وسك كانديدات رەتىندە تىركەۋدى ۋاقىتشا توقتاتا تۇراتىنىن جەتكىزدى.
ورتالىق سايلاۋ كوميسسياسى پرەزيدەنت سايلاۋىنا ۇمىتكەر نۇرجان التايەۆتى كانديدات رەتىندە تىركەۋدى توقتاتۋ جونىندە شەشىم قابىلدادى، دەپ حابارلايدى Almaty-akshamy.kz وسك سايتىنا سىلتەمە جاساپ.
"كانديدات نۇرجان باۋىرجان ۇلى التايەۆتىڭ ق ر كونستيتۋسياسىندا جانە ق ر "سايلاۋ تۋرالى" زاڭدا قويىلاتىن تالاپتارعا سايكەستىگىن انىقتاۋدى توقتاتا تۇرۋ جونىندە شەشىم قابىلدادىق"، - دەدى ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ.
سونداي-اق، وتىرىس بارىسىندا اتالعان شەشىمگە تۇسىنىك بەرىلگەن.
سايلاۋ كوميسسياسىنىڭ مۇشەسى شاۆكات وتەمىسوۆتىڭ ايتۋىنشا، نۇرجان التايەۆتى "مۇقالماس" رەسپۋبليكالىق قوعامدىق بىرلەستىگى ق ر پرەزيدەنتى سايلاۋىنا كانديدات رەتىندە ۇسىنىپ وتىر.
"ءبىز كانديدات تاپسىرعان قۇجاتتاردى قۇزىرلى ورگاندارعا جىبەرىپ سايكەستىگىن انىقتادىق. كەشە استانا قالالىق سوتى بىزگە ن.التايەۆتى كانديدات رەتىندە قابىلداۋ تۋرالى حاتتامانى ۋاقىتشا توقتاتۋ تۋرالى ۇيعارىمىن ۇسىندى. سول سەبەپتەن ورتالىق سايلاۋ كوميسسياسى نۇرجان التايەۆتى كانديدات رەتىندە تىركەۋدى ۋاقىتشا توقتاتا تۇرادى"، - دەدى ورتالىق سايلاۋ كوميسسياسىنىڭ مۇشەسى شاۆكات وتەمىسوۆ.
ايتا كەتەيىك، 7 قازاندا قازاقستان رەسپۋبليكاسىنىڭ پرەزيدەنتتىگىنە كانديدات رەتىندە نۇرجان التايەۆ وسك-عا قۇجاتتارىن تاپسىرعان ەدى.