اباي كۇنى الماتى قالاسى بويىنشا قىلمىستىق اتقارۋ جۇيەسى دەپارتامەنتىنە قاراستى لا-155/6 تۇزەۋ مەكەمەسىندە دە ۇلى اقىنعا ارنالعان ونلاين ءىس-شارا ءوتتى، دەپ حابارلايدى almaty-akshamy.kz.
دالىرەك ايتساق، الماتى قالالىق «جاس وتان» جاستار قاناتىنىڭ ۇيلەستىرۋشىلەرى وسى مەكەمەدە جازاسىن وتەپ جاتقان بالالار اراسىندا ZOOM جۇيەسى ارقىلى «بەس نارسەگە اسىق بول» اتتى كونفەرەنسيا ۇيىمداستىردى. وندا بەيبارىس زاريپوۆ كولونياداعى جاسوسپىرىمدەردى ابايدىڭ ومىربايانىمەن تانىستىرىپ، ونىڭ عيبراتتى سوزدەرىنىڭ ءمان-ماعىناسىن اشاتىن اڭگىمە وتكىزدى. سونداي-اق، ول اقىن ومىرىنەن ءتۇرلى دەرەكتەرگە قانىقتىرىپ، سۇراق-جاۋاپ تاسىلىمەن بالالاردىڭ اباي تۋرالى دۇنيەتانىمىن ارتتىردى.
ءوز كەزەگىندە لا-155/6 تۇزەۋ مەكەمەسىندە جازاسىن وتەپ جۇرگەن جاسوسپىرىمدەر ابايدىڭ ولەڭدەرىن جاتقا وقىپ، ونەرلەرىن ورتاعا سالدى. جاس ءانشى تۇرار دۇيسەكەش اباي قۇنانبايەۆتىڭ سوزىنە جازىلعان اندەردى ورىنداپ، كەشكە قاتىسۋشىلاردىڭ كوڭىلىن ءبىر سەرپىلتتى.
اباي شىعارمالارى دا جازالى بالالاردىڭ ومىرىنە باعدارشام بولىپ، ولار جاماندىققا ەمەس، تەك جاقسىلىقتارعا اسىق بولىپ جۇرەدى دەپ بىلەمىز.