وتانداسىمىز توكيو وليمپياداسى تۋرالى ويىمەن ءبولىستى
ەركىن كۇرەستەن توكيو وليمپياداسىنىڭ قولا جۇلدەگەرى نۇريسلام سانايەۆ «التىن سامعاۋ-2021» ۇلتتىق سپورتتىق جۇلدەسىنە ۇمىتكەرلەر قاتارىندا، دەپ حابارلايدى Almaty-akshamy.kz
بالۋاننىڭ ايتۋىنشا، ۇمىتكەرلەر ساناتىنا ەنۋ سپورتشىلاردى ودان ءارى جىگەرلەندىرە تۇسەدى.
«بيىلعى ماۋسىم سپورتشىلار ءۇشىن قاربالاسقا تولى بولدى. پاندەمياعا بايلانىستى ءبىر جىلعا شەگەرىلگەن توكيو وليمپياداسى ۇيىمداستىرىلىپ، ەلىمىزدىڭ نامىسىن ابىرويمەن قورعادىق.
ءاربىر سپورتشى ءۇشىن وليمپيادادان جۇلدە الۋ - ۇلكەن ارمان. سول ارمانىما قول جەتكىزىپ، جانكۇيەرلەردى قۋانتۋ باقىتى بۇيىرعانىنا تاۋبە دەيمىن.
ءبىزدىڭ ەڭبەگىمىزدى ەلەپ-ەسكەرىپ، جۇلدەگە ۇمىتكەرلەر تىزىمىنە قوسقان ۇلتتىق وليمپيادالىق كوميتەتكە راحمەت. قاربالاسقا تولى ماۋسىمدى جوعارى نوتادا اياقتاۋعا مۇمكىندىك بەرگەنى ءۇشىن العىسىم زور»، - دەدى ول.