الماتى اكىمدىگى ن.ساس اتىنداعى تەاتر عيماراتىنىڭ قايتا جوندەۋ جۇمىستارى تۋرالى مالىمەت بەردى
الماتىدا ن.ساس اتىنداعى ورىس مەملەكەتتىك اكادەميالىق بالالار مەن جاسوسپىرىمدەر تەاترىنىڭ عيماراتىن جوندەۋ جۇمىستارى جاقىندا باستالادى. جوندەۋ جوباسى مەملەكەتتىك ساراپتامادان ءوتتى، قالا اكىمدىگى قۇرىلىس جۇمىستارىن جۇرگىزەتىن مەردىگەر ۇيىمدى انىقتاۋ ءۇشىن بايقاۋ جاريالادى.
الماتىنىڭ قۇرىلىس باسقارماسى جوبادا قانداي شەشىمدەر قاراستىرىلعانىن جانە ونى جۇزەگە اسىرۋعا نە ءۇشىن 21،7 ملرد تەڭگە بولىنگەنىن ءتۇسىندىردى.
«عيمارات 1980-جىلدارى سالىنعان جانە سودان بەرى وعان ەشقاشان كۇردەلى جوندەۋ جۇرگىزىلمەگەن. تەاتر ۇجىمى عيماراتتىڭ مۇشكىل جاعدايىنا قوعامنىڭ نازارىن بىرنەشە رەت اۋدارعان. قالا اكىمىنە جۇگىنگەننەن كەيىن ول مەگاپوليس ءۇشىن ماڭىزى زور نىساندى رەكونسترۋكسيالاۋعا تاپسىرما بەردى. تەحنيكالىق زەرتتەۋ بارىسىندا جابدىقتاردىڭ، ينجەنەرلىك جەلىلەردىڭ، شاتىردىڭ، قاسبەت تاقتالارىنىڭ جانە ىشكى ارلەۋ جۇمىستارىنىڭ ەداۋىر توزعانى انىقتالدى. شاتىردان اققان سۋ ساحنا مەن كورەرمەن زالىنا دەيىن جەتەدى، قاسبەتتىڭ تاقتالارى قۇلاپ، جۇرگىنشىلەرگە ءقاۋىپ ءتوندىرىپ وتىر، ال ەسكى ەلەكتر سىمدارى ءورت ءقاۋپىن تۋدىرادى. قازىرگى تاڭدا عيمارات قاۋىپسىزدىك تالاپتارىنا سايكەس كەلمەيدى جانە ەستەتيكالىق كورىنىسىن جوعالتقان»، – دەدى باسقارما باسشىسى الماس شابداربايەۆ.
رەكونسترۋكسيالاۋ جوباسى قوعام وكىلدەرى مەن ساراپشىلار اراسىندا كەڭىنەن تالقىلاندى. جوباعا سايكەس، تىرەك قۇرىلىمدارى نىعايتىلادى، شاتىر مەن قاسبەت تاقتالارى اۋىستىرىلادى، بارلىق ينجەنەرلىك كوممۋنيكاسيا جاڭارتىلادى. عيمارات تولىق اۆتوماتتى ءورت ءسوندىرۋ جۇيەسىمەن جابدىقتالادى. سونداي-اق، تەاتر جابدىقتارى، ساحنا، جارىقتاندىرۋ تولىقتاي جاڭارتىلىپ، ورىندىقتار اراسىنداعى وتپەلەر كەڭەيتىلىپ، مۇمكىندىگى شەكتەۋلى جاندار ءۇشىن قولايلى جاعداي جاسالادى.
«عيمارات جەرگىلىكتى ماڭىزعا يە تاريحي جانە مادەني ەسكەرتكىش بولعاندىقتان، ونىڭ ساۋلەت ەلەمەنتتەرىن قالپىنا كەلتىرۋ مەن ساقتاۋعا ەرەكشە نازار اۋدارىلدى. مىسالى، باستاپقى جوباعا سايكەس، حوللدىڭ ەدەن جابىنىنىڭ تاريحي كەلبەتى مەن عيماراتتىڭ فويەسىندەگى موزايكا دا قالپىنا كەلتىرىلەدى»، – دەدى باسقارما باسشىسى.
بۇل جۇمىستاردىڭ بارلىعى 14،6 مىڭ شارشى مەتر بولاتىن قولدانىستاعى عيماراتتى رەكونسترۋكسيالاۋ جۇمىستارى اياسىندا جۇرگىزىلەدى.
سونىمەن قاتار، جانىندا 10 مىڭ شارشى مەترلىك ءۇش قاباتتى جاڭا عيمارات سالىنادى. جاڭا عيماراتتا 200 ورىندىق ساحناسى بار زال، گريم بولمەلەرى، شەبەرحانالار مەن سەحتارعا ارنالعان بولمەلەر، دەكوراسيالاردى ساقتاۋعا ارنالعان قويمالار، كوركەمدىك جەتەكشى قىزمەتكەرلەرگە ارنالعان كابينەتتەر، بالالار تەاتر ستۋدياسىنا ارنالعان وقۋ ساحناسى مەن سىنىپتار ورنالاسادى. ەكى عيماراتتى گالەرەيالىق وتكەل بايلانىستىرادى.
تەاتر – كەڭسە عيماراتى ەمەس، سوندىقتان ونىڭ جارىقتاندىرۋ جابدىقتارى، دىبىس اپپاراتۋراسى، جەلدەتۋ جانە كونديسيونەرلەۋ جۇيەلەرى، دەكوراسيا مەحانيزمدەرى بار ساحنالار سياقتى ارنايى تەحنيكالىق جۇيەلەردى ورناتۋدى قاجەت ەتەدى. اكۋستيكا مەن جارىقتاندىرۋدى مونتاجداۋ ەرەكشە كۇردەلى جۇمىستىڭ ءبىرى. تەاتر – بۇل قۇرىلىم مەن تەحنيكاعا ۇلكەن جۇكتەمە تۇسەتىن ورىن، سوندىقتان جابدىقتاۋ قاتاڭ ستاندارتقا ساي بولۋى ءتيىس، بۇل اكتەرلەردىڭ، تەحنيكالىق قىزمەتكەردىڭ جانە كورەرمەندەردىڭ قاۋىپسىزدىگىن قامتاماسىز ەتەدى.
«بولىنگەن قاراجاتتىڭ قۇرىلىمىن قاراساق، ەكى عيماراتتى زاماناۋي جابدىقپەن تولىق قامتاماسىز ەتۋگە شامامەن 6 ملرد تەڭگە قاجەت. قولدانىستاعى عيماراتتى رەكونسترۋكسيالاۋعا 6 ملرد تەڭگە جانە جاڭا عيمارات سالۋعا شامامەن 9 ملرد تەڭگە قاراستىرىلعان. سونىمەن قاتار، ەكى عيماراتتى بايلانىستىراتىن گالەرەيا سالىنادى، سىرتقى جەلىلەر اۋىستىرىلادى جانە ىرگەلەس اۋماقتى كوگالداندىرۋ مەن كوركەيتۋ جۇمىستارى جۇرگىزىلەدى. بۇل اۋقىمدى جوبا، جۇمىس اياقتالعاننان كەيىن تەاتر قالانىڭ شىعىس بولىگىندە تۇرعىندار ءجيى كەلەتىن ورىنعا اينالادى دەپ سەنىممەن ايتۋعا بولادى»، – دەدى الماس شابداربايەۆ.
ايتا كەتەيىك، نەگىزگى عيماراتتىڭ رەكونسترۋكسيالاۋ جۇمىستارىن وسى جىلدىڭ سوڭىنا دەيىن اياقتاۋ جوسپارلانعان، ال جوبانىڭ تولىق اياقتالۋى 2026 جىلدىڭ ءبىرىنشى توقسانىنا بەلگىلەنگەن.
