الماتى سيركى، حايۋانتتار باعى مەن ن.ساس اتىنداعى بالالار مەن جاسوسپىرىمدەرگە ارنالعان اكادەميالىق ورىس تەاترى قايتا جاڭارتىلادى
الماتى قالاسىن دامىتۋدىڭ 2025 جىلعا دەيىنگى جانە 2030 جىلعا دەيىنگى ورتا مەرزىمدى پەرسپەكتيۆالار باعدارلاماسىنىڭ جۇزەگە اسۋ بارىسى تۋرالى وكق بريفينگىندە قالا اكىمىنىڭ ورىنباسارى ارمان قىرىقبايەۆ ايتتى. ونىڭ ايتۋىنشا، جاڭا مادەني نىسانداردى اشۋ، سونداي-اق بۇرىننان بار نىسانداردى قايتا جاڭارتۋ جوسپارلانعان، دەپ حابارلايدى اlmaty-akshamy.kz.
قالادا 20 كىتاپحانا، «رايىمبەك باتىر» مۋزەي كەشەنى، «بورالداي ساق قورعاندارى» ارحەولوگيالىق پارك بازاسىندا ساق مادەنيەت ورتالىعى، «جاڭا عاسىر» جاستار تەاترىىن اشۋ جوسپارلانۋدا. سونداي-اق قازاق مەملەكەتتىك سيركىن، الماتى حايۋاناتتار باعىن، ن. ساس اتىنداعى مەملەكەتتىك بالالار مەن جاسوسپىرىمدەرگە ارنالعان اكادەميالىق ورىس تەاترىن قايتا جاڭارتۋ جوسپارلانعان.
سونىمەن قاتار، تاريحي-مادەني قۇندىلىقتاردى ساقتاۋ ماقساتىندا ا.بايتۇرسىن ۇلى مۋزەي-ۇيىن قالپىنا كەلتىرىلدى، د. قونايەۆ مۇراجايىنا كۇردەلى جوندەۋ جۇرگىزىلىپ، ەكسپوزيسيالارى جاڭارتىلدى. ع. مۇسىرەپوۆ مۋزەي-ۇيى قايتا ەكسپوزيسيالانىپ، س. مۇقانوۆ مۋزەي-ۇيىنىڭ ەكسپوزيسياسى جاڭارتىلدى.
ارمان قىرىقبايەۆ مادەنيەت نىساندارىنىڭ تاپشىلىعىن ەسكەرە وتىرىپ، الاتاۋ، ناۋرىزباي، جەتىسۋ جانە تۇركسىب اۋداندارىندا زاماناۋي كوۆوركينگ-ورتالىقتار فورماتىندا جاڭا كىتاپحانالار اشۋ جوسپارلانۋدا. ول ءۇشىن جىل سوڭىنا دەيىن 5 ءۇي-جاي ساتىپ الىنادى.
جاڭا كىتاپحانالاردا كوۆوركينگ-ورتالىقتىڭ، كىتاپحانانىڭ، ءار ءتۇرلى شەبەرلىك سىنىپتارىن ۇيىمداستىراتىن شىعارماشىلىق ايماقتىڭ، كرەاتيۆتى ءىس-شارالار تۇساۋكەسەرى مەن دارىستەر ايماعىنىڭ جۇمىسى كوزدەلەدى. جىل سوڭىنا دەيىن 2 كىتاپحانانى جاڭعىرتۋ جوسپارلانۋدا، ناتيجەسىندە جاڭعىرتىلعان كىتاپحانالاردىڭ كورسەتكىشى 90% - دى قۇرايدى.
سونداي-اق، ا.پ.چەحوۆ اتىنداعى ورتالىق قالالىق كىتاپحانا بازاسىندا كىتاپحانا پروسەستەرىن اۆتوماتتاندىرۋعا مۇمكىندىك بەرەتىن اۆتوماتتاندىرىلعان اقپاراتتىق-كىتاپحانالىق جۇيە ىسكە قوسىلدى. جىل سوڭىنا دەيىن وسى جۇيەگە تاعى 4 فيليالدى قوسۋ جوسپارلانۋدا.