الماتى مەن الماتى وبلىسى شەكاراسىندا ءنومىرسىز كولىكپەن قارسى باعىتتا جۇرگەن پوليسيا قىزمەتكەرى جازالاندى
ونىڭ ۆيدەوسى الەۋمەتتىك جەلىدە تارادى. وقيعا 2 جەلتوقساندا تاڭەرتەڭ تالعار تاسجولى بويىندا بەساعاش اۋىلىنىڭ ماڭىندا بولعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
وقيعا كۋاگەرى تاڭعى ساعات 7.00 شاماسىندا «Mercedes» جۇرگىزۋشىسىنىڭ كەپتەلىس كەزىندە قارسى جولاققا قالاي شىققانىن كامەراعا ءتۇسىرىپ العان. جەلى قولدانۋشى جۇرگىزۋشىنىڭ پوليسيا فورماسىندا جانە كولىكتىڭ ءنومىرسىز بولعانىن ايتتى. الماتى قالالىق پوليسيا دەپارتامەنتى جاعدايعا قاتىستى پىكىر ءبىلدىردى. ۆەدومستۆونىڭ مالىمەتىنشە، ۆيدەوعا پاترۋلدىك پوليسيا پولكىنىڭ قىزمەتكەرى ءتۇسىپ قالعان. ول ءبىرقاتار جول قوزعالىسى ەرەجەسىن بۇزعان.
«قىزمەتكەر اكىمشىلىك جاۋاپكەرشىلىككە تارتىلدى. قازىرگى ۋاقىتتا بۇل فاكت بويىنشا قىزمەتتىك تەكسەرىس جۇرگىزىلىپ جاتىر. پوليسەيدىڭ ارەكەتىن الماتى پوليسيا دەپارتامەنتىنىڭ تارتىپتىك كوميسسياسى قارايدى، ءارى قاراي شارالار قولدانىلادى»، - دەپ حابارلادى قالالىق پوليسيا دەپارتامەنتىنىڭ باسپا ءسوز قىزمەتى.