتانىڭ بارلىعىنا مەملەكەت كەپىلدىك بەرەدى»، – دەيدى مامان.
ونىڭ ايتۋىنشا، ونكولوگيا تەك حيرۋرگيالىق جولمەن ەمدەلەتىن اۋرۋ ەمەس، ونكولوگيالىق اۋرۋدى ەمدەۋ قيىن ءارى قىمبات.
وتادان باسقا، ناۋقاسقا حيميوتەراپيا جانە ساۋلەلىك تەراپيا قاجەت بولۋى مۇمكىن.
مۇنىڭ بارلىعى، ارينە، شەتەلدە قىرۋار قارجىنى قاجەت ەتەدى.
وڭتۇستىك كورەيا، تۇركيا نە گەرمانيادا قولدانىلاتىن بارلىق زاماناۋي تەحنولوگيا ءبىزدىڭ تۇرعىندارعا تەگىن بەرىلەدى.
تەك 2023 جىلدىڭ وزىندە الماتى ونكولوگيالىق ورتالىعىندا 2681 حيرۋرگيالىق ارالاسۋ جاسالعان. وتالاردىڭ 55% شاعىن ءينۆازيۆتى ءادىستى قولدانۋ ارقىلى جاسالدى.
بۇگىندە ونكولوگيالىق ورتالىقتا حيميوتەراپيانىڭ 50-گە جۋىق ءتۇرى، 40-تان استام ماقساتتى جانە گورموندىق پرەپارات قولدانىلىپ، سونىڭ ارقاسىندا 18 790 ناۋقاس حيميوتەراپيالىق ەم العان.
قاتەرلى ىسىككە شالدىققان 1064 ناۋقاسقا 19 مىڭعا جۋىق ساۋلەلىك تەراپيا سەانسى جاسالدى.
10 مىڭعا جۋىق ادام امبۋلاتورلىق حيميوتەراپيا كابينەتىندە ەم الدى.
ءسوز سوڭىندا ساراپشى سكرينينگتىك تەكسەرۋدەن ءوتۋدىڭ ماڭىزدىلىعىنا توقتالدى.
«ەمدەۋدى ىزدەگەن كەيبىر ادام بالامالى مەديسيناعا جۇگىنە باستايدى، سول ارقىلى اۋرۋدىڭ اسقىنۋ پروسەسىن وتكىزىپ الادى. ءبىزدىڭ ەلىمىزدە ارنايى تەگىن سكرينينگتىك باعدارلامالار بار. قاتەرلى ىسىكتى ەرتە كەزەڭدە انىقتاۋ ءۇشىن پروفيلاكتيكالىق تەكسەرۋدەن ءوتۋ كەرەك. اۋرۋدى ەرتە انىقتاعان جاعدايدا عانا 90 پايىز ەمدەلۋگە كەپىلدىك بەرىلەدى. دارىگەرلەر شاقىرسا، ارنايى تەكسەرۋدى وتكىزىپ الماڭىز. تاعى دا قايتالاپ ايتامىن، قاتەرلى ىسىك نەعۇرلىم ەرتە انىقتالسا، ەمدەۋدىڭ ناتيجەسى سوعۇرلىم جاقسى بولادى»، - دەپ تۇيىندەدى ءسوزىن ن.بالتايەۆ.
ەسىڭىزگە سالا كەتەيىك، الماتى ونكولوگيالىق ورتالىعىندا دارىگەرلەردىڭ ءبىلىمى مەن بىلىكتىلىگىن ارتتىرۋ، ونكولوگيالىق اۋرۋلاردى ەمدەۋدىڭ جاڭا تەحنولوگيالارىن ەنگىزۋ جۇمىستارىنا ەرەكشە نازار اۋدارىلادى جانە ونىڭ بارلىعى ەۋروپالىق ستاندارتتارعا سايكەس كەلەدى.