رەسپۋبليكا كۇنى قارساڭىندا، ياعني 25 قازان كۇنى الماتى پوليسياسى كۇشەيتىلگەن قىزمەت اتقارۋ تارتىبىنە كوشەدى.
قوعامدىق ءتارتىپتى ساقتاۋ ماقساتىندا مەرەكە كۇندەرى 3،5 مىڭ پوليسەي جۇمىلدىرىلادى. بۇل تۋرالى وڭىرلىك كوممۋنيكاسيالار قىزمەتى الاڭىندا الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك مالىمدەدى، - دەپ حابارلايدى Aqshamnews.kz.
سپيكەردىڭ ايتۋىنشا، الماتىداعى كريمينوگەندىك جاعداي تۇراقتى جانە باقىلاۋدا. ونىڭ دالەلى – قىلمىس دەڭگەيىنىڭ 12 پايىزعا تومەندەۋى. سونداي-اق اۋىر جانە اسا اۋىر قىلمىستاردىڭ اشىلۋ كورسەتكىشى دە جاقسارعان.
«ىشكى ىستەر ءمينيسترى اعىمداعى جىلدى «پروفيلاكتيكا جىلى»دەپ جاريالاعان بولاتىن. وسىعان وراي، ەرەكشە نازار قۇقىقبۇزۋشىلىقتاردىڭ الدىن الۋعا اۋدارىلىپ وتىر. اسىرەسە كامەلەتكە تولماعاندار اراسىنداعى قۇقىقبۇزۋشىلىقتاردىڭ، تۇرمىستىق جانجالدار مەن جول قوزعالىسى قاۋىپسىزدىگىنە قاتىستى قۇقىقبۇزۋشىلىقتاردىڭ الدىن الۋ باعىتىندا جۇمىستار جۇرگىزىلىپ جاتىر»، – دەدى سالتانات ازىربەك.
مەرەكەلىك كۇندەرى ىشكى ىستەر ورگاندارىنىڭ جەكە قۇرامى كۇشەيتىلگەن رەجيمدە قىزمەت اتقارادى.
بارلىق بولىمشەلەر – پاترۋلدىك پوليسيا، ۋچاسكەلىك ينسپەكتورلار، يۋۆەنالدى جانە كوشى-قون قىزمەتى، كينولوگتار مەن جەدەل بولىمشەلەر جۇمىسقا تارتىلادى.
قوعامدىق كولىكتە جانە ازاماتتار كوپ جينالاتىن ورىنداردا – ساياباقتاردا، الاڭداردا، ساۋدا-ويىن-ساۋىق ورتالىقتارىندا باقىلاۋ كۇشەيتىلەدى.
سپيكەردىڭ ايتۋىنشا، قالادا كولىك قوزعالىسىن شەكتەۋ جوسپارلانباعان. بۇل ماسەلە مەرەكەلىك ءىس-شارالار وتكىزۋ كەزىندە قالىپتاساتىن جاعدايعا بايلانىستى شەشىلەدى.
«پوليسيا قىزمەتى مەملەكەت باسشىسى قاسىم-جومارت توقايەۆ جاريالاعان «زاڭ جانە ءتارتىپ» قاعيداتى اياسىندا جۇمىس ىستەيدى. ءبىزدىڭ باستى مىندەتىمىز – ءاربىر الماتىلىق پەن قالا قوناعىنىڭ ءوزىن ءقاۋىپسىز سەزىنۋىن قامتاماسىز ەتۋ»، – دەپ اتاپ ءوتتى سپيكەر.
سونىمەن قاتار، پوليسيا پروفيلاكتيكالىق جانە ءتۇسىندىرۋ جۇمىستارىنا ەرەكشە كوڭىل بولۋدە. حالىقپەن كەزدەسۋلەر، وقۋ ورىندارىندا دارىستەر، اكسيالار مەن بىرلەسكەن ءىس-شارالار وتكىزىلىپ، قۇقىقتىق مادەنيەتتى ارتتىرۋعا باعىتتالعان جۇمىستار جۇرگىزىلۋدە.
الماتى پوليسياسى بۇقارالىق اقپارات قۇرالدارى جانە ازاماتتىق ينستيتۋتتارمەن بەلسەندى بىرلەسە حالىق اراسىندا قۇقىق قورعاۋ جۇيەسىنە دەگەن سەنىمدى نىعايتۋ جانە زاڭعا باعىنۋشىلىق مادەنيەتىن قالىپتاستىرۋ باعىتىندا جۇمىس ىستەيدى.
دەپارتامەنتتىڭ رەسمي وكىلى اتاپ وتكەندەي، پوليسيا بولىمشەلەرىنىڭ، جەرگىلىكتى اتقارۋشى ورگاندار مەن ازاماتتاردىڭ جەدەلدىگى ارقاسىندا الماتىداعى جەدەل جاعداي تۇراقتى ءارى بولجامدى دەڭگەيدە ساقتالىپ وتىر.