ونىڭ ايتۋىنشا، «سيفرلىق نوتاريات» جوباسى نوتاريالدىق قىزمەتتەردى حالىققا بارىنشا قولجەتىمدى، ءقاۋىپسىز جانە ءتيىمدى ەتىپ، زاماناۋي تالاپتارعا ساي ەتەدى.
«الەۋمەتتىك تۇرعىدان تاعى ءبىر ماڭىزدى جوبا – نوتاريۋستىڭ اتقارۋشىلىق جازباسىن سيفرلاندىرۋ. بۇرىن بۇل ءراسىم تەك قاعاز تۇرىندە جۇرگىزىلىپ، ءبىرقاتار پروبلەما تۋعىزعان ەدى: نوتاريۋستار، ميكروقارجى ۇيىمدارى جانە جەكە سوت ورىنداۋشىلارى اراسىنداعى كەلىسىم جاعدايلارى؛ بورىشكەرلەردىڭ ماتەريالدارعا ۋاقتىلى قول جەتكىزە الماۋى؛ قارسىلىقتاردى جەدەل جىبەرۋدىڭ مۇمكىن ەمەستىگى؛ اۋماقتىق قاعيداتتىڭ بۇزىلۋى؛ جىل سايىن ادىلەت ورگاندارىنا 7 مىڭعا جۋىق شاعىم ءتۇسۋى. وسى ماسەلەلەرگە جاۋاپ رەتىندە بارلىق ىس-ارەكەتتى تىركەۋدى جانە تاراپتاردىڭ قۇقىقتارىن قورعاۋدى قامتاماسىز ەتەتىن سيفرلىق مەحانيزم ەنگىزىلدى»، – دەدى ب.مولدابەكوۆ.
بورىشكەردىڭ جەكە كابينەتى قۇرىلىپ، ول ارقىلى حابارلاما الۋ جانە قارسىلىق جىبەرۋ مۇمكىندىگى بەرىلدى. ەگەر قارسىلىق نەگىزدى بولسا، نوتاريۋس اتقارۋشىلىق جازبانى مىندەتتى تۇردە جويۋعا ءتيىس، ويتكەنى بۇل جاعدايدا قارىز داۋسىز بولىپ سانالمايدى. ناتيجەسىندە 19 800 اتقارۋشىلىق جازبا جويىلدى. بۇل ازاماتتاردىڭ قۇقىقتارىن قالپىنا كەلتىرۋ جانە تەرىس پايدالانۋدى جويۋ باعىتىنداعى ماڭىزدى قادام بولدى. وسىلايشا، ءراسىمنىڭ سيفرلاندىرىلۋى جۇيەنى ءادىل، اشىق ەتىپ، بارلىق قاتىسۋشىنىڭ قۇقىقتارىن قورعاۋعا باعىتتالعان.
قازاقستان رەسپۋبليكاسىنىڭ كونستيتۋسياسىنا سايكەس ءار ازاماتتىڭ قۇقىقتارى قورعالادى. ونى ىسكە اسىرۋ جانە تەگىن زاڭ كومەگىنىڭ قولجەتىمدىلىگىن ارتتىرۋ ماقساتىندا ادىلەت مينيسترلىگى «ە-زاڭ كومەگى» اتتى ءبىرىڭعاي سيفرلىق جۇيەنى قۇردى. بۇل جۇيە مەملەكەتتىك كەپىلدەندىرىلگەن زاڭ كومەگىن ەلەكتروندىق فورماتتا كورسەتۋگە مۇمكىندىك بەرەدى.