تۇركىستان وبلىسىنىڭ وزبەكستانمەن شەكاراسىندا مىڭداعان توننا كارتوپ ءشىرىپ جاتىر، دەپ حابارلايدى aqshamnews.kz كتك-عا سىلتەمە جاساپ.
سەبەبى، پاۆلوداردان تاشكەنتكە جەتكىزىلۋگە ءتيىس كارتوپتى اۋىل شارۋاشىلىعى ءبولىمىنىڭ وكىلدەرى تەكسەرەمىز دەپ، سارىاعاش شەكاراسىندا توقتاتقان. ءسويتىپ ون كۇن بويى شەنەۋنىكتەر قۇجات تەكسەرىپ جۇرگەندە، 43 ۆاگونعا ارتىلعان كارتوپ بۇزىلا باستاپتى.
كارتوپ تيەگەن ۆاگوندار سارىعاشتىڭ تەمىر جولىندا تاپجىلماي ون كۇن تۇر. پاۆلوداردان شىققان جۇك پويىزىن فيتو-سانيتارلار 19 قاڭتار كۇنى توقتاتىپ، جۇكتىڭ قۇجاتى مەن ءونىمدى تەكسەرەمىز دەگەن. ءبىراق سول كۇيى ەشقايسىسى توبە كورسەتپەدى دەگەن كاسىپكەرلەر ارتىلعان كارتوپتىڭ كۇيىن كورۋ ءۇشىن ۆاگوندى اشىپ كوردى.
ازامات سەرىكبايەۆ، كاسىپكەر: — كارتوپتىڭ سۋى شىعىپ، ءىرىپ-شىرىپ جاتىر. بۇل قايتا سۋى قاتىپ تۇر، جىلىعا شىقسا بىردەن ءشىريدى. بۇل ەندى جارامسىز كارتوپ. ءبىر ۆاگوننىڭ وزىندە 68 توننا بار، سول 68 توننا ۆارتوپ ەندى جارامسىز. ون كۇننەن بەرى جاۋاپتىلاردان حابار كۇتىپ جۇرگەندەر ەندى بۇل شىرىگەن تاۋاردى تاپسىرىس بەرۋشىلەرگە «نە بەتىمىزبەن اپارامىز» دەپ كۇيىنەدى.
ءۇسىپ، بىلجىراپ كەتكەن كارتوپتى كەيبىرى لاقتىرىپ تا جاتىر. جالپى 43 ۆاگون كارتوپقا كاسىپكەرلەر قۇجاتتى 15 قاڭتارعا دەيىن جاساتقان. ال بۇل ءونىمدى ەلدەن تىس شىعارۋعا بولمايدى دەگەن قاۋلىنى اۋىل شارۋاشىلىعى مينيسترلىگى 18 قاڭتاردان باستاپ شىعارعان. سوندىقتان تەز بۇزىلاتىن ءونىمدى شەكارادا نەگىزسىز ۇستاپ تۇرعاندار كارتوبىمىزدى جارتى باعاسىنا ساتۋدى تالاپ ەتتى دەيدى.
نۇرسۇلتان ورمانوۆ، كاسىپكەر: — اكىمدىك بىزگە جارتى باعاسىنا سۇراپ تۇر. 100-150 تەڭگەدەن سۇرايدى. كەلىسىن 300-دەن العانبىز. كەلەم دەگەنشە، ءىرى كارتوپ 370 تەڭگەدەن كەلگەن، وسى جەرگە دەيىنگى شىعىنى. ولار 150 تەڭگەدەن سۇرايدى. بىلمەيمىز، ەندى نە ىستەيتىنىمىزدى. شىعىننىڭ ءبارى موينىمىزدا. ءقازىر ءۇش ۆاگوننان 60 ميلليون شىعىن شىعىپ تۇر. ول وڭاي اقشا ەمەس قوي.
ال ۆاگونداردى تۇرالاتىپ قويعان قۇزىرلى مينيسترلىك وسى ۋاقىتقا دەيىن «قۇجاتتاردى تەكسەردىك» دەيدى. ءبىراق تۇيتكىل بولماعان سوڭ، ەندى 43 ۆاگون دىتتەگەن جەرىنە جۇرە بەرسە بولادى دەپ وتىر.
ەربول تاسجۇرەكوۆ، ق ر اۋىل شارۋاشىلىعى ۆيسە-مينيسترى: — بۇگىنگى كۇنى مەنىڭ اقپاراتىم بويىنشا تەكسەرۋ جۇمىستارى ءبىتتى. قاجەتتى اقپاراتتار انىقتالدى. سوندىقتان بۇگىنگى كۇنگە ۆاگونداردىڭ سىرتقا كەتۋىنە ەشقانداي توسقاۋىل جوق. سوندىقتان ەكسپورتقا باعىتتالعان 43 ۆاگون كارتوپ ارتىلعان شەكارادان شىعىپ كەتە بەرەدى.
ون كۇن بويى تۇرالاپ تۇرعان ۆاگونداردىڭ جىلجۋىنا رۇقسات بەرىلدى. الايدا كارتوپتىڭ «جارامدىسىنان جارامسىزى كوپ» دەگەن كاسىپكەرلەر ەندى شىعىنىن ەسەپتەپ، تەز بۇزىلاتىن ءونىمدى تىم كوپ ۇستاعان شەنەۋنىكتەردى سوتقا بەرەمىز دەپ بەكىنىپ وتىر.