ءنومىرى كورىنبەيتىن كولىكتەرگە قانشا ايىپپۇل سالىنادى؟

بۇل تۋرالى الماتى پوليسيا دەپارتامەنتى وكىلدەرى مالىمدەدى.

ءنومىرى كورىنبەيتىن كولىك جۇرگىزۋشىسى جازالانۋى مۇمكىن، دەپ حابارلايدى Almaty-akshamy.kz

قىس مەزگىلىندە كەيبىر جۇرگىزۋشىلەر كولىكتەگى مەملەكەتتىك ءنومىردى تازالاۋ كەرەگىن ەلەي بەرمەيدى.

مۇنداي كولىك جۇرگىزۋشىلەرىنە اكىمشىلىك قۇقىقبۇزۋشىلىق تۋرالى كودەكستىڭ 590-بابى، 1-بولىگى «كولىك قۇرالدارىن پايدالانۋ ەرەجەلەرىن بۇزۋ» بويىنشا ايىپپۇل سالىنادى.

«كورىنبەيتىن نەمەسە ۇلتتىق ستاندارت تالاپتارىنا سايكەس كەلمەيتىن، بەلگىلى ءبىر ورىنداردان باسقا جەرگە ورناتىلعان مەملەكەتتىك تىركەۋ نومىرلەرى بار كولىكتى تىزگىندەۋ بەس ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى»، - دەلىنگەن باپتا.

ايتا كەتەيىك، 2023 جىلى 1 اەك - 3 450 تەڭگەگە تەڭ. وسىلايشا، 17 250 تەڭگە كولەمىندە ايىپپۇل تولەۋگە تۋرا كەلەدى. بۇعان دەيىن الەۋمەتتىك جەلىلەردە مەملەكەتتىك ءنومىرىن قار باسقان كولىكتىڭ ۆيدەوسى پايدا بولعان ەدى.

«جەرگىلىكتى پوليسيا باسقارماسى كولىك جۇرگىزۋشىسىن انىقتاۋ جانە ونى جاۋاپكەرشىلىككە تارتۋ بويىنشا تەكسەرىس باستادى»، - دەدى الماتى پوليسياسى وكىلى.