چەمپيونات كەلەسى جىلى ءوتۋى مۇمكىن
قازاقستاننىڭ جەڭىل اتلەتيكا فەدەراسياسى جەڭىل اتلەتيكادان 10-شى ازيا چەمپيوناتى وتكىزىلەتىن داتانى كەيىنگە شەگەردى، دەپ حابارلايدى Almaty-akshamy.kz.
ۇلتتىق وليمپيادا كوميتەتىنىڭ باسپا ءسوز قىزمەتى حابارلاعانداي، مۇنداي شەشىم «وميكرون-شتامم» ينفەكسياسىنىڭ ءورشي تۇسۋىنە بايلانىستى قابىلداندى.
قازاقستان استاناسى ازيا چەمپيوناتىن وسى جىلدىڭ اقپان ايىندا قابىلداپ الۋى كەرەك ەدى. جارىس 2023 جىلعا جوسپارلانعانى ايتىلادى.
«تۇسىنىستىكپەن قاراعاندارىڭىز ءۇشىن ريزاشىلىق بىلدىرەمىز ءارى كەلەسى جىلى چەمپيوناتتا وزدەرىڭىزبەن ەمىن-جارقىن جۇزدەسەمىز دەپ ۇمىتتەنەمىز»،-دەدى قازاقستاننىڭ جەڭىل اتلەتيكا فەدەراسياسى.